ເພື່ອເປັນການອະນຸລັກຮັກສາຮີດຄອງປະເພນີ, ສີໄມ້ລາຍມືໃນການຈັກສານຂອງບັນພະບູລຸດລາວເຮົາ ແລະ ເພື່ອສ້າງໃຫ້ນັກຮຽນໄດ້ມີຄວາມສາມັກຄີ, ໃຊ້ຄວາມຮູ້ຄວາມສາມາດ ຂອງຕົນປະດິດສ້າງຜະລິດຕະພັນພື້ນບ້ານໂດຍປະຍຸກໃຫ້ທຽມທັນກັບຍຸກສະໄໝ ສູນຫັດຖະກຳອອກພົບຕົກ ບ້ານສາຍລົມ ນະຄອນຫຼວງພະບາງ ຈຶ່ງໄດ້ຈັດກິດຈະກຳແຂ່ງຂັນສ້າງນະວັດຕະກຳໃໝ່ຈາກໄມ້ປ່ອງຂຶ້ນ ໃນວັນທີ 11 ມີນາ 2021 ໂດຍການເຂົ້າຮ່ວມຂອງທ່ານ ບຸນສົມ ຄຸນມະລີ ຫົວໜ້າພະແນກອຸດສາຫະກຳ ແລະ ການຄ້າ ແຂວງຫຼວງພະບາງ, ມີທ່ານ ຄັດທະພອນ ພົມມະປັນຍາ ຄະນະປະຈຳສະພາອຸດສາຫະກຳ ແລະ ການຄ້າແຂວງ, ມີຕາງໜ້າພະແນກ ຖວທ ແຂວງຫຼວງພະບາງ, ໂຮງແຮມ le sen ແລະ ຜູ້ຮ່ວມກໍ່ຕັ້ງສູນຫັດຖະກຳອອກພົບຕົກ ໄດ້ເຂົ້າຮ່ວມກິດຈະກຳດັ່ງກ່າວແມ່ນເລີ່ມແຕ່ ວັນທີ 20 ມັງກອນ 2021 ມີໂຮງຮຽນ 4 ແຫ່ງເຂົ້າຮ່ວມ ຄື: ໂຮງຮຽນສົງວັດພູຄວາຍ, ໂຮງຮຽນສັນຕິພາບ, ໂຮງຮຽນໂພນສະອາດ ແລະໂຮງຮຽນປ່ອງຄຳ.

ເຊິ່ງມີຕົວແທນນັກຮຽນຈາກແຕ່ລະໂຮງຮຽນ ທີມລະ 10 ຄົນ ຍິງ 5 ຄົນ, ກະຕິກາຂອງການແຂ່ງຂັນແມ່ນໃຫ້ນັກຮຽນສ້າງສັນງານສິລະປະ ດ້ວຍໄມ້ປ່ອງ ໂດຍປາສະຈາກການນຳໃຊ້ໂລຫະ ແລະ ພາສະຕິກ. ການຕັດສິນແມ່ນຈະມີການໂພສຜົນງານຂອງແຕ່ລະທີມລົງເພຈເຟສບຸກຂອງສູນຫັດຖະກຳອອກພົບຕົກ ແລະ ການໃຫ້ຄະແນນຂອງຄະນະກຳມະການແຕ່ລະພາກສ່ວນ ສຳລັບລາງວັນແມ່ນປະກອບມີ 4 ລາງວັນ, ໄດ້ແກ່ລາງວັນຊະນະເລີດຈະກຳນົດຈາກຍອດການກົດຖືກໃຈ ໃນເຟສບຸກແຟນເພຈຂອງສູນຫັດຖະກຳ ຈະໄດ້ຮັບລາງວັນເປັນເງິນສົດ 2.000.000 ກີບ, ລາງວັນທີສອງໄດ້ຈາກການໃຫ້ຄະແນນຈາກຄະນະກຳມະການ ຈະໄດ້ຮັບລາງວັນເປັນເງິນສົດ 2.000.000 ກີບເຊັ່ນດຽວກັນ.

ສ່ວນອີກສອງລາງວັນເປັນລາງວັນພິເສດເງິນສົດ 500.000 ກີບ ແລະ ລາງວັນຊົມເຊີຍເງິນສົດ 200.000 ກີບ ຜົນງານການປະດິດຂອງນັກຮຽນແຕ່ລະທີມແມ່ນໄດ້ຈັດວາງສະແດງ ໃນວັນທີ 2 ກຸມພາ 2021 ທີຜ່ານມາ ທີ່ສູນ ຫັດຖະກຳອອກພົບຕົກ ບ້ານສາຍລົມ ນະຄອນ ຫຼວງພະບາງ.
ມາໃນວັນທີ 11 ມີນາ 2021 ຈຶ່ງໄດ້ມີການຈັດງານປະກາດຜົນການແຂ່ງຂັນ ເຊິ່ງຜົນປາກົດວ່າທີມຊະນະເລີດແມ່ນ ທີມຈາກໂຮງຮຽນສົງວັດພູຄວາຍ ນະຄອນຫຼວງພະບາງ ໄດ້ຮັບຍອດໄລນ໌ ຈາກເຟສບຸກແຟນເພຈ ເຖິງ 863 ຍອດໄລນ໌ ແລະ ລາງວັນທີ 2 ໄດ້ແກ່ທີມຈາກໂຮງຮຽນມັດທະຍົມສົມບູນສັນຕິພາບ ໄດ້ຮັບການໃຫ້ຄະແນນຈາກຄະນະກຳມະການຫຼາຍທີ່ສຸດ ສ່ວນທີມຈາກໂຮງຮຽນໂພນສະອາດ ແລະ ໂຮງຮຽນປ່ອງຄຳແມ່ນໄດ້ຮັບລາງວັນພິເສດ ແລະ ລາງວັນຊົມເຊີຍ.