ຂປລ. ຫລາຍບໍລິສັດ ສືບຕໍ່ມອບເຄື່ອງຊ່ວຍເຫລືອ ໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ເພື່ອນຳໃຊ້ເຂົ້າໃນວຽກງານປ້ອງກັນ ແລະ ຕ້ານ ການແຜ່ລະບາດຂອງພະຍາດໂຄວິດ-19 ຢູ່ ລາວ, ເຊິ່ງພິທີມອບ-ຮັບດັ່ງກ່າວ ໄດ້ຈັດຂຶ້ນ ໃນວັນທີ 5 ພຶດສະພາ 2021 ທີ່ນະຄອນຫລວງວຽງຈັນ ຕາງໜ້າຮັບໂດຍ ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງ ຖວທ, ໂດຍມີພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.

ການຊ່ວຍເຫລືອໃນຄັ້ງນີ້, ປະກອບມີ ບໍລິສັດ ຮ່ວມພັດທະນາ ສີທັນດອນ ຈໍາກັດ ໄດ້ນໍາເອົານໍ້າດື່ມ 50 ແພັກ ແລະ ໝີ່ 20 ແກັດ, ບໍລິສັດ ວີເອັມວຽງຈັນ ມີເດຍ ຈຳກັດ ມອບນໍ້າຢາຂ້າເຊື້ອ ຈຳນວນ 200 ອັນ, ນໍ້າດື່ມ 60 ແພັກ ແລະ ບໍລິສັດ STS ຂາອອກ-ຂາເຂົ້າ ຈຳກັດຜູ້ດຽວ ມອບນໍ້າຢາຂ້າເຊື້ອ 300 ອັນ ແລະ ນໍ້າດື່ມ 60 ແພັກ.

ໃນໂອກາດນີ້, ທ່ານ ອຸ່ນທວງ ຂາວພັນ ໄດ້ສະແດງຄວາມຂອບໃຈຕໍ່ບັນດາບໍລິສັດ ທີ່ໄດ້ໃຫ້ການຊ່ວຍເຫລືອໃນຄັ້ງນີ້. ພ້ອມທັງ, ຢືນຢັນຈະນຳເອົາເຄື່ອງຊ່ວຍເຫລືອໃນຄັ້ງນີ້, ໄປໝູນໃຊ້ເຂົ້າໃນວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ກໍຄື ພາຍໃນກະຊວງ ຖວທ ໃຫ້ເກີດຜົນປະໂຫຍດສູງສຸດ ເປັນຕົ້ນ ໜີ່ ແລະ ນໍ້າດື່ມ ຈະນຳໃຊ້ເຂົ້າໃນຂະ ບວນການຊັກຢາຂອງກະຊວງ, ສ່ວນນໍ້າຢາຂ້າເຊື້ອ ຈະນຳໄປແຈກຢາຍໃຫ້ບັນດາສື່ມວນຊົນ ອ້ອມຂ້າງກະຊວງ ຖວທ.