ມິເດຍລາວແຂວງໄຊສົມບູນ ຂ່າວ : ພຸດທະສອນ ເວດສະວົງ ພິທີສອບເສັງຄັດເລືອກນັກຮຽນເກັ່ງ ຊັ້ນ ປໍ 5, ມໍ 4 ແລະ ມໍ 7 ທົ່ວແຂວງໄຊສົມບູນ ໄດ້ຈັດຂຶ້ນໃນວັນທີ 2 ມີນາ ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງໄຊສົມບູນ ໂດຍການເຂົ້າຮ່ວມ ແລະ ເປີດຊອງຫົວບົດສອບເສັງ ຂອງ ທ່ານ ລີປາວ ໄຊຍະຊ້າງ ຮອງຫົວໜ້ າພະແນກສຶກສາທິການ ແລະ ກິລາ ແຂວງ, ມີຄະນະພະແນກ,ຫ້ອງການສຶກສາທິການ ແລະ ກິລາ 5 ເມືອງ, ອຳນວຍການໂຮງຮຽນ ຕະຫລອດຮອດຄູອາຈານ ແລະ ນ້ອງນັກຮຽນເກັ່ງທົ່ວແຂວງ ເຂົ້າຮ່ວມ.
ການສອບເສັງຄັດເລືອກເອົານັກຮຽນເກັ່ງ ກໍແມ່ນໜຶ່ງໃນກິດຈະກຳທີຢູ່ນອນໃນແຜນການປັບປຸງຄຸນນະ ພາບການສຶກສາ ທີ່ໄດ້ຈັດຕັ້ງປະຕິບັດມາຢ່າງຕໍ່ເນື່ອງໃນແຕ່ລະສົກຮຽນ ເພື່ອສ້າງໂອກາດໃຫ້ນັກຮຽນໄດ້ສະແດງຄວາມຮູ້-ຄວາມສາມາດ, ພອນສະຫວັນ, ຫົວຄິດປະດິດສ້າງຂອງຕົນເອງ ແລະ ຍັງເປັນການສົ່ງເສີມຂະບວນການສອນດີ-ຮຽນເກັ່ງ ໃນບັນດາໂຮງຮຽນໃຫ້ມີບັນຍາກາດຟົດຟື້ນແຂ່ງຂັນກັນ. ໃນນີ້ການສອບເສັງຊັ້ນປະຖົມສຶກສາມີ 3 ວິຊາສອບເສັງ ຄື : ວີຊາ ຄະນິດສາດ, ພາສາລາວ, ໂລກອ້ອມຕົວ, ຊັ້ນມັດທະຍົມສຶກສາ ມີ 4 ວິຊາສອບເສັງ ຄື: ພາສາລາວ-ວັນນະຄະດີ, ຄະນິດສາດ, ຟີຊິກສາດ ແລະ ເຄມີສາດ ຊຶ່ງມີນັກສອບທັງໝົດ 128 ຄົນ, ຍິງ 44 ຄົນ, ນັກສອບເສັງນອກມີ 24 ຄົນ, ຍິງ 7 ຄົນ ສຳລັບມາດຖານເງື່ອນໄຂຂອງນັກຮຽນເກັ່ງຂັ້ນແຂວງ ໄດ້ທີ 1, ທີ 2 ທີ 3 ຂອງແຕ່ລະວິຊາ ຜົນຂອງການສອບເສັງຕ້ອງໄດ້ຄະແນນ 5 ຂຶ້ນໄປ ຈຶ່ງຖືກຮັບຮອງເປັນນັກຮຽນເກັ່ງ ຖ້າຫາກວ່າວິຊາໃດບໍ່ມີນັກຮຽນເສັງໄດ້ຄະແນນ 5 ຂຶ້ນໄປ ວິຊານັ້ນຈະບໍ່ມີ ນັກຮຽນເກັ່ງຂັ້ນແຂວງ.

ຜ່ານການສອບເສັງຄັດເລືອກນັກຮຽນເກັ່ງປະຈຳສົກຮຽນ 2020-2021 ຊັ້ນປະຖົມ ປໍ 5 ອັນດັບທີ 1 ວິຊາ ຄະນິດສາດ ໄດ້ແກ່ທ້າວ ເກີເລົ່າ ມາຈາກໂຮງຮຽນປະຖົມຈະເລີນໄຊ ເມືອງທ່າໂທມ, ວິຊາໂລກອ້ອມຕົວ ທີ 1 ໄດ້ແກ່ ນາງ ອາລີ ພິມມະສອນ ມາຈາກໂຮງຮຽນປະຖົມນໍ້າຄຸນ ເມືອງລ້ອງຊານ, ວິຊາພາສາລາວ ທີ 1 ໄດ້ແກ່ນາງ ຈັນທະລາສີວ່າງ ມາຈາກ ປະຖົມພູຫົວຊ້າງ, ມັດທະຍົມສຶກສາຊັ້ນມໍ 4 ວິຊາຄະນິດສາດ ທີ 1 ໄດ້ແກ່ທ້າວ ເພັ່ງມອງຢ່າງ ສີສົມບຼົ່ງ ມາຈາກ ມສ ລ້ອງຊານ ເມືອງລ້ອງຊານ, ວິຊາພາສາລາວ-ວັນະຄະດີ ທີ 1 ໄດ້ແກ່ ນາງ ເກດສະດາທໍ່ ເພຍຫລວງ ຈົ່ງເສີ ມາຈາກ ມສ ຜາລະແວກ ເມືອງຮົ່ມ, ທີ 2 ໄດ້ແກ່ ນາງ ດາລອນ ພິມມະສອນ ຈາກ ມສ ຄອນຊະນະ ເມືອງທ່າໂທມ, , ລາງວັນຊົມເຊີຍ ວິຊາຟີຊິກສາດ ໄດ້ແກ່ ທ້າວ ຢ່າງ ຈົ່ງຕື ໜາວຈາ ມາຈາກ ມສ ລ້ອງຊານ ເມືອງລ້ອງຊານ, ລາງວັນຊົມເຊີຍວິຊາ ເຄມີສາດ ໄດ້ແກ່ ທ້າວ ດາວຢ່າງ ມາຈາກ ມສ ເມືອງອອມ ເມືອງອະນຸວົງ ສ່ວນມັດທະຍົມສຶກສາ ຊັ້ນ ມໍ 7 ວິຊາຄະນິດສາດ ທີ 1 ໄດ້ແກ່ທ້າວ ລ້ອງຢ່າງ ມາຈາກ ມສ ໄຊສົມບູນ ເມືອງອະນຸວົງ, ທີ 2 ໄດ້ແກ່ທ້າວ ຄໍາສິງ ວ່າຢ່າງຊາວ ມາຈາກ ມສ ໄຊສົມບູນ ເມືອງອະນຸວົງ, ວິຊາພາສາລາວ-ວັນນະຄະດີ ທີ 1 ໄດ້ແກ່ນາງ ລູຢົງຊົ່ງ ໄຊກໍ ມາຈາກ ມສ ໄຊສົມບູນ ແລະ ລາງວັນຊົມເຊີຍ ວິຊາຟີຊິກສາດ ໄດ້ແກ່ ທ້າວ ເຢ້ຢ່າງ ມາຈາກ ມສ ລ້ອງຊານ, ລາງຊົມເຊີຍ ວິຊາ ເຄມີສາດ ໄດ້ແກ່ ນາງ ນູ້ຢ່າງ ໜາວເຮີ ມາຈາກ ມສ ໄຊສົມບູນ. ສຳລັບນັກຮຽນເກັ່ງເສັງໄດ້ອັບທີ 1 ໄດ້ຮັບລາງວັນເງິນສົດ 2.000.000 ກີບ ແລະ ໃບຍ້ອງຍໍຂອງທ່ານຫົວໜ້າພະແນກສຶກສາທິການ ແລະ ກິລາ ແຂວງ, ທີ 2 ໄດ້ຮັບລາງວັນເງິນສົດ 1.500.000 ກີບ ແລະ ໃບຍ້ອງຍໍຂອງທ່ານຫົວໜ້າພະແນກສຶກສາທິການ ແລະ ກິລາ ແຂວງ, ລາງວັນຊົມເຊີຍ ໄດ້ຮັບລາງວັນເງິນສົດ 500.000 ກີບ ແລະ ໃບຍ້ອງຍໍຂອງທ່ານຫົວໜ້າພະແນກສຶກສາທິການ ແລະ ກິລາ ແຂວງ .