ມີເດຍລາວແຂວງຄຳມ່ວນ ພາຍໃນບ້ານກອງລໍ ມີ ໂຮງແຮມ 1 ແຫ່ງ, ເຮືອນພັກ 10 ແຫ່ງ, ຮ້ານອາຫານ 4 ແຫ່ງ, ໂຮມສະເຕ 22 ຫຼັງ, ລວມຫ້ອງນອນ 130 ຫ້ອງ, ສາມາດຮອງຮັບນັກທ່ອງໄດ້ຈຳນ່ວນ 100-200 ຄົນຕໍ່ຄືນ ແລະ ມີ 1 ສະມາຄົມພັດທະນາການທ່ອງທ່ຽວອານຸລັກແບບປະຊາຊົນມີສ່ວນຮ່ວມຖ້ຳກອງລໍ-ນາຕານ (ສທກນ) ມີພະນັກງານບໍລິຫານ ແລະ ວິຊາການສະມາຄົມ 17 ຄົນ ແລະ ມີ 8 ກຸ່ມບໍລິການ ພ້ອມດ້ວຍກຸ່ມໜ່ວຍງານອານຸລັກລາດຕາເວນ ແລະ ໜ່ວຍງານ ປກຊ-ປກສ ບ້ານທີ່ເຮັດໜ້າທີ່ໃນການປ້ອງກັນເວນຍາມສະຖານທີ່ແຫຼ່ງທ່ອງທ່ຽວ ເຄື່ອນໄຫວລາດຕະເວນຕາມຂອບເຂດຮັບຜິດຊອບໃນທຸກໆເດືອນ.

ບ້ານ ແລະ ສະມາຄົມ ສທກນ ກໍ່ໄດ້ມີແຜນຍຸດທະສາດ, ວິໃສທັດໃນການພັດທະນາແຫຼ່ງທ່ອງທ່ຽວຖ້ຳກອງລໍ-ນາຕານ ໂດຍໄດ້ຮ່ວມມືກັບອົງການເຕຕັກຕິສຝຣັງ ໃນການຍາດແຫຼ່ງທຶນຊ່ວຍເຫຼືອລ້າຈາກສາກົນ ເຂົ້າມາຊ່ວຍພັດທະນາກິດຈະກຳຂອງການທ່ອງທ່ຽວອານຸລັກແບບປະຊາຊົນມີສ່ວນຮ່ວມຖ້ຳກອງລໍ-ນາຕານ ແລະ ກໍ່ໄດ້ພ້ອມກັນປັບປຸງບັນດາກິດຈະກຳໃຫ້ດີຂຶ້ນ ທັງເປັນການສ້າງວຽກເຮັດງານທຳໃຫ້ແກ່ຊາວໜຸ່ມ, ແມ່ຍີງ ແລະ ປະຊາຊົນພາຍໃນບ້ານ.

ພາຍຫຼັງທີ່ມີການລະບາດຂອງພະຍາດໂຄວິດ-19 ຮອບໃໝ່ໃນ ສປປ ລາວ ກໍ່ເຮັດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດຫຼຸດລົງ ປະຈຸບັນນີ້ການປະຕິບັດວຽກຂອງໂຄງການ ກໍ່ໄດ້ຈັດຕັ້ງປະຕິບັດກິດຈະກຳການຝຶກອົບຮົມທາງດ້ານພາສາອັງກິດໃຫ້ກຸ່ມບໍລິການກອງລໍ-ນາຕານ ສ່ວນກິດຈະກຳອື່ນໆແມ່ນບໍ່ໄດ້ຈັດຕັ້ງປະຕິບັດ.

ໂອກາດດຽວກັນທ່ານຫົວໜ້າພະແນກ ຖວທ ແຂວງ ກໍ່ໄດ້ມີຄຳເຫັນໂອ້ລົມ ເຊິ່ງໄດ້ຮຽກຮ້ອງມາຍັງອຳນາດການປົກຄອງບ້ານ ແລະ ສະມາຄົມ ຈົ່ງໄດ້ມີຄວາມສາມັກຄີເປັນປຶກແຜ່ນ ຊ່ວຍເຫຼືອເຊິ່ງກັນ ແລະ ກັນ, ສືບຕໍ່ພັດທະນາ ແຫຼ່ງທ່ອງທ່ຽວໃຫ້ມີຫຼາກຫຼາຍກິດຈະກຳ ຕິດພັນກັບການຊຸກຍູ້, ສົ່ງເສີມສີລະປະວັນນະຄະດີ, ວັດທະນາທຳ ແລະ ຮີດຄອງປະເພນີຂອງທ້ອງຖິ່ນ ເພື່ອດຶງດູດນັກທ່ອງທ່ຽວ, ຊຸກຍູ້ ແລະ ສົ່ງເສີມຜະລິດຕະພັນທີ່ເປັນພູມປັນຍາຂອງ ຊາວບ້ານ ເພື່ອວາງສະແດງ ແລະ ຈຳໜ່າຍບໍລິການໃຫ້ແກ່ນັກທ່ອງທ່ຽວ ແລະ ສືບຕໍ່ປະສານສົມທົບກັບພາກສ່ວນ ທີ່ກ່ຽວຂ້ອງໃນການສຶກສາ, ສຳຫຼວດ ແລະ ວາງແຜນເພື່ອພັດທະນາແຫຼ່ງທ່ອງທ່ຽວທີ່ຄົ້ນພົບໃໝ່ ໂດຍສະເພາະແມ່ນ ການສ້າງສິ່ງອຳນວຍຄວາມສະດວກຕ່າງໆ ເພື່ອຮອງຮັບໃຫ້ແກ່ນັກທ່ອງທ່ຽວພາຍຫຼັງທີ່ເປີດໃຫ້ເປີດບໍລິການ.