ພວກເຮົາເວົ້າກັນມາຫຼາຍສົມຄວນເລື່ອງວິໄນສັງຄົມໃນເວລາທີ່ພະຍາດລະບາດ ໂດຍສະເພາະແມ່ນຄົນຢູ່ນະຄອນຫຼວງວຽງຈັນ ທາງການອອກມາດຕະການປິດບ້ານ-ປິດເມືອງ ມີຫຼາຍຂໍ້ຫ້າມ ແຕ່ເບີ່ງຄືວ່າຄົນບໍ່ໃຫ້ການຮ່ວມມືສະແດງອອກໃນ Timeline ຂອງຄົນສ່ຽງກ່ອນຈະກວດພໍ້ຜົນເປັນບວກ ຄົນຈຳນວນໜ້ອຍແຕ່ເຮັດໃຫ້ສັງຄົມວຸ້ນວາຍຍ້ອນ ສະນັ້ນຈື່ງມີມາດຕະການປິດບ້ານ-ປິດເມືອງຕື່ມອີກ 15 ວັນ ຄືແຕ່ວັນທີ 5 ມິຖຸນາ ເວລາ 00:00 ໂມງຫາ 24:00 ໂມງຂອງວັນທີ 19 ມິຖຸນາ 2021.

ໃນແຈ້ງການຫຼ້າສຸດ ຂອງສຳນັກງານນາຍົກລັດຖະມົນຕີ ເລກທີ 595/ຫສນຍ ລົງວັນທີ 4 ມິຖຸນາ 2021 ນັ້ນເພີ່ນກໍ່ໃຫ້ຂໍ້ສັງເກດກ່ອນສືບຕໍ່ປິດບ້ານ-ປິດເມືອງ ວ່າ: “ຫ້ອງວ່າການສຳນັກງານນາຍົກລັດຖະມົນຕີ ຂໍຖືເປັນກຽດແຈ້ງມາຍັງທ່ານ ຊາບວ່າ: ຜ່ານການຈັດຕັ້ງປະຕິບັດມາດຕະການຕ່າງໆ ໃນຄຳສັ່ງຂອງນາຍົກລັດຖະມົນຕີ ສະບັບເລກທີ 15/ນຍ ລົງວັນທີ 21 ເມສາ 2021 ແລະ ມາດຕະການຕ່າງໆ ທີ່ບັນດາຂະແໜງການທັງສູນກາງ ແລະ ທ້ອງຖີ່ນໄດ້ວາງອອກ ເຫັນວ່າການຈັດຕັ້ງທຸກຂັ້ນ, ທຸກພາກສ່ວນ ລວມທັງພາກລັດ, ພາກທຸລະກິດ ແລະ ສັງຄົມ ລ້ວນແຕ່ໄດ້ປະຕິບັດຕາມໜ້າທີ່ ແລະ ພັນທະຂອງຕົນ ດ້ວຍຄວາມຮັບຜິດຊອບສູງ ເຮັດໃຫ້ການລະບາດມີທ່າອ່ຽງຫຼຸດລົງຢູ່ຫຼາຍແຂວງ ແຕ່ເຖີງຢ່າງໃດກໍ່ຕາມການລະບາດໃນຊຸມຊົນ ກໍ່ຍັງມີຢູ່ບາງແຂວງ ໂດຍສະເພາະຢູ່ນະຄອນຫຼວງວຽງຈັນ ຍ້ອນແນວນັ້ນການທີ່ຈະຄວບຄຸມ ແລະ ແກ້ໄຂການລະບາດໃຫ້ໄດ້ນັ້ນຍັງຕ້ອງໃຊ້ເວລາຕື່ມອີກພໍສົມຄວນ ເພາະເຊື້ອພະຍາດ COVID-19 ທີ່ກຳລັງແຜ່ລະບາດໃນປັດຈຸບັນແມ່ນມີສາຍພັນທີ່ສາມາດເແຜ່ເຊື້ອໄວ ສະນັ້ນ ເພື່ອໃຫ້ບັນລຸຄາດໝາຍລວມໃນການຄວບຄຸມ ແລະ ແກ້ໄຂການລະບາດພະຍາດ COVID-19 ໃນຊຸມຊົນໃຫ້ມີຜູ້ຕິດເຊື້ອໜ້ອຍທີ່ສຸດ, ມີຜູ້ເສຍຊີວິດໜ້ອຍທີ່ສຸດ ແລະ ໃຫ້ທຸກຄົນໃນສັງຄົມໄດ້ໃຊ້ຊີວິດປົກກະຕິ ພາຍໃຕ້ເງື່ອນໄຂວິຖີຊີວິດປົກກະຕິໃໝ່ (New Normal) ໄດ້ໄວ, ລັດຖະບານ ຈຳເປັນຕ້ອງໄດ້ສືບຕໍ່ປະຕິບັດບັນດາມາດຕະການທີ່ໄດ້ລະບຸໃນຄຳສັ່ງ ສະບັບເລກທີ 15/ນຍ ລົງວັນທີ 21 ເມສາ 2021 ; ແຈ້ງການ ສະບັບເລກທີ 406/ຫສນຍ ລົງວັນທີ 26 ເມສາ 2021; ເລກທີ 462/ຫສນຍ ລົງວັນທີ 5 ພຶດສະພາ 2021; ເລກທີ 528/ຫສນຍ ລົງວັນທີ 20 ພຶດສະພາ 2021 ແລະ ຄຳແນະນຳ ຂອງຄະນະສະເພາະກິດຂັ້ນສູນກາງ ອອກໄປຕື່ມອີກ 15 ວັນ ໂດຍເລີ່ມແຕ່ເວລາ 00:00 ໂມງ ຂອງວັນທີ 5 ມິຖຸນາ 2021 ຫາເວລາ 24:00 ໂມງ ຂອງວັນທີ 19 ມິຖຸນາ 2021 ພ້ອມທັງສືບຕໍ່ປະຕິບັດມາດຕະການວາງອອກ ແລະ ຜ່ອນຜັນບາງມາດຕະການ ຢູ່ນະຄອນຫຼວງວຽງຈັນ ແລະ ແຂວງທີ່ຍັງມີການລະບາດ”.

ສະນັ້ນ ຜູ້ຂຽນຈື່ງຢາກໃຫ້ພວກເຮົາກຳໄດ້ ໂດຍສຶກສາໃຫ້ເຂົ້າໃຈ, ກຳໃຫ້ແໜ້ນ ແຈ້ງການ ເລກທີ 595/ຫສນຍ ຈື່ງຈະເຮັດໃຫ້ການຈັດຕັ້ງປະຕິບັດຖືກຕ້ອງ ແລະ ມີປະສິດທິຜົນສູງສຸດ.

ໃນແຈ້ງການມີບາງມາດຕະການສືບຕໍ່ປະຕິບັດ 9 ຂໍ້ ແລະ ບາງມາດຕະການຜ່ອນຜັນ 12 ຂໍ້.

ຂໍ້ສຸດທ້າຍ ຂອງແຈ້ງການແມ່ນການມອບໝາຍໃຫ້ຂະແໜງການ ແລະ ອົງການປົກຄອງທ້ອງຖີ່ນທຸກຂັ້ນ ລວມທັງຢູ່ຂັ້ນເມືອງ, ບ້ານ ຫຼື ເຈົ້າໜ້າທີ່ໜ່ວຍປະຕິບັດງານ ພ້ອມກັນເອົາໃຈໃສ່ປະຕິບັດໜ້າທີ່ຂອງຕົນ ຕາມມາດຕະການທີ່ລັດຖະບານ ກໍ່ຄືຄະນະສະເພາະກິດວາງອອກຢ່າງເຂັ້ມງວດ, ກໍລະນີພົບເຫັນຜູ້ລະເມີດແມ່ນຕ້ອງດຳເນີນມາດຕະການເດັດຂາດຕາມກົດໝາຍ ແລະ ລະບຽບການກຳນົດ.

ອີກເທື່ອໜື່ງຂໍຮຽກຮ້ອງໃຫ້ທົ່ວສັງຄົມ ສຶກສາໃຫ້ເຂົ້າໃຈ, ກຳໃຫ້ແໜ້ນ ແຈ້ງການ 595.

ທິດດີ