ມີເດຍລາວແຂວງໄຊຍະບູລີ ຂ່າວ: ໄກເພັດ
ໃນວັນທີ 19 ມີນາ 2021 ນີ້, ໄດ້ຈັດພິທີປະກາດຮັບຮອງເອົາເມືອງຫົງສາເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂຶ້ນ ຢູ່ທີ່ເດີ່ນກິລາຮົ່ມຂອງເມືອງ, ໂດຍການໃຫ້ກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ, ມີທ່ານ ຄຳສີ ແພງສະຫວັນ ປະທານແນວລາວສ້າງຊາດແຂວງ, ທ່ານ ຄຳຫຼ້າ ຜິວວັນນາ ເຈົ້າເມືອງຫົງສາ, ມີແຂກຖືກເຊີນຂັ້ນແຂວງ ແລະ ເມືອງອ້ອມຂ້າງ, ການນຳຂອງເມືອງ, ອົງການຈັດຕັ້ງບ້ານ ແລະ ພາກສ່ວນຕ່າງໆເຂົ້າຮ່ວມ.

ໃນໂອກາດນີ້ ທ່ານຄຳຫຼ້າ ຜິວວັນນາ ເຈົ້າເມືອງຫົງສາ ກໍ່ໄດ້ຂຶ້ນກ່າວຕ້ອນຮັບ ແລະ ເປີດພິທີຢ່າງເປັນທາງການ, ຫຼັງຈາກນັ້ນ ທ່ານ ສົມຍົດ ອານຸວົງ ປະທານແນວລາວສ້າງຊາດເມືອງ ກໍ່ໄດ້ຂຶ້ນລາຍງານການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ, ເມືອງຫົງສາປະກອບມີ 32 ບ້ານ, ມີ 6.129 ຄອບຄົວ, ມີພົນລະເມືອງ 30.672 ຄົນ, ຍິງ 15.110 ຄົນ, ມີ 8 ເຜົ່າຢູ່ຮ່ວມກັນຄື: ເຜົ່າລາວ, ເຜົ່າກຶມມຸ, ເຜົ່າໄປຣ່, ເຜົ່າມົ້ງ, ເຜົ່າລື້, ເຜົ່າອິວມຽນ, ເຜົ່າໄທດຳ ແລະ ເຜົ່າຍວນ, ການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດແມ່ນການຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍ, ແຜນພັດທະນາເສດຖະກິດສັງຄົມ, ມະຕິກອງປະຊຸມໃຫຍ່ຜູ້ແທນທົ່ວປະເທດຂອງແນວລາວສ້າງຊາດຄັ້ງທີ 10, ການປຸກລະດົມກໍາລັງແຮງທົ່ວປວງຊົນ ເຂົ້າຮ່ວມປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ເປັນຂະບວນຢ່າງກວ້າງຂວາງ ແລະ ຟົດຟື້ນ, ມີຄວາມສາມັກຄີຢ່າງເປັນເອກະພາບຂອງປະຊາຊົນບັນດາເຜົ່າ, ບັນດາຊັ້ນຄົນ, ສາສະໜາ, ເພດໄວ, ໂດຍເລີ່ມຈາກຄອບຄົວ ແລະ ຮາກຖານບ້ານເປັນພື້ນຖານໃຫ້ແກ່ການສ້າງບ້ານພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍຢູ່ຊົນນະບົດ ເຊິ່ງເປັນປັດໃຈສຳຄັນ ໃນການເສີມສ້າງຄວາມສີວິໄລ, ຄວາມສະຫງົບ ແລະ ຄວາມມັ່ງຄັ່ງເຂັ້ມແຂງຂອງເມືອງ, ສະແດງອອກທົ່ວເມືອງຫົງສາ ສາມາດສ້າງລາຍຮັບໄດ້ທັງໝົດ 644,32 ຕື້ກີບ, ສະເລ່ຍລາຍຮັບໃສ່ຫົວຄົນໜຶ່ງໄດ້ 21,96 ລ້ານກີບຕໍ່ຄົນຕໍ່ປີ, ປະຈຸບັນຄອບຄົວທຸກຍາກຍັງເຫຼືອ 77 ຄອບຄົວ ເທົ່າກັບ 1,3%, ມີບ້ານທຸກຍາກ 1 ບ້ານ ເທົ່າກັບ 3,03%, ມີບ້ານພັດທະນາ 23 ບ້ານ, ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງແນວລາວສ້າງຊາດ ແມ່ນໄດ້ເລີ່ມແຕ່ ເດືອນພຶດສະພາ ປີ 2018 ເປັນຕົ້ນມາ.

ຜ່ານການຈັດຕັ້ງປະຕິບັດຕົວຈິງໃນແຕ່ລະໄລຍະ ຄອບຄົວທີ່ໄດ້ກວດກາຕາມມາດຖານເງື່ອນໄຂ ມີທັງໝົດຈຳນວນ 5.900 ຄອບຄົວ, ຖືກຮັບຮອງເປັນຄອບຄົວສາມັກຄີປອງດອງແລ້ວ ຈຳນວນ 5.670 ຄອບຄົວ, ກວມເອົາ 96,10%, ຈຳນວນບ້ານທີ່ປະກາດຮັບຮອງເປັນບ້ານສາມັກຄີປອງດອງແລ້ວ 30 ບ້ານ ກວມເອົາ 93,75%, ໃຫ້ກຽດຂຶ້້ນມອບໃບຢັ້ງຢືນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງແນວລາວສ້າງຊາດໂດຍ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງເຈົ້າແຂວງໄຊຍະບູລີ ໃຫ້ກຽດຂຶ້ນຮັບໂດຍທ່ານ ຄຳຫຼ້າ ຜິວວັນນາ ເຈົ້າເມືອງໆຫົງສາ, ຫຼັງຈາກນັ້ນຄະນະປະທານ ພ້ອມດ້ວຍແຂກ ແລະ ຜູ້ເຂົ້າຮ່ວມກໍ່ໄດ້ຮ່ວມກັນຕັດແຖບຜ້າ ເປີດປ້າຍ ແລະ ລັ່ນຄ້ອງ 9 ບາດເພື່ອເປັນສິລິມຸງຄຸນຕໍ່ພິທີດັ່ງກ່າວນີ້ຕື່ມອີກ.