ມີເດຍລາວແຂວງຄຳມ່ວນ ວັນທີ 21 ເມສາ 2021 ທ່ານ ບຸນຈັນ ໄຊປັນຍາ ຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນ ພ້ອມ ຄະນະ ໄດ້ລົງຕິດຕາມການເກັບກ່ຽວມ້ຽນມັດຂົ້ານາແຊງຂອງຊາວກະສິກອນຢູ່ເມືອງໜອງບົກ ແລະ ເມືອງເຊບັ້ງໄຟ ໂດຍມີຫົວໜ້າຫ້ອງການກະສິກຳ ແລະ ປ່າໄມ້ ທັງ 02 ເມືອງ ພ້ອມດ້ວຍພະນັກງານວິຊາການທີ່ກ່ຽວຂ້ອງ ຮ່ວມຕິດ ຕາມນໍາ.

ໃນການລົງຕິດຕາມການເກັບກ່ຽວເຂົ້ານາແຊງຄັ້ງນີ້ ບັນດາທ່ານຫົວໜ້າຫ້ອງການກະສິກຳ ແລະ ປ່າໄມ້ ເມືອງໜອງບົກ ແລະ ເຊບັ້ງໄຟ ກໍ່ໄດ້ລາຍງານກ່ຽວກັບ ສະພາບການ ຜະລິດພືດລະດູແລ້ງຢູ່ໃນເມືອງຂອງຕົນ ພ້ອມທັງໄດ້ລົງຕິດຕາມຕົວຈິງ ສະພາບການເກັບກ່ຽວຜົນຜະລິດຂອງຊາວກະສິກອນຢູ່ບັນດາບ້ານຕ່າງໆ ເຊິ່ງເຫັນໄດ້ ວ່າຂະບວນການຜະລິດພືດລະດູແລ້ງຂອງພໍ່ແມ່ປະຊາຊົນໃນປີນີ້ ແມ່ນເປັນຂະບວນຟົດຟື້ນ ສະແດງອອກໃນການ ຜະລິດເຂົ້າ ນາແຊງຂອງເມືອງໜອງບົກ ແມ່ນຈັດຕັ້ງປະຕິບັດໄດ້ 3.961 ເຮັກຕາ. ລື່ນແຜນການ 1.000 ກວ່າເຮັກຕາ (ເນື້ອທີ່ແຜນການ 2.950 ເຮັກຕາ) ແລະ ເມືອງເຊບັ້ງໄຟ ປະຕິບັດໄດ້ 2.700 ເຮັກຕາ. ລື່ນແຜນການຈຳນວນ 300 ກວ່າເຮັກຕາ (ເນື້ອທີ່ແຜນການ 2.400 ເຮັກຕາ).

ໂອກາດດຽວກັນ ທ່ານ ບຸນຈັນ ໄຊປັນຍາ ກໍ່ຍັງໄດ້ລາຍງານກ່ຽວກັບການຜະລິດພືດລະດູແລ້ງ ແລະ ການເກັບ ກ່ຽວເຂົ້ານາແຊງໃນທົ່ວແຂວງຜ່ານສື່ມວນຊົນທ້ອງຖິ່ນວ່າ: ຕາມແຜນຜະລິດເຂົ້ານາແຊງ ສົກປີ 2020-2021 ທົ່ວແຂວງຄຳມ່ວນມີທັງໝົດ 11.332 ເຮັກຕາ, ປະຕິບັດໄດ້ຕົວຈິງ 12.696 ເຮັກຕາ ລື່ນແຜນການ 11% ຫຼື ເທົ່າກັບ 1.364 ເຮັກຕາ. ມາຮອດ ປະຈຸບັນໃນທົ່ວແຂວງສາມາດເກັບກ່ຽວໄດ້ແລ້ວ 20% ໃນນັ້ນເກັບກ່ຽວໄດ້ຫຼາຍກວ່າໝູ່ ແມ່ນເມືອງເຊບັ້ງໄຟ ຍ້ອນວ່າ ເມືອງດັ່ງກ່າວແມ່ນມີລະບົບຊົນລະປະທານທີ່ໄດ້ມາດຕະຖານ ເຮັດໃຫ້ການຜະລິດເຂົ້າ ນາແຊງໄປຕາມລະ ດູການ ເຊິ່ງຄາດວ່າຈະໃຫ້ສຳເລັດການເກັບກ່ຽວທົ່ວແຂວງໃນທ້າຍເດືອນພຶດສະພາ 2021.
ສຳລັບການຫ້າງຫາກະກຽມໃຫ້ແກ່ການຜະລິດເຂົ້ານາປີ ເນື້ອທີ່ຕາມແຜນການໃນທົ່ວແຂວງ 88 ພັນກວ່າ ເຮັກຕາ ເຊິ່ງພະແນກກະສິກຳ ແລະ ປ່າໄມ້ແຂວງ ໄດ້ກະກຽມຂຶ້ນແຜນທາງດ້ານແນວພັນເຂົ້າ ຈຳນວນ 81 ໂຕ່ນ ເພື່ອແຈກຢາຍໃຫ້ບັນດາເມືອງຕ່າງໆ ເຊິ່ງພາຍຫຼັງທີ່ສຳເລັດການເກັບກ່ຽວເຂົ້ານາແຊງແລ້ວ ແມ່ນຈະໄດ້ນຳເອົາ ຜົນຜະລິດເຂົ້ານາແຊງ ໄປຕົກກ້າໃນລະດູການຂອງນາປີ ເພື່ອຄວາມຮັບປະກັນທາງດ້ານເຕັກນິກ ແລະ ເພື່ອຮັບປະກັນ ເຮັດໃຫ້ແນວພັນເຂົ້າມີປະສິດທິພາບສູງ.