ມິເດຍລາວ ແຂວງອັດຕະປື ຂ່າວ: ຫັດສະດີ ສຸດດາວົງ ພິທີປະກາດ 9 ບ້ານເທດສະບານ ຂອງເມືອງສາມັກຄີໄຊ ແຂວງອັດຕະປື ເປັນບ້ານຢຸດຕິການຖ່າຍຊະຊາຍ ໄດ້ຈັດຂຶ້ນຢ່າງເປັນທາງການໃນວັນທີ 26 ກຸມພາ 2021 ນີ້ທີ່ຫ້ອງການບ້ານເຊໃຫຍ່,ໂດຍການເປັນກຽດເຂົ້າຮ່ວມຂອງທ່ານ ເພັດມີໄຊ ຄຳພັກດີ ຄະນະປະຈຳພັກແຂວງ ເລຂາພັກເມືອງເຈົ້າເມືອງເມືອງສາມັກຄີໄຊ,ມີທ່ານ ດຣ ພູສະວັນ ບຸຜາພັນ ຮອງຫົວໜ້າພະແນກສາທາລະນະແຂວງອັດຕະປື,ມີການນໍາຂອງເມືອງ,ອໍານາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນທັງ 9 ບ້ານເຂົ້າຮ່ວມ.
ໃນພິທີທ່ານ ແສງດາວ ວົງສັກດາ ຮອງຫົວໜ້າຫ້ອງການສາທາ ເມືອງສາມັກຄີໄຊ ໄດ້ລາຍງານໃຫ້ຮູ້ວ່າ: 9 ບ້ານທີ່ໄດ້ຮັບນາມມະຍົດເປັນບ້ານຍຸດຕິການຖ່າຍຊະຊາຍ ຂອງເມືອງສາມັກຄີໄຊ ຄັ້ງນີ້ມີ ບ້ານເຊໃຫຍ່,ບ້ານເວີນແຄນ,ບ້ານໄຊສະອາດ,ບ້ານເມືອງໄໝ່,ບ້ານສາມັກຄີ,ບ້ານເຊກອງ,ບ້ານໂພນສະຫວ່າງ,ບ້ານຫຼັກສາມ ແລະ ບ້ານວັດຫຼວງ ທັງ 9 ບ້ານດັ່ງກ່າວເປັນບ້ານທີ່ຕັ້ງຢູ່ໃຈກາງເທດສະບານຂອງເມືອງສາມັກຄີໄຊ,ເຊີ່ງມີປະຊາກອນທັງໝົດ 13.831 ຄົນ,ຍີງ 6.952 ມີ 2.993 ຫຼັງຄາເຮືອນ,ມີ 2.828 ຄອບຄົວ,ອາຊີບຕົ້ນຕໍໂດຍສ່ວນໃຫ່ຍແລ້ວແມ່ນພະນັກງານກວມເອົາ 68%,ອາຊີບຄ້າຂາຍກວມເອົາ 22 % ແລະອາຊີບຊາວກະສິກອນກວມເອົາ 10%,ເຊີ່ງ 9 ບ້ານດັ່ງກ່າວແມ່ນໄດ້ຜ່ານການປະເມີນຕາມ 4 ມາດຖານຄື: ມີວິດຖ່າຍ 100%,ລ້າງມືໃສ່ສະບູໄດ້ 60% ຂື້ນໄປ,ດື່ມນ້ຳ ແລະ ໃຊ້ນໍ້າສະອາດ 90% ຂື້ນໄປ,ອະນາໄມສີ່ງແວດລ້ອມໄດ້ 60% ຂື້ນໄປ,ຜົນການປະເມີນລວມທັງ 4 ມາດຖານປະຕິບັດໄດ້ 95 %.

ໃນພິທີໄດ້ມອບໃບຢັ້ງຢືນ ໃຫ້ 9 ບ້ານ ເປັນບ້ານຢຸດຕິການຖ່າຍຊະຊາຍ ຢ່າງສົມກຽດ,ພ້ອມທັງໄດ້ຮັບການໂອ້ລົມຂອງທ່ານ ເພັດມີໄຊ ຄຳພັກດີ ເຈົ້າເມືອງສາມັກຄີໄຊ,ເຊິ່ງທ່ານໄດ້ຮຽກຮ້ອງມາຍັງທຸກພາກສ່ວນ,ຂະແໜງການທີ່ກ່ຽວຂ້ອງ ແລະ ພໍ່ແມ່ປະຊາຊົນພາຍໃນເມືອງສາມັກຄີໄຊ ຕ້ອງອອກແຮງຮັກສາມູນເຊື້ອ ແລະ ນາມມະຍົດ ເລີ່ມຈາກ ຄອບຄົວຢຸດຕິການຖ່າຍຊະຊາຍ, ບ້ານຢຸດຕິການຖ່າຍຊະຊາຍ ແລະ ເມືອງຢຸດຕິຖ່າຍການຊະຊາຍໃນຂັ້ນຕໍ່ໄປ.