ມີເດຍລາວແຂວງຈຳປາສັກ ຂ່າວ: ທັດຊະນະ ວັນທີ 21 ພຶດສະພາ 2021, ທີ່ຫ້ອງວ່າການແຂວງຈຳປາສັກ ໄດ້ມີ ພິທີຮອບ-ຮັບ ການປະກອບສ່ວນ ຊ່ວຍເຫຼືອເຂົ້າໃນວຽກງານຕ້ານ ແລະ ສະກັດກັ້ນການລະບາດ ພະຍາດໂຄວິດ-19 ຢູ່ ແຂວງຈໍາປາສັກ ໂດຍມີ ຂົງເຂດຂະແໜງການໂຍທາທິການ ແລະຂົນສົ່ງ ແຂວງຈຳປາສັກ 18 ພາກສ່ວນ ເປັນຕົ້ນ ບໍລິສັດ ສົມໄຊຈະເລີນກໍ່ສ້າງ-ສ້ອມແປງຂົວທາງ ຈຳກັດ, ສະມາຄົມຂົນສົ່ງ ແລະບໍລິສັດຂົນສົ່ງ ໂດຍສານ ແຂວງຈຳປາສັກ ແລະ ບັນດາຫົວໜ່ວຍທຸລະກິດ ໃນຂົງເຂດຂະແໜງການດັ່ງກ່າວ ໄດ້ມອບເງິນສົດ ແລະອຸປະກອນການແພດ ລວມມູນຄ່າທັງໝົດ 46 ລ້ານກວ່າກີບ.

ຕາງໜ້າກ່າວມອບ ໂດຍ ທ່ານ ຈັນທະວີສຸກ ວັນສີລິ ຫົວໜ້າພະແນກ ໂຍທາທິການ ແລະຂົນສົ່ງ ແຂວງຈຳປາສັກ. ພ້ອມນີ້, ຂົງເຂດຂະແໜງການ ເຕັກໂນໂລຊີ ແລະການສື່ສານ ແຂວງຈຳປາສັກ ມີ ບໍລິສັດ ມີໄຊ ຈັດສົ່ງດ່ວນ ແອນ ລາວເນັດເວີກ ຈຳກັດຜູ້ດຽວ ມອບຊຸດ PPE ຈຳນວນ 200 ຊຸດ ມູນຄ່າ 10 ກີບ ຕາງໜ້າກ່າວມອບຄັ້ງນີ້ ໂດຍ ທ່ານ ວິໄລ ແກ້ວມະນີໄລ ຫົວໜ້າພະແນກ ເຕັກໂນໂລຊີ ແລະການສື່ສານ ແຂວງຈຳປາສັກ ພ້ອມດ້ວຍ ຜູ້ຕາງໜ້າໃຫ້ບໍລິສັດດັ່ງກ່າວ. ເປັນກຽດກ່າວຮັບ ຂອງ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ຜູ້ຊີ້ນຳຄະນະກຳມະການຜັນຂະຫຍາຍນະໂຍບາຍ, ມາດຕະການ ເພື່ອຫລຸດຜ່ອນຜົນກະທົບທາງດ້ານເສດຖະກິດ ແລະ ລະດົມການປະກອບສ່ວນຈາກສັງຄົມ, ມີ ຄະນະສະເພາະກິດສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງຈໍາປາສັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ຮອງເຈົ້າແຂວງຈຳປາສັກ, ໄດ້ສະແດງຄວາມຂອບໃຈ ແລະ ຮູ້ບຸນຄຸນ ມາຍັງຜູ້ປະກອບການທຸກພາກສ່ວນ ທີ່ໄດ້ໃຫ້ ການສະໜັບສະໜູນ ປະກອບສ່ວນເຂົ້າໃນການຈັດຕັ້ງປະຕິບັດວຽກງານປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ແຂວງຈໍາປາສັກ. ພ້ອມກັນນັ້ນ ກໍໄດ້ ຊົມເຊີຍມາຍັງ ຂະແໜງການທີ່ກ່ຽວຂ້ອງ ທຸກພາກສ່ວນ ທີ່ ເອົາໃຈໃສ່ ເຮັດໜ້າທີ່ໃນການລະດົມການປະກອບສ່ວນ ຈາກສັງຄົມ, ເປັນການ ຫລຸດຜ່ອນຜົນກະທົບທາງດ້ານເສດຖະກິດ ໂດຍລວມຂອງ ແຂວງຈຳປາສັກ ອີກດ້ວຍ.