ມີເດຍລາວແຂວງເຊກອງ ຂ່າວ: ບູ້ສຸວັນ
ວັນທີ 17 ມີນາ 2021 ອົງການໄອຍະການ (ອຍກ) ແຂວງເຊກອງໄດ້ຈັດພິທີປະ ກາດພະນັກງານເຂົ້າຮັບອຸດໜູນບໍານານ ໂດຍພາຍໃຕ້ການເປັນປະທານຂອງທ່ານ ຄໍາບາງ ພະສະແຫວງ ກໍາມະການພັກແຂວງ, ເລຂາໜ່ວຍພັກ, ຫົວໜ້າອົງການໄອຍະການແຂວງ; ພ້ອມນີ້ ກໍມີຂະແໜງການກ່ຽວຂ້ອງອ້ອມຂ້າງແຂວງ, ພະ ນັກງານນໍາພາຫຼັກແຫຼ່ງ ແລະວິຊາການເຂົ້າຮ່ວມ.

ໃນພິທີທ່ານ ແສງມະນີ ຕອງບົວເກືອມ ຫົວໜ້າຫ້ອງການບໍລິຫານ ອົງການໄອຍະການແຂວງເຊກອງໄດ້ຂຶ້ນຜ່ານຂໍ້ຕົກລົງຂອງທ່ານຫົວໜ້າອົງການໄອຍະການປະຊາຊົນສູງສຸດສະບັບເລກທີ 597/ອອປສ, ລົງວັນທີ 9 ທັນວາ 2020 ວ່າດ້ວຍການອະນຸມັດໃຫ້ພະນັກງານ-ລັດຖະກອນອອກພັກການ-ຮັບອຸດໜູນບໍານານ ໂດຍເຫັນດີອະນຸມັດໃຫ້ທ່ານ ໄພສອນ ທໍາເສືອເຫຼືອງ ວັນເດືອນປີເກີດ: 1 ກຸມພາ 1960, ອາຍຸກະສຽນ 61 ປີ, ວັນເດືອນປີເຂົ້າການປະຕິວັດ ແລະເຂົ້າສັງກັດລັດ: 1 ມັງກອນ 1977 ລວມອາຍຸການໄດ້ 44 ປີ ອອກພັກການຮັບອຸດໜູນບໍານານນັບແຕ່ວັນທີ 1 ເມສາ 2021 ເປັນຕົ້ນໄປ.

ຫຼັງຈາກນັ້ນ ກໍໄດ້ຜ່ານຂໍ້ຕົກລົງຂອງຫົວໜ້າອົງການໄອຍະການແຂວງ ສະບັບເລກທີ 72/ອກຍ. ຊກ, ລົງວັນທີ 15 ມີນາ 2021 ວ່າດ້ວຍຕົກລົງມອບໃບຢັ້ງຢືນສິ້ນສຸດການຝຶກງານຂອງນັກສຶກສາຈາກສະຖາບັນຍຸຕິທໍາພາກໃຕ້ ແລະສະຖາບັນຍຸຕິທໍາແຫ່ງຊາດຈໍານວນ 5 ຄົນ, ຍິງ 4 ຄົນ.
ຕອນທ້າຍຂອງພິທີທ່ານ ຄໍາບາງ ພະສະແຫວງ ກໍໄດ້ມີຄໍາເຫັນໂອ້ລົມ ຊຶ່ງທ່ານໄດ້ຍ້ອງຍໍຊົມເຊີຍຕໍ່ຜົນງານການເຄື່ອນໄຫວວຽກງານຂອງພະນັກງານຜູ້ທີ່ອອກພັກການຮັບອຸດໜູນບໍານານທີ່ໄດ້ເຮັດໜ້າທີ່ການເມືອງຂອງຕົນຕາມການມອບໝາຍຂອງພັກ-ລັດຈົນສຸດກົກສຸດປາຍ ແລະສາມາດຍາດໄດ້ຜົນສໍາເລັດຫຼາຍດ້ານໃນໄລຍະຜ່ານມາ ແລະຍ້ອງຍໍຊົມເຊີຍຕໍ່ຜົນສໍາເລັດຂອງນັກສຶກສາຝຶກງານຈໍານວນ 5 ຄົນ ທີ່ສູ້ຊົນຜ່ານຜ່າອຸປະສັກຕ່າງໆຈົນສາມາດຍາດໄດ້ຜົນສໍາເລັດ ແລະເຊື່ອແນວ່າ ພາຍຫຼັງທີ່ສໍາເລັດການສຶກສາຮໍ່າຮຽນແລ້ວ ບັນດາທ່ານຈະໄດ້ນໍາໃຊ້ບົດຮຽນທີ່ຮຽນມາປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດຂອງເຮົາໃຫ້ຈະເລີນກ້າວໜ້າຂຶ້ນເລື້ອຍໆ.