ມິເດຍລາວແຂວງໄຊສົມບູນ ຄະນະບໍລິຫານງານສະຫະພັນແມ່ຍິງ ແຂວງໄຊສົມບູນ ໄດ້ສ້າງຂະບວນການເຕັ້ນແອໂລບິດໃນວັນທີ 3 ມີນາ ນີ້ ທີເດີ່ນສະໂມສອນເມືອງອະນຸວົງ ໂດຍການເຂົ້າຮ່ວມຂອງ ທ່ານ ນາງ ຄຳສີ ສິດທິວໍລະດາປະທານຄະນະບໍລິຫານງານສະຫະພັນແມ່ຍິງ ແຂວງໄຊສົມບູນ, ມີຄະນະບໍລິຫານງານສະຫະພັນແມ່ຍິງແຂວງ, ສະມາຊິກແມ່ຍິງຈາກໜ່ວຍສະຫະພັນແມ່ຍິງພະແນກການ, ອົງການ, ກົມກອງອ້ອມຂ້າງແຂວງ ພ້ອມດ້ວຍ ຄະນະບໍລິຫານງານສະຫະພັນແມ່ຍິງເມືອງອະນຸວົງ ເຂົ້າຮ່ວມ.
ການສ້າງຂະບວນການເຕັ້ນແອໂລບິດ ຄັ້ງນີ້ ກໍເພື່ອເປັນການສ້າງຂະບວນການຂໍ່ານັບຮັບຕ້ອນ ແລະ ສະເຫລີມສະຫລອງວັນແມ່ຍິງສາກົນ ຄົບຮອບ 111 ປີ ຄື : ( ວັນທີ 8 ມີນາ 1910 ຫາ 8 ມີນາ 2021 ) ໃຫ້ເປັນຂະບວນການຟົດຟື້ນມ່ວນຊື່ນ ແລະ ມີຄວາມໝາຍຄວາມສຳຄັນ ທັງເປັນການສ້າງຄວາມສາມັກຄີລະຫວ່າງສະມາຊິກແມ່ຍິງພະແນກການອ້ອມຂ້າງແຂວງ ໃຫ້ມີຄວາມແໜ້ນແຟ້ນ ແລະ ເລິກເຊິ່ງກວ່າເກົ່າ ນອກຈາກນີ້ ຍັງເປັນການເສີມສ້າງສຸຂະພາບໃຫ້ມີຄວາມແຂງແຮງ ຊຶ່ງການສ້າງຂະບວນການເຕັ້ນແອໂລບິດຄັ້ງນີ້ ແມ່ນເຕັມໄປດ້ວຍບັນຍາກາດຄຶກຄື້ນ ແລະ ເບີກບານມ່ວນຊື່ນ.