ມີເດຍລາວແຂວງຄຳມ່ວນ ຂ່າວ: ກອງຄຳ ໃນລະຫວ່າງວັນທີ 10-12 ມິຖຸນາ 2021 ທ່ານ ໄຊສົມບູນ ສຸວັນດາລາ ຫົວໜ້າພະແນກຖະແຫຼງຂ່າວ, ວັດ ທະນະທຳ ແລະ ທ່ອງທ່ຽວ ແຂວງຄຳມ່ວນ ພ້ອມຄະນະ ໄດ້ລົງເຄື່ອນໄຫວຊຸກຍູ້ວຽກງານຂົງເຂດ ຖວທ ເມືອງຄູນຄຳ ໃນໂອກາດດຽວກັນກໍ່ໄດ້ເຂົ້າພົບປະກັບທ່ານ ແກ້ວວິໄລ ໄຊຍະບຸດ ເຈົ້າເມືອງຄູນຄຳ ເພື່ອລາຍງານຈຸດປະສົງເປົ້າໝາຍ ແລະ ແຜນການເຄື່ອນໄຫວດັ່ງກ່າວໃຫ້ແກ່ທ່ານເຈົ້າເມືອງໄດ້ຮັບຊາບ. ພ້ອມກັນນັ້ນ ທ່ານຫົວໜ້າພະແນກ ຖວທ ແຂວງ ແລະ ທ່ານເຈົ້າເມືອງຄູນຄຳ ກໍ່ໄດ້ຮ່ວມເປັນປະທານໃນກອງປະຊຸມຊຸກຍູ້ ແລະ ປະກາດການແຕ່ງຕັ້ງ ຮອງຫົວໜ້າຫ້ອງການ ຖວທ ເມືອງຄູນຄຳ ໂດຍມີຄະນະຫ້ອງການ ຖວທ ເມືອງ ແລະ ບັນດາຫ້ອງການອ້ອມຂ້າງເຂົ້າຮ່ວມ.

ທ່ານ ນາງ ວັນນະຄານ ໄຊຍະລາດ ຮອງຫົວໜ້າຫ້ອງການ ຖວທ ເມືອງຄູນຄຳ ໄດ້ລາຍງານກ່ຽວກັບການຈັດ ຕັ້ງປະຕິບັດ ວຽກງານໃນໄລຍະຜ່ານມາວ່າ: ເມືອງຄູນຄຳ ມີສະຖານີວິທະຍຸທ້ອງຖິ່ນ 01 ແຫ່ງ ສາມາດອອກອາກາດ ກວມເອົາ 85% ຂອງເນື້ອທີ່ໃນທົ່ວເມືອງ ເຊິ່ງເຮັດໜ້າທີ່ໃນການໂຄສະນາເຜີຍແຜ່ຂໍ້ມູນຂ່າວສານ, ແນວທາງ ນະໂຍບາຍຂອງພັກ, ລະບຽບຽບກົດໝາຍຂອງລັດ ໂດຍສະເພາະແມ່ນການເຜີຍແຜ່ມະຕິກອງປະຊຸມໃຫຍ່ຂອງອົງຄະນະພັກເມືອງຢ່າງເປັນປົກກະຕິ, ດ້ານວຽກງານວັດທະນະທຳ ມາຮອດປະຈຳບັນສາມາດປະກາດເປັນບ້ານວັດທະນະທຳແລ້ວຈຳນວນ 22 ບ້ານ ກວມເອົາ 100% ຂອງຈຳນວນບ້ານທັງໝົດ, ມີຄອບຄົວວັດທະນະທຳທັງໝົດ 4.265 ຄອບຄົວ ເທົ່າກັບ 85% ຂອງຈຳນວນຄອບຄົວທັງໝົດ, ດ້ານວຽກງານການທ່ອງທ່ຽວ ໃນທົ່ວເມືອງມີແຫຼ່ງທ່ອງທ່ຽວທັງໝົດຈຳນວນ 23 ແຫ່ງ ໃນນັ້ນແຫຼ່ງທ່ອງທ່ຽວທາງທຳມະຊາດ 18 ແຫ່ງ, ວັດທະນະທຳ 04 ແຫ່ງ ແລະ ປະຫວັດສາດ 01 ແຫ່ງ ເຊິ່ງແຫຼ່ງທ່ອງທ່ຽວທີ່ມີຊື່ສຽງ ໂດ່ງດັງແມ່ນຖ້ຳກອງລໍ-ນາຕານ ໃນ 05 ເດືອນຜ່ານມາມີນັກທ່ອງທ່ຽວເຂົ້າຊົມຖ້ຳກອງລໍ-ນາຕານ ຈຳນວນ 1.358 ຄົນ ໃນນັ້ນນັກທ່ອງທ່ຽວຕ່າງປະເທດ 65 ຄົນ ເນື່ອງຈາກສະພາບການແຜ່ລະບາດຂອງ ພະຍາດ ໂຄວິດ-19 ຈຶ່ງເຮັດໃຫ້ຈຳນວນນັກທ່ອງທ່ຽວຫຼຸດລົງ. ໃນພິທີດຽວກັນນີ້ຍັງໄດ້ປະກາດການແຕ່ງຕັ້ງ ຮອງຫົວໜ້າຫ້ອງການ ຖວທ ເມືອງຄູນຄຳ ໂດຍການແຕ່ງຕັ້ງທ່ານ ລັດສະໝີ ຈູມໂພຄຳ ຫົວໜ້າໜ່ວຍງານຂໍ້ມູນຂ່າວສານ ຂຶ້ນເປັນຮອງຫົວໜ້າຫ້ອງການ ຖວທ ເມືອງ ທັງນີ້ກໍ່ເພື່ອປັບປຸງການຈັດຕັ້ງໃຫ້ແທດເໝາະກັບຄວາມຮຽກຮ້ອງຕ້ອງການໜ້າທີ່ວຽກງານໃນໄລຍະໃໝ່.

ໃນໂອກາດດຽວກັນ ທ່ານ ໄຊສົມບູນ ສຸວັນດາລາ ກໍ່ໄດ້ມີຄຳເຫັນໂອ້ລົມ ຮຽກຮ້ອງໃຫ້ຄະນະຫ້ອງການ ຖວທ ເມືອງໄດ້ເອົາໃຈໃສາປັບປຸງແບບແຜນວິທີເຮັດວຽກ, ມີການກຳນົດ, ການສ້າງແຜນ ແລະ ແບ່ງຄວາມຮັບຜິດຊອບໃນແຕ່ລະວຽກງານຢ່າງລະອຽດ, ສືບຕໍ່ເອົາໃຈໃສ່ໃນການໂຄສະນາເຜີຍແຜ່ມະຕິກອງປະຊຸມໃຫຍ່ຂອງອົງຄະນະພັກເມືອງຢ່າງຕໍ່ເນື່ອງ, ໂຄສະນາເຜີຍແຜ່ວຽກງານການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ລວມເຖິງການປ້ອງກັນການແຜ່ລະບາດຂອງພະຍາດຕາມລະດູການ ໃຫ້ປະຊາຊົນໄດ້ຮັບຮູ້ຢ່າງກວ້າງຂວາງ, ສືບຕໍ່ປະເມີນຄືນບັນດາບ້ານ ແລະ ຄອບຄົວວັດທະນະທຳທີ່ໄດ້ປະກາດຢັ້ງຢືນໄປແລ້ວນັ້ນ ວ່າຍັງຄົບຕາມມາດຖານເງື່ອນໄຂຫຼືບໍ່

ພ້ອມທັງຊອກຫາວິທີເພື່ອປັບປຸງແກ້ໄຂ, ສືບຕໍ່ຊຸກຍູ້ສົ່ງເສີມທາງດ້ານວິຖີຊີວິດຂອງປະຊາຊົນ ໃຫ້ຕິດພັນກັບການທ່ອງທ່ຽວ ເປັນຕົ້ນແມ່ນ ການສົ່ງເສີມທາງດ້ານສີລະປະວັນນະຄະດີ, ຮີດຄອງປະເພນີ ແລະ ການດຳລົງຊີວິດຂອງທ້ອງຖິ່ນ ເພື່ອສ້າງຄວາມ ສົນໃຈດຶງດູດນັກທ່ອງທ່ຽວ, ເອົາໃຈໃສ່ໃນການຄຸ້ມຄອງ, ຕິດຕາມກວດກາວັດຖຸບູຮານອັນລ້ຳຄ່າທີ່ໄດ້ພົບເຫັນຢູ່ໃນສະຖານທີ່ຕ່າງໆຂອງເມືອງ ເພື່ອອະນຸລັກຮັກສາໄວ້ບໍ່ໃຫ້ຕົກເຮ່ຍເສຍຫາຍ, ສືບຕໍ່ຄຸ້ມຄອງ, ຕິດຕາມກວດກາ ບັນດາຫົວໜ່ວຍທຸລະກິດການທ່ອງທ່ຽວ, ຊຸກຍູ້ສົ່ງເສີມການພັດທະນາການທ່ອງທ່ຽວ ຕິດພັນກັນການປັບປຸງຂອດການບໍລິການ ເພື່ອດຶງດູດນັກທ່ອງທ່ຽວໃຫ້ເຂົ້າມາເມືອງຄູນຄຳຫຼາຍຂຶ້ນ ແນໃສ່ເຮັດໃຫ້ວຽກງານການບໍລິການ ການທ່ອງທ່ຽວ ກັບມາຄຶກຄື້ນພາຍຫຼັງທີ່ສະພາບການແຜ່ລະບາດຂອງພະຍາດ ໂຄວິດ-19 ຈາງຫາຍໄປ. ໃນການລົງເຄື່ອນໄຫວຄັ້ງນີ້ ທ່ານຫົວໜ້າພະແນກ ຖວທ ແຂວງ ພ້ອມດ້ວຍຄະນະ ຍັງໄດ້ຢ້ຽມຢາມສະຖານີວິທະຍຸເມືອງຄູນຄຳ ແລະ ສະຖານທີ່ທ່ອງທ່ຽວແຫ່ງຕ່າງໆພາຍໃນເມືອງ