ໃນວັນທີ 16-19 ມິຖຸນາ 2020 ທີ່ຜ່ານມາ ຢູ່ທີ່ຫ້ອງປະຊຸມ ຣີສອດ ນາປ່າກວາງ ໂດຍການເປັນກຽດເຂົ້າຮ່ວມຂອງ ທ່ານ ດຣ ອິນປອນ ມະນີແສງ ຫົວໜ້າພະແນກສາທາລະນະສຸກແຂວງວຽງຈັນ, ທ່ານ ຮສ.ດຣ ນາງ ຈັນທະຣາວະດີ ຈຸລາມະນີ, ນັກຈິດຕະແພດ, ຜູ້ອຳນວຍການອົງການເບຊິກນິສ ປະຈຳ ສປປ ລາວ, ມີພະນັກງານແພດປະຈຳຢູ່ 8 ສຸກສາລາຈາກ 4 ເມືອງເປົ້າໝາຍຄື: ເມືອງວັງວຽງ, ຫີນເຫີບ, ໂພນໂຮງ ແລະ ເມືອງທຸລະຄົມ ເຂົ້າຮ່ວມ.

ທ່ານ ດຣ ນາງ ແສງດາລາ ວົງສຸວັນ ໄດ້ກ່າວວ່າ: ໃນເດືອນພະຈິກ 2019 ໄດ້ຈັດຊຸຸດຝຶກອົບຮົມດັ່ງກ່າວນີ້ຂຶ້ນເປັນຄັ້ງທີ 1 ພາຍຫຼັງສຳເລັດຊຸຸດຝຶກອົບຮົມຄັ້ງທີ1ແລ້ວ ທາງໂຄງການສົ່ງເສີມວຽກງານສຸຂະພາບຈິດ ແລະ ການປິ່ນປົວ ໄດ້ປະກອບຢາທີ່ຈຳເປັນໃນການປິ່ນປົວພະຍາດຈິດໃຫ້ແຕ່ລະສຸກສາລາ ເພຶ່ອໃຫ້ການບໍລິການປິ່ນປົວໃນຊຸມຊົນຂອງຕົນ ທີ່ເປັນພະຍາດຈິດ.

ສຳລັບຊຸດຝຶກອົບຮົມຄັ້ງທີ 2 ນີ້ ແມ່ນມີຈຸດປະສົງເພຶ່ອໃຫ້ຄວາມຮູ້ເພີ່ມ ດ້ານສຸຂະພາບຈິດ-ພະຍາດຈິດ ແລະ ການພັດທະນາການສຸຂະພາບຈິດຂອງເດັກ ແລະ ໄວລຸ້ນ, ການປະຖົມພະຍາບານດ້ານຈິດໃຈ ແລະ ພະຍາດຊັກບ້າໝູ ໃຫ້ແກ່ພະນັກງານແພດປິ່ນປົວ ແລະ ພະຍາບານ ທີ່ປະຈຳຢູ່ສຸກສາລາ 8 ແຫ່ງຂອງ 4 ເມືອງເປົ້າໝາຍຢູ່ແຂວງວຽງຈັນ ໃນການບົ່ງມະຕິ ແລະ ສະໜອງການປິ່ນປົວພະຍາດຈິດ ໃຫ້ແກ່ຊຸມຊົນທີ່ມີການປັ່ນປ່ວນທາງຈິດ ໃຫ້ຖືກຕ້ອງຕາມແຕ່ລະກໍລະນີຂອງຄົນເຈັບ ແລະ ສາມາດດຳລົງຊີວິດໄດ້ໃນສັງຄົມ.

ໃນຊຸດຝຶກອົບຮົມຄັ້ງນີ້ບັນດານັກສຳມະນາກອນ ໄດ້ຮັບຟັງການສະເໜີບັນດາເອກະສານຂອງການຝຶກອົບຮົມໄດ້ມີການແບ່ງກຸ່ມຄົ້ນຄວ້າ, ປະກອບຄຳຄິດຄຳເຫັນ, ສົນທະນາແລກປ່ຽນບົດຮຽນຮ່ວມກັນ ລະຫວ່າງ ວິທະຍາກອນ ແລະ ສຳມະນາກອນ ແລະ ຊຸດຝຶກອົບຮົມຄັ້ງນີ້ໄດ້ດຳເນີນໄປເປັນເວລາ 4 ວັນ ຈຶ່ງຈະສຳເລັດລົົງ.

Medialaos MMD (ແຫຼ່ງຂໍ້ມູນຈາກ: ແຂວງວຽງຈັນ ອອນລາຍ)