ໃນຕອນບ່າຍວັນທີ 23 ມີນາ 2021ນີ້ ຫ້ອງການ-ການເງິນເມືອງສຸຂຸມາ ໄດ້ຈັດກອງປະຊຸມສະຫຼຸບວຽກງານປະຈຳປີ 2020 ແລະ ວາງທິດທາງແຜນການສົກປີ2021 ຢູ່ທີ່ສະໂມ ສອນນ້ອຍຂອງເມືອງ ໂດຍການໃຫ້ກຽດເຂົ້າຮ່ວມເປັນປະທານ ຂອງທ່ານ ສົມເພັດ ບຸດສະດີ ເລຂາພັກເມືອງ ເຈົ້າເມືອງໆສຸຂຸມາ, ທ່ານ ສະນັ່ນ ສີດາວົງ ກຳມະການພັກເມືອງ ຫົວໜ້າຫ້ອງການ-ການເງິນເມືອງ, ມີທ່ານວັນທອງ ແກ້ວມະນີວົງ ຮອງຫົວໜ້າພະແນກການເງິນແຂວງ, ທ່ານ ນາງ ສຸວັນ ພັນທະນາໄລ ຫົວໜ້າສ່ວຍສາອາກອນແຂວງ,ກຳມະການພັກເມືອງ,ຫົວໜ້າ-ຮອງຫົວໜ້າຫ້ອງການພ້ອມດ້ວຍພະນັກງານວິຊາການກ່ຽວຂ້ອງເຂົ້າຮ່ວມ.


ໃນພິທີ ທ່ານ ສະນັ່ນ ສີດາວົງ ກຳມະການພັກເມືອງ ຫົວໜ້າຫ້ອງການໆ ເງິນເມືອງ ກໍ່ໄດ້ຜ່ານການການຈັດຕັ້ງປະຕິບັດວຽກງານປີ 2020 ແລະ ວາງທິດທາງແຜນການ ປີ 2021ເຊີ່ງໃຫ້ຮູ້ວ່າ: ການຈັດເກັບລາຍຮັບເຂົ້າງົບປະມານປີ 2020, ແຜນລາຍຮັບປີ 2020 ທົ່ວເມືອງມີ: 10,185 ລ້ານກີບ, ປະຕິບັດໄດ້ 10,208 ລ້ານກີບ ເທົ່າກັບ 100.22% ຂອງແຜນປີ ແລະ ເມືອງຫາໄດ້ໃນນັ້ນ: ສ່ວຍສາອາກອນແຜນ 3,487 ລ້ານກີບ, ປະຕິບັດໄດ້ 2,964 ລ້ານກີບ, ທຽບເທົ່າ 85.01% ທຽບໃສ່ແຜນການປີ, ແຜນລາຍຮັບຈາກຊັບສິນ 258.5 ລ້ານກີບ, ປະຕິບັດໄດ້ 285.8 ລ້ານກີບ, ທຽບເທົ່າ 110.57%, ແຜນລາຍຮັບດຸ່ນດ່ຽງຈາກແຂວງ 6,440 ລ້ານກີບ ປະຕິບັດໄດ້ 6,958 ລ້ານກີບ, ທຽບເທົ່າ 108.04% ທຽບໃສ່ແຜນການປີ.

ພ້ອມນັ້ນກໍ່ໄດ້ຜ່ານບົດສະຫຼຸບການເດີນສຳຫຼວດຂໍ້ມູນລາຍຮັບຫົວໜ່ວຍທຸລະກິດ, ເກັບກຳຂໍ້ມູນພາຫະນະ ແລະ ເກັບກຳຂໍ້ມູນຕອນດິນທົ່ວເມືອງສຸຂຸມາປີ 2020 ໂດຍທ່ານ ສູນທອນ ສີສະຫັວດ ຫົວໜ້າໜ່ວຍງານສ່ວຍສາອາກອນເມືອງໃຫ້ຮູ້ວ່າ: ຜົນການສຳຫຼວດຫົວໜ່ວຍທຸລະກິດທົ່ວເມືອງມີ 903 ຫົວໜ່ວຍ ໃນນັ້ນຫົວໜ່ວຍທຸລະກິດບໍ່ເກີນ 50 ລ້ານກີບ/ປີ 569 ຫົວໜ່ວຍ, ຫົວໜ່ວຍທຸລະກິດ 50 ລ້ານກີບຂື້ນຫາ 400 ລ້ານກີບ/ປີມີ: 331 ຫົວໜ່ວຍ, ຫົວໜ່ວຍທຸລະກິດ 400 ກີບຂື້ນໄປ ມີ: 3ຫົວໜ່ວຍ, ຫົວໜ່ວຍພາຫະນະທົ່ວເມືອງມີ 407 ຄັນ, ຕອນດິນທົ່ວເມືອງມີ: 17,629 ຕອນດິນ, ເນື້ອທີ່ 7,912,533 ຕາແມັດ 23,044.18 ເຮັກຕາ, ຕອນທ້າຍພິທີກໍ່ໄດ້ມອບໃບຍ້ອງຍໍໃຫ້ຫ້ອງການຈັດເກັບລາຍຮັບວິຊາການທີ່ປະຕິບັດໄດ້ລື່ນແຜນປີ 2020 ຈຳນວນ 6 ຫ້ອງການ ໂດຍການກ່າວມອບຂອງທ່ານ ສົມເພັດ ບຸດສະດີ ເລຂາພັກເມືອງ ເຈົ້າເມືອງໆ ສຸຂຸມາ.
ພາບ-ຂ່າວ: ປັນຍາ ແກ້ວພິລົມ