ມີເດຍລາວແຂວງຄຳມ່ວນ ວັນທີ 17 ພຶດສະພາ 2021 ກຸ່ມບໍລິສັດ ພົງຊັບທະວີ ຈຳກັດຜູ້ດຽວ ໄດ້ນຳເຄື່ອງອຸປະກອນປ້ອງກັນພະຍາດ ໂຄວິດ-19 ເຊັ່ນ: ຜ້າປິດປາກ ຈຳນວນ 10 ແກັດ, ເຈວລ້າງມື 400 ກ່ອງ ລວມມູນຄ່າ 60 ລ້ານກີບ ພ້ອມດ້ວນເງິນສົດ ຈຳນວນ 50 ລ້ານກີບ ລວມເປັນມູນຄ່າທັງໝົດ 110 ລ້ານກີບ ມາມອບໃຫ້ແກ່ແຂວງຄຳມ່ວນ ເພື່ອນຳໃຊ້ເຂົ້າໃນ ວຽກງານຄວບຄຸມ, ປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ແຂວງຄຳມ່ວນ

ເຊິ່ງຕາງໜ້າ ບໍລິສັດມອບໂດຍທ່ານ ຄຳພູວົງ ຫອມມະນີ ແລະ ກ່າວຮັບໂດຍທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ທັງເປັນຫົວໜ້າຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຂັ້ນແຂວງ ແລະ ໃນຕອນບ່າຍຂອງວັນດຽວກັນ ບໍລິສັດ ຄຳມ່ວນ ຊີມັງ ຈຳກັດ ກໍ່ໄດ້ມອບຫ້ອງຄວາມດັນອາກາດບວກ ຫຼື ຫ້ອງເກັບຕົວຢ່າງຊອກຫາເຊື້ອພະຍາດ ໂຄວິດ-19 ລວມມູນຄ່າ 33 ລ້ານກີບ ເຊິ່ງມອບໂດຍທ່ານ ອານຸຊາ ອິນທະລາບຸດ ຜູ້ຈັດການບໍລິສັດ ຄຳມ່ວນຊີມັງ ຈຳກັດ ແລະ ກ່າວຮັບໂດຍທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ.

ໃນໂອກາດດຽວກັນ ທ່ານຫົວໜ້າຄະນະສະເພາະກິດຂັ້ນແຂວງ ພ້ອມດ້ວຍຄະນະ ກໍ່ໄດ້ລົງເຄື່ອນໄຫວຕິດຕາມ, ກວດກາຫ້ອງເກັບຮັກສາວັກຊີນ ແລະ ຕຶກທີ່ກຳນົດເປັນບ່ອນປິ່ນປົວແຍກປ່ຽວ ໃນກໍລະນີມີຜູ້ຕິດເຊື້ອຂອງແຂວງຄຳມ່ວນຕື່ມອີກ. ມາຮອດປະຈຸບັນແຂວງຄຳມ່ວນໄດ້ຮັບວັກຊີນຈາກສູນກາງແລ້ວ ຈຳນວນ 71.600 ໂດສ. ໃນນັ້ນວັກຊີນຊີໂນຟາມຈຳນວນ 65.600 ໂດສ ແລະ ວັກຊີນ ອັສຕາເຊັນນີກາ ຈຳນວນ 6.000 ໂດສ. ໃນນັ້ນແມ່ນໄດ້ໃຫ້ບໍລິການສັກວັກຊີນເຂັມທີ 01 ໃຫ້ແກ່ພະນັກງານ, ທະຫານ, ຕໍາຫຼວດ ແລະ ພໍ່ແມ່ປະຊາຊົນໄດ້ແລ້ວ 17.559 ຄົນ ກວມເອົາ 4,73% ແລະ ເຂັມທີ 02 ສັກໄດ້ 5.420 ຄົນ ກວມເອົາ 1,23% ຂອງປະຊາກອນໃນທົ່ວແຂວງ (ປະຊາກອນ 439.633 ຄົນ)