ມີເດຍລາວແຂວງຈຳປາສັກ
ໃນວັນທີ 28 ເມສາ ນີ້ທ່ານ ສະນັ່ນ ສີພາພົມມະຈັນ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງຈຳປາສັກ ໄດ້ເຄື່ອນໄຫວເຮັດວຽກຢູ່ເມືອງໂຂງ ເພື່ອຕິດຕາມ, ກວດກາການຈັດຕັ້ງປະຕິບັດມາດຕະການ ປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ -19 ຊຶ່ງໃຫ້ການຕ້ອນຮັບ ແລະ ນຳພາເຄື່ອນໄຫວເບິ່ງສະຖານທີ່ຕົວຈິງຄັ້ງນີ້ໂດຍທ່ານນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ, ເຈົ້າເມືອງໆໂຂງ, ມີຄະນະສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ໃນການຕ້ານການລະບາດພະຍາດ ໂຄວິດ -19 ຂັ້ນເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ທ່ານນາງ ຄຳພູ ລິດທິສັກ ກໍໄດ້ລາຍງານສະພາບການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ໂດຍສັງເຂບວ່າ: ນັບແຕ່ມີການລະບາດຂອງພະຍາດ ໂຄວິດ -19 ທາງຄະນະບໍລິຫານງານພັກເມືອງຂອງພວກເຮົາ ກໍໄດ້ຮີບຮ້ອນຄົ້ນຄວ້າປຶກສາຫາລື ແລະ ວາງທິດທາງວິທີປ້ອງກັນຢ່າງຮີບດ່ວນ, ພ້ອມດຽວກັນນີ້ ກໍໄດ້ຜັນຂະຫຍາຍຄຳສັ່ງຂອງນາຍົກລັດຖະມົນຕີ ສະບັບເລກທີ 15/ນຍ ແລະ ຄຳສັ່ງຂອງເຈົ້າແຂວງຈຳປາສັກ ສະບັບເລກທີ 04/ຈຂ.ຈສ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ -19. ນອກຈາກນີ້ ກໍໄດ້ອອກຄຳສັ່ງເພີ່ມເຕີມເລກທີ 06/ຈມຂ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ -19 ໂດຍໃຫ້ເລຂາຄະນະພັກຮາກຖານກຸ່ມບ້ານ, ເລຂາພັກບ້ານ-ນາຍບ້ານຜັນຂະຫຍາຍອອກທາງສື່ໂທລະໂຄ່ງບ້ານ, ສື່ສະຖານີວິທະຍຸຂອງເມືອງ ເພື່ອໃຫ້ພໍ່ແມ່ປະຊາຊົນທຸກຊັ້ນຄົນໄດ້ຮັບຮູ້ກັນຢ່າງທົ່ວເຖິງ.

ຫ້າມປະຊາຊົນທຸກຊັ້ນຄົນທີ່ອາໄສ ແລະ ດຳລົງຊີວິດພາຍໃນເມືອງອອກຈາກເຮືອນ ຍົກເວັ້ນກໍລະນີຈຳເປັນ, ຫ້າມຄົນພາຍໃນເມືອງເດີນທາງໄປຕ່າງແຂວງ, ເມືອງ ແລະ ຫ້າມຄົນຕ່າງແຂວງ ແລະ ເມືອງເຂົ້າມາເມືອງໂຂງ ຍົກເວັ້ນຜູ້ມີພູມລຳເນົາ, ເຮັດວຽກຢູ່ພາຍໃນເມືອງ, ຜູ້ທີ່ຮັບອະນຸຍາດຈາກຄະນະສະເພາະກິດຂັ້ນເມືອງ; ໂຈະການບໍລິການລົດຂົນສົ່ງລະຫວ່າງແຂວງ ແລະ ເມືອງ, ແຕ່ສຳລັບຜູ້ທີ່ມີຄວາມຈຳເປັນຕ້ອງເດີນທາງໄປປະຕິບັດຢູ່ສະຖານທີ່ອື່ນ ແມ່ນໃຫ້ຂໍໜັງສືອະນຸມັດການເດີນທາງຈາກຄະນະສະເພາະກິດຂັ້ນເມືອງ, ໃຫ້ແຕ່ລະບ້ານຕັ້ງຈຸດກວດຄົນເຂົ້າ-ອອກບ້ານຂອງຕົນ ພ້ອມຈົດບັນທຶກການເຂົ້າ-ອອກປະຈຳວັນ ແລະ ສຳລັບກຸ່ມບ້ານ, ບ້ານທີ່ມີຊາຍແດນທາງນ້ຳແມ່ນໄດ້ເອົາໃຈໃສ່ຕິດຕາມກວດກາ ແລະ ຄຸ້ມຄອງເຮືອ ໂດຍໃຫ້ທ້ອນໂຮມເຮືອນັບແຕ່ເວລາ 6 ໂມງ ເຖິງ 18 ໂມງ.