ເພື່ອແນໃສ່ກຽມຄວາມພ້ອມໃຫ້ແກ່ການເປີດກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງ ຊຸດທີ II. ແຂວງສາລະວັນ ຈັດກອງປະຊຸມປືກສາຫາລື ຮ່ວມກັນ ລະຫວ່າງ ສະພາປະຊາຊົນແຂວງ, ອົງການປົກຄອງແຂວງ ແລະ ອົງການຕຸລາການແຂວງ ເພື່ອເອກະພາບດ້ານເນື້ອໃນ, ພິທີການ ແລະ ບັນດາອະນຸກຳມະການຕ່າງໆ ກໍ່ໄດ້ກວດກາຄືນໜ້າວຽກທີ່ຕົນຮັບຜິດຊອບ, ທັງກຳນົດເປົ້າໝາຍ, ເວລາ ແລະ ແລກປ່ຽນ, ແກ້ໄຂໜ້າວຽກຕ່າງໆທີ່ຍັງຄົງຄ້າງ ເພື່ອສາມາດດັດປັບຫັນປ່ຽນໄດ້ຢ່າງຄ່ອງຕົວ ແລະ ຮັບປະກັນຄວາມພ້ອມ 100%.

ທ່ານ ນາງ ສຸນໄຖ ໄຊຍະແສງ ກຳມະການພັກແຂວງ ຮອງປະທານສະພາປະຊາຊົນແຂວງສາລະວັນ ໄດ້ຜ່ານບົດລາຍງານການພົວພັນປະສານງານລະຫວ່າງ ສະພາປະຊາຊົນແຂວງ, ອົງການປົກຄອງແຂວງ ແລະອົງການຕຸລາການແຂວງ ໂດຍໄດ້ຍົກໃຫ້ເຫັນການພົວພັນຮ່ວມມືກັນໃນໄລຍະຜ່ານມາ ດ້ານຕັ້ງໜ້າ, ຂໍ້ຄົງຄ້າງ ແລະບາງບົດຮຽນທີ່ຖອດຖອນໄດ້. ໂດຍສະເພາະດ້ານການສ້າງ ແລະ ປັບປຸງນິຕິກຳທີ່ສຳຄັນຂອງແຂວງ, ການຕິດຕາມກວດກາວຽກງານຕ່າງໆ ດ້ານການຄົ້ນຄວ້າ-ແກ້ໄຂກ່ຽວກັບຄຳຮ້ອງທຸກຂອງປະຊາຊົນ. ການພິຈາລະນາ, ຕົກລົງ ແລະ ຮັບຮອງເອົາບັນຫາສຳຄັນ ເຊັ່ນ: ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ພິຈາລະນາຮັບຮອງການແຕ່ງຕັ້ງ, ຍົກຍ້າຍບຸກຄະລາກອນອົງການປົກຄອງ ແລະອົງການຕຸລາການແຂວງ, ພິຈາລະນາຮັບຮອງເອົາການແຕ່ງຕັ້ງເຈົ້າເມືອງ, ສ້າງນິຕິກຳລຸ່ມກົດໝາຍ ແລະອື່ນໆ. ນອກນັ້ນໄດ້ຜ່ານຂໍ້ສະເໜີການພົວພັນຂອງ 3 ພາກສ່ວນ ທີ່ໄດ້ຜ່ານການປຶກສາຫາລື ແລະ ຄົ້ນຄວ້າຮ່ວມກັນ ເພື່ອຈະນຳເຂົ້າກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງ ຊຸດທີ II. ຜູ້ເຂົ້າຮ່ວມກໍ່ໄດ້ແລກປ່ຽນຄຳຄິດເຫັນ ແລະ ບັນດາໜ້າວຽກຂອງອະນຸກຳມະການຕ່າງໆ.

ກອງປະຊຸມດັ່ງກ່າວ ຈັດຂຶ້ນໃນທ້າຍອາທິດຜ່ານມານີ້, ຢູ່ທີ່ຫ້ອງຮັບຮອງ ສະໂມສອນແຂວງ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ປອ ໂພໄຊ ໄຊຍະສອນ ກຳມະການສູນກາງພັກ ເລຂາພັກ ເຈົ້າແຂວງໆສາລະວັນ, ມີບັນດາທ່ານຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກ, ອົງການທຽບເທົ່າອ້ອມຂ້າງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ຂ່າວພາບ: ວິໄລວອນ ສິດທິໄຊ