ມີເດຍລາວແຂວງເຊກອງ (ຂ່າວ-ພາບ: ປກສ ແຂວງ) * ໃນວັນທີ 24-25 ພຶດສະພາ 2021 ນີ້, ທ່ານ ພົນຈັດຕະວາ ສົມໄຊ ພູລະຄຳມະນີ ກໍາມະການປະຈຳພັກແຂວງ, ຫົວໜ້າກອງບັນຊາການ ປກສ ແຂວງເຊກອງ ພ້ອມດ້ວຍຄະນະ ລົງຢ້ຽມຢາມ ແລະໃຫ້ກໍາລັງພະນັກງານທີ່ປະຈໍາການຢູ່ຈຸດກວດຄັດກອງຄົນເຂົ້າ-ອອກແຂວງ ເພື່ອປ້ອງກັນພະຍາດໂຄວິດ-19 ຢູ່ 4 ຈຸດຂອງເມືອງທ່າແຕງຄື: ຈຸດບ້ານຫຼັກຂາວ, ຈຸດບ້ານກົກຟຸງ, ຈຸດບ້ານຕູ້ມຍອງ ແລະຈຸດບ້ານຕະກຽວ.

ໃນລົງແຕ່ລະຈຸດທ່ານຫົວໜ້າກອງບັນຊາການ ປກສ ແຂວງ ແລະຄະນະກໍໄດ້ຮັບຟັງການລາຍງານຫຍໍ້ສະພາບການປະຕິບັດໜ້າທີ່ຂອງພະນັກງານ ໂດຍສະເພາະຂໍ້ສະດວກ, ຂໍ້ຫຍຸ້ງຍາກ ແລະບັນດາຂໍ້ສະເໜີຕ່າງໆຕໍ່ການຈັດຕັ້ງຂັ້ນເທິງ; ຫຼັງຈາກນັ້ນ ທ່ານ ພົນຈັດຕະວາ ສົມໄຊ ພູລະຄໍາມະນີ ກໍໄດ້ມີຄໍາເຫັນໂອ້ລົມ ແລະຊີ້ນໍາ ຊຶ່ງກ່ອນອື່ນທ່ານສະແດງຄວາມຍ້ອງຍໍຊົມເຊີຍຕໍ່ພະນັກງານທີ່ເອົາໃຈໃສ່ປະຕິບັດໜ້າທີ່ວຽກງານທີ່ໄດ້ຮັບມອບໝາຍດ້ວຍຄວາມຮັບຜິດຊອບສູງ ແລະມີຜົນສໍາເລັດ.

ແນວໃດກໍຕາມ ເພື່ອສືບຕໍ່ປະຕິບັດບັນດາມາດຕະການຕ່າງໆຈໍານວນໜຶ່ງຢ່າງເຂັ້ມງວດຕໍ່ການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ບໍ່ໃຫ້ມີການລະບາດພາຍໃນແຂວງເຊກອງພວກເຮົາ, ສະນັ້ນ ຈຶ່ງຂໍຮຽກຮ້ອງມາຍັງພະນັກງານ-ນັກຮົບສອງກໍາລັງປະກອບອາວຸດ ໂດຍສະເພາະກໍາລັງ ປກສ ທຸກຂັ້ນສືບຕໍ່ປະຕິບັດຄໍາສັ່ງເລກທີ 15/ນຍ, ຄໍາສັ່ງຂອງທ່ານເຈົ້າແຂວງ ແລະແຈ້ງການຕ່າງໆ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະຕ້ານພະຍາດໂຄວິດ -19 ຢ່າງເຂັ້ມງວດ ໂດຍສະເພາະແມ່ນສະກັດກັ້ນບໍ່ໃຫ້ພໍ່ແມ່ປະຊາຊົນ, ພໍ່ຄ້າ-ຊາວຂາຍ ເຄື່ອນໄຫວໄປມາຕາມລຳພັງໃຈ, ຖ້າມີຄວາມຈຳເປັນຕ້ອງລາຍງານຜ່ານຄະນະສະເພາະກິດຂັ້ນແຂວງ ແລະຂະແໜງການກ່ຽວຂ້ອງຮັບຊາບໂດຍໄວ.