ວັນທີ 24 ມີນາ 2021 ຢູ່ທີ່ຫ້ອງປະຊຸມຫ້ອງການກະສີກຳ-ປ່າໄມ້ເມືອງບາຈຽງຈະເລີນສຸກ  ແຂວງຈໍາປາສັກ ສີ່ໜ່ວຍພັກໄດ້ຈັດພິທີເລື່ອນສະມາຊິກພັກສໍາຮອງຂຶ້ນເປັນສະມາຊິກສົມບູນ ໂດຍການເປັນປະທານ ຂອງສະຫາຍ ປອ ອໍານວຍ ເຮືອງວົງສາ ຮອງເລຂາພັກເມືອງ ຜູ້ຊິ້ນໍາວຽກງານພັກ-ພະນັກງານ, ອົງການຈັດຕັ້ງມະຫາຊົນມີສະຫາຍ ສຸດທະເຮືອງສັກ ກຸນລະບຸດ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງ, ເລຂາ-ຮອງເລຂາໜ່ວຍພັກອ້ອມຂ້າງ ແລະ ເລຂາໜ່ວຍພັກ ພ້ອມດ້ວຍສະມາຊິກພັກສີ່ໜ່ວຍພັກເຂົ້າຮ່ວມ.


 ສະຫາຍ ສຸດທະເຮືອງສັກ ກຸນລະບຸດ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງຂື້ນຜ່ານ ມະຕິຕົກລົງຂອງຄະນະປະຈໍາພັກເມືອງບາຈຽງຈະເລີນສຸກ ວ່າດ້ວຍການອະນຸມັດຮັບເອົາສະມາຊິກພັກສໍາຮອງເຂົ້າເປັນພັກສົມບູນມີ 5 ສະຫາຍ,ຍິງ 4 ສະຫາຍໃນສີ່ໜ່ວຍພັກຄື: ໜ່ວຍພັກຖະແຫຼງຂ່າວ,ວັດທະນະທຳ-ທ່ອງທ່ຽວ,ໜ່ວຍພັກຊາວໜຸ່ມ,ໜ່ວຍພັກພາຍໃນແລະໜ່ວຍພັກສະຫະພັນແມ່ຍິງເມືອງ ຈາກນັ້ນສະຫາຍ ຄໍາໄຫຼ ລາດຊະບັນດິດ ເລຂາໜ່ວຍພັກຫ້ອງການພາຍໃນກໍ່ໄດ້ຂື້ນຮັບເອົາສະມາຊິກພັກສົມບູນໃໝ່ເພື່ອບັນຈຸເຂົ້າໃສ່ໃນແຕ່ລະໜ່ວຍພັກ.


ໃນຕອນທ້າຍຂອງພິທີຄັ້ງນີ້ ສະຫາຍ ປອ ອໍານວຍ ເຮືອງວົງສາ ຮອງເລຂາພັກເມືອງຍັງໄດ້ເລົ່າຄືນບາງເນື້ອໃນສຳຄັນວັນສ້າງຕັ້ງພັກປະຊາຊົນປະຕິວັດລາວຄົບຮອບ66ປີ ເພື່ອໃຫ້ສະມາຊິກພັກມີຄວາມຮັບຮູ້ເຂົ້າໃຈຕື່ມຕໍ່ແນວທາງນະໂຍບາຍ,ຕໍ່ລະບຽບພັກໂດຍສະເພາະແມ່ນ: ຕ້ອງຢຶດໝັ້ນສະເໝີຕົ້ນສະເໝີປາຍຕໍ່ອຸດົມການສັງຄົມນິຍົມ ບັນດາຫຼັກມູນພື້ນຖານຂອງການກໍ່ສ້າງພັກຕາມລັດທິມາກ-ເລນິນ.,ຍາມໃດເວລາໃດຕ້ອງຢຶດໝັ້ນທາດແທ້ຊົນຊັ້ນຖືເອົາປະຊາຊົນເປັນກົກ,ຮັບໃຊ້ປະຊາຊົນ ໃຫ້ມີຄວາມຈົ່ງຮັກພັກດີຕໍ່ຜົນປະໂຫຍດອັນລວມຂອງຊາດ,ຂອງປະຊາຊົນຕິດແທດກັບປະຊາຊົນໂດຍອີງໃສ່ມະຫາຊົນແລະຝຶກຝົນຫຼໍ່ຫຼອມຜ່ານຂະບວນການຂອງມະຫາຊົນໃນການກໍ່ສ້າງຂະຫຍາຍພັກແລະອື່ນໆ.

ຂ່າວ-ພາບ: ນາງ ເພັດສະຫວັນ ນັກຂ່າວເມືອງ