ມີເດຍລາວແຂວງໄຊສົມບູນ ຂ່າວ: ຈິນລະວອນ ວໍລະສົມບູນ
ກອງວິຊາການຫໍພິພິທະພັນ, ຫໍສະໝຸດ ແລະ ສູນວັດທະນະທຳເດັກ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນ ໄດ້ລົງເຄື່ອນໄຫວກິດຈະກຳສຳລັບເດັກ ຢູ່ໂຮງຮຽນປະຖົມສົມບູນ ບ້ານທົ່ງຄູນ ເມືອງອະນຸວົງ ໃນຕອນບ່າຍຂອງວັນທີ 16 ມີນາ 2021 ນີ້ ພາຍໃຕ້ການນຳພາຂອງທ່ານ ທົງສະຫວັນ ໂພສະລາດ, ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນ, ຜູ້ຊີ້ນຳວຽກງານວັດທະນະທຳ ໂດຍການຕ້ອນຮັບຂອງທ່ານ ນັກລີ, ຜູ້ອຳນວຍການໂຮງຮຽນປະຖົມສົມບູນ ບ້ານທົ່ງຄູນ ພ້ອມດ້ວຍຄູອາຈານ ຕະຫຼອດຮອດນ້ອງນ້ອຍນັກຮຽນ ເຂົ້າຮ່ວມ ຢ່າງຫຼວງຫຼາຍ.

ໃນໂອກາດມີຄຳເຫັນໂອ້ລົມ ຕໍ່ຄູອາຈານ ແລະ ນ້ອງນ້ອຍນັກຮຽນ ຂອງໂຮງຮຽນປະຖົມສົມບູນ ບ້ານທົ່ງຄູນ ຄັ້ງນີ້ ທ່ານ ທົງສະຫວັນ ໂພສະລາດ, ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ, ຜູ້ຊີ້ນຳວຽກງານວັດທະນະທຳ ໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ໃນການລົງເຄື່ອນໄຫວກິດຈະກຳ ສຳລັບເດັກ ຊຶ່ງເປັນການຊຸກຍູ້ສົ່ງເສີມທັກສະດ້ານຕ່າງໆ ໃນການຮຽນຮູ້ຂອງເດັກ ທັງເປັນການປຸກລະດົມໃຫ້ເຂົາເຈົ້າ ເຫັນໄດ້ຄວາມໝາຍ-ຄວາມສຳຄັນ ໃນການຊອກຮູ້ຮໍ່າຮຽນ ເພື່ອໃຊ້ເວລາວ່າງໃຫ້ເປັນປະໂຫຍດ, ສ້າງກິດຈະກຳໃຫ້ເກີດຄວາມເພີດເພີນ, ເຮັດໃຫ້ເດັກມີຄວາມກະຕືລືລົ້ນ ແລະ ມັກຮັກ ໃນການຄົ້ນຄວ້າຮໍ່າຮຽນ.

ສຳລັບກິດຈະກຳ ທີ່ທິມງານນຳພາເດັກເຄື່ອນໄຫວ ໃນຄັ້ງນີ້ ປະກອບມີກິດຈະກຳຮ້ອງເພງປະກອບທ່າທາງ, ເກມຫຼິ້ນຢາຍປ໋ອງແປ້ງ, ສອນພັບເຈ້ຍ, ເລົ່ານິທານ ແລະ ອື່ນໆ ທັງນີ້ ກໍເພືຶ່ອປູກຈິດສຳນຶກໃຫ້ນ້ອງນ້ອຍນັກຮຽນ ໄດ້ມີຄວາມມັກຮັກໃນການອ່ານ, ການຂຽນ, ການປາກເວົ້າ, ການຝຶກແອບກິລາ ແລະ ສິລະປະ-ປະເພດຕ່າງໆ ເພື່ອສືບທອດມູນມໍລະດົກທາງວັດທະນະທຳ ທີ່ເປັນມູນເຊື້ອເອກະລັກ ປະຈຳເຜົ່າ ຫຼື ປະຈຳທ້ອງຖິ່ນ ທີ່ມີລັກສະນະຊາດ ຊຶ່ງປູ່ຍ່າຕາຍາຍໄດ້ສ້າງເອົາໄວ້ ໃຫ້ມີຄວາມຍືນຍົງ ໂດຍສອດຄ່ອງກັບແນວທາງປ່ຽນແປງໃໝ່ ຂອງພັກ-ລັດຖະບານ ເພື່ອປົກປັກຮັກສາວັດທະນະທຳ ທີ່ເປັນເອກະລັກ ຂອງແຕ່ລະເຜົ່າ ໃຫ້ຍືນຍົງຄົງຕົວຕະຫຼອດໄປ. ນອກນີ້ ຍັງເປັນການຝຶກແອບໃຫ້ນ້ອງນ້ອຍນັກຮຽນ ກ້າສະແດງຄວາມຮູ້-ຄວາມສາມາດ ແລະ ພອນສະຫວັນ ຂອງຕົນ ອອກສູ່ສາຍຕາສາທາລະນະຊົນ ໃຫ້ກວ້າງຂວາງອອກເລື້ອຍໆ. ທັງໝົດນັ້ນ ກໍເພື່ອປະຕິບັດຕາມ 5 ຫຼັກມູນ ຂອງການສຶກສາ ເຊັ່ນ: ປັນຍາສຶກສາ, ຄຸນສົມບັດສຶກສາ, ແຮງງານສຶກສາ, ສິລະປະສຶກສາ ແລະ ພາລະສຶກສາ ທີ່ກະຊວງສຶກສາທິການ ແລະ ກິລາ ວາງອອກ ໃຫ້ປະກົດຜົນເປັນຈິງ.