ມີເດຍລາວແຂວງລວງພະບາງ ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ
ວັນທີ 9 ມິຖຸນາ 2021 ນີ້ຫ້ອງການສາທາລະນະສຸກເມືອງໂພນທອງ ໄດ້ຈັດກອງປະຊຸມການຈັດຕັ້ງປະຕິບັດວຽກງານຮອບດ້ານ ໃນໄລຍະ 6 ເດືອນຕົນປີ ແລະວາງທິດທາງແຜນການ 6 ເດືອນທ້າຍປີ 2021ລວມທັງວຽກງານຕິດຕາມກວດກາ ການແຜ່ລະບາດຂອງພະຍາດໂຄວິດ 19 ມີ ດຣ ຄຳສອນ ພົງສະຫວັດດີ ຫົວໜ້າພະແນກສາທາລະນະສຸກແຂວງ ຮອງຫົວໜ້າຄະນະສະກິດຂັ້ນແຂວງ, ທ່ານ ທອງດີ ດວງພະຈັນ ຮອງເລຂາພັກເມືອງ ຫົວໜ້າຄະນະສະເພາະກິດຂັ້ນເມືອງ, ພ້ອມດ້ວຍຄະນະສະເພາະກິດຂອງແຂວງ,ຕະຫຼອດຮອດ ຄະນະສະເພາະກິດຂອງເມືອງ ເຂົ້າຮ່ວມ.

ໂອກາດນີ້ ທ່ານ ສຽງຕອນ ຈະເລີນໄຊ ຮອງຫົວໜ້າຄະນະສະເພາະຂັ້ນເມືອງ ໄດ້ຜ່ານບົດສະຫຼຸບວຽກງານຮອບດ້ານ ໃນໄລຍະ 6 ເດືອນຕົນປີ 2020 ແລະທິດທາງແຜນການ 6 ເດືອນທ້າຍປີ 2021 ທ່ານກ່າວວ່າ: ໄລຍະຜ່ານມາຄະນະພັກ-ຄະນະນຳຫ້ອງການສາທາລະນະເມືອງ ໄດ້ເອົາໃຈໃສ່ໃນການຊຸກຍູ້ພະນັກງານ ສຸມໃສ່ປະຕິບັດວຽກງານວິຊາສະເພາະດ້ວຍຄວາມຮັບຜິດຊອບສູງ ໂດຍຖືເອົາວຽກງານປ້ອງກັນພະຍາດ ແລະສົ່ງເສີມສຸຂະພາບເປັນຕົ້ນຕໍ ວຽກງານປິ່ນປົວ ຟື້ນຝູໜ້າທີການ ເປັນສຳຄັນ ຕິດພັນກັບວຽກງານສຸຂະສຶກສາ ໃຫ້ແກ່ຊຸມຊົນ ເຮັດໃຫ້ປະຊາຊົນບັນດາເຜົ່າ ມີຄວາມຮັບຮູ້ເຂົ້າໃຈ ແລະມີຄວາມຕື່ນຕົວ ປ່ຽນພຶດຕີກຳໃນການດຳລົງຊີວິດ ໃຫ້ຖືກຕ້ອງຕາມຫຼັກການຮັກສາສຸຂະພາບ ຢ່າງກ້ວາງຂວາງ ແລະເອົາໃຈໃສ່ຢ່າງຕັ້ງໜ້າ ປະຕິບັດ 8 ແຜນການ 11 ຕົວຊີ້ວັດ ດ້ານສາທາລະນະສຸກ ທີ່ສະພາຮັບຮອງ,

ຈາກນັ້ນ ຄະນະສະເພາະກິດຂັ້ນເມືອງ ໄດ້ລາຍງານໃຫ້ສະພາບການປ້ອງກັນ ຄວບຄຸມ ແລະແກ້ໄຂ ການແຜ່ລະບາດຂອງພະຍາດໂຄວິດ 19 ຢູ່ ເມືອງໂພນທອງ ໂດຍລວມຍັງພົບເຫັນມີຜູ້ລັກລັກລອບມາຈາກຕ່າງປະເທດ ແລະແຂວງ ທີ່ມີການລະບາດ ພະຍາດໂຄວິດ 19 ຢ່າງຕໍ່ເນື່ອງຊື່ງມີຄວາມສ່ຽງສູງ ທີ່ຈະນຳເອົາເຊື້ອພະຍາດມາແຜ່ລະບາດໃນຊຸມຊົນ, ແຕ່ຄະນະສະເພາະກິດຂັ້ນເມືອງ ໄດ້ຈັດຕັ້ງເຄືອນໄຫວວຽກງານ ດ້ວຍຄວາມຮັບຜຜິດຊອບສູງ ເລີມຈາກການຜັນຂະຫຍາຍ ຄຳສັ່ງຂອງທ່ານນາຍົກລັດ໗ະມົນຕີ ເລກທີ 15, ຄຳສັ່ງ ເລກທີ່ 01 ຂອງທ່ານເຈົ້າແຂວງ, ລວມທັງແຈ້ງການຂອງຄະນະສະເພາະກິດຂັ້ນແຂວງ-ເມືອງ ເປັນແຕ່ລະໄລຍະ, ທັງໄດ້ເພີ່ມທະວີ ການຕິດຕາມ-ກວດກາ ຄົນເຂົ້າ-ອອກເມືອງ ຢ່າງເປັນປົກກະຕິ, ຕອນທ້າຍ ຮອງຫົວໜ້າຄະນະສະເພາະກິດຂັ້ນແຂວງ ໄດ້ມີຄຳເຫັນຊີ້ນຳໃຫ້ຄະນະສະເພາະກິດຂັ້ນເມືອງ ສືບຕໍ່ປະຕິບັດວຽກງານດ້ວຍຄວາມເປັນເຈົ້າການ ເພື່ອເຮັດໃຫ້ເມືອງໂພນທອງ ມີຄວາມປອດໄພຈາກພະຍາດໂຄວິດ 19.