ມີເດຍລາວແຂວງຈຳປາສັກ ຂ່າວ: ທັດຊະນະ ວັນທີ 13 ພຶດສະພາ 2021, ທີ່ຫ້ອງວ່າການແຂວງຈຳປາສັກ ໄດ້ມີພິທີມອບ-ຮັບການຊ່ວຍເຫລືອ ໃຫ້ແຂວງຈໍາປາສັກ ເພື່ອຮັບໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ສະກັດກັ້ນການລະບາດ ພະຍາດໂຄວິດ-19 ຈາກ ຫຼາຍ ພາກສ່ວນ ຄື: ທະນາຄານຮ່ວມພັດທະນາ (JDB) ມອບເງິນ 100.000.000 ກີບ, ຕາງໜ້າ ກ່າວມອບໂດຍ ທ່ານ ອານັນ ມີມາລາ ຫົວໜ້າ ໜ່ວຍບໍລິການປາກເຊ (JDB); ບໍລິສັດ ໂຕໂຢຕ້າລາວ ຈຳກັດ ມອບເງິນ 100.000.000 ກີບ,

ຕາງໜ້າ ກ່າວມອບໂດຍ ທ່ານ ບຸນຫລາຍ ແກ້ວບຸນທັນ ຫົວໜ້າບໍລິຫານ ແລະຈັດການສາງລົດ ບໍລິສັດ ໂຕໂຢຕ້າລາວ ຈຳກັດ ປະຈຳສາງປາກເຊ ແລະ ກຸ່ມ ບໍລິສັດ ໄຊຊະນະ ຈຳກັດຜູ້ດຽວ ມອບເງິນ ເບື້ອງຕົ້ນ 30.000.000 ກີບ, ກ່າວມອບໂດຍ ທ່ານ ໄຊຊະນະ ວິຊາເທບ ປະທານ ກຸ່ມ ບໍລິສັດ ໄຊຊະນະ ຈຳກັດຜູ້ດຽວ. ເປັນກຽດກ່າວຮັບ ໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະ, ມີ ຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ-19 ແຂວງຈໍາປາສັກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດດັ່ງກ່າວ, ທ່ານເຈົ້າແຂວງຈຳປາສັກ ກໍໄດ້ສະແດງຄວາມຂອບໃຈ ແລະ ຊົມເຊີຍ ມາຍັງ ທຸກພາກສ່ວນ ທີ່ໄດ້ໃຫ້ການສະໜັບສະໜູນ ປະກອບສ່ວນເຂົ້າໃນການຈັດຕັ້ງປະຕິບັດວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ແຂວງຈໍາປາສັກ. ພ້ອມນີ້, ທ່ານເຈົ້າແຂວງຈຳປາສັກ ໄດ້ແຈ້ງໃຫ້ຮູ້ເຖິງສະພາບລວມຂອງການລະບາດໂຄວິດ-19 ຢູ່ແຂວງຈໍາປາສັກ ມີທ່າອຽງດີຂຶ້ນ, ໂຕເລກຜູ້ຕິດເຊື້ອແມ່ນຫລຸດຜ່ອນລົງ, ລວມຍອດຜູ້ຕິດເຊື້ອສະສົມທີ່ໄດ້ຮັບການປິ່ນປົວຢູ່ແຂວງຈໍາປາສັກ ມີທັງໝົດ 209 ຄົນ, ປິ່ນປົວດີ 21 ຄົນ ຍັງສືບຕໍ່ປິ່ນປົວ 188 ຄົນ. ແຮງງານທີ່ກັບມາຈາກຕ່າງປະເທດ ກວດພົບເຊື້ອ 92 ຄົນ ແລະ ຕິດເຊື້ອໃນຊຸມຊົນ 117 ຄົນ.