ມີເດຍລາວແຂວງໄຊສົມບູນ ຂ່າວ: ພຸດທະສອນ ເວດສະວົງ
ທ່ານ ບົວສອນ ບຸບຜາວັນ ອາດີດກົມການເມືອງສູນກາງພັກ, ອະດີດນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ທ່ານ ວຽງສະຫວັດ ສີພັນດອນ ກຳມະການສູນກາງພັກ, ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນ ໃນທີ 16 ມີນາ ນີ້ ທີ່ຫ້ອງປະຊຸມກອງບັນຊາການທະຫານ ແຂວງ ໂດຍການຕ້ອນຮັບຂອງທ່ານ ແດງ ປະທຸມທອງ ຮອງເລຂາພັກ ແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ, ພະແນກການ, ອົງການ, ກົມກອງ ອ້ອມຂ້າງແຂວງ ພ້ອມດ້ວຍ ທິມງານຈາກສູນກາງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ໂອກາດນີ້ ທ່ານ ບົວສອນ ບຸບຜາວັນ ແລະ ທ່ານ ວຽງສະຫວັດ ສີພັນດອນ ໄດ້ຜັດປ່ຽນກັນມີຄຳເຫັນໂອ້ລົມ ຊຶ່ງທັງສອງທ່ານ ໄດ້ສະແດງຄວາມເປັນຫ່ວງເປັນໄຍຕໍ່ການສ້າງສາພັດທະນາ ແຂວງໄຊສົມບູນ ພ້ອມນີ້ ຍັງໄດ້ປຸກລະດົມ ແລະ ໃຫ້ກຳລັງໃຈໃຫ້ແກ່ຄະນະພັກ, ອົງການປົກຄອງແຂວງ, ພະນັກງານ-ລັດຖະກອນ, ທະຫານ-ຕຳຫລວດ ຕະຫລອດຮອດພໍ່ແມ່ປະຊາຊົນລາວບັນດາເຜົ່າ ໃນການປະກອບສ່ວນຢ່າງຕັ້ງໜ້າໃນການປະຕິບັດໜ້າທີ່ວິຊາສະເພາະ ຕາມໜ້າທີ່ການເມືອງຂອງຕົນ ຢ່າງສຸດຄວາມສາມາດ ເພື່ອພັດທະນາເສດຖະກິດ-ສັງຄົມຂອງແຂວງ ໃຫ້ໄປຕາມແນວທາງນະໂຍບາຍຂອງພັກ ກໍຄືແຜນພັດທະນາຂອງລັດວາງອອກໃນແຕ່ລະໄລຍະ ເພື່ອເຮັດໃຫ້ແຂວງໄຊສົມບູນ ໃຫ້ໄດ້ການພັດທະນາ ແລະ ມີຄວາມຈະເລີນທຽບທັນກັບບັນດາແຂວງໃນທົ່ວປະເທດ.

ໃນໂອກາດທີ່ໄດ້ລົງຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນ ທ່ານ ບົວສອນ ບຸບຜາວັນ ແລະ ວຽງສະຫວັດ ສີພັນດອນ ໃນຄັ້ງນີ້ ຍັງໄດ້ນຳເອົາເຄື່ອງມາມອບໃຫ້ແກ່ກອງບັນຊາການທະຫານແຂວງ ແລະ ກອງບັນຊາການ ປກສ ແຂວງໄຊສົມບູນ ຕື່ມອີກ ເຄື່ອງທີ່ນຳມາມອບໃນຄັ້ງນີ້ ປະກອບມີ: ຄອມພິວເຕີ 6 ຊຸດ, ປິ່ນເຕີ 2 ເຄື່ອງ, ປຶ້ມຂຽນ, ບິກ, ຜ້າຫົ່ມ, ບານເຕະ, ເຈວລ້າງມື ແລະ ຜ້າປິກປາກ ລວມມູນຄ່າທັງໝົດ 100 ລ້ານກວ່າກີບ ຊຶ່ງເຄື່ອງຈຳນວນດັ່ງກ່າວແມ່ນໄດ້ຮັບທຶນສະໜັບສະໜູນຈາກບໍລິສັດວຽງຄຳ ຮັກສາຄວາມປອດໄພ, ກຸ່ມບໍລິສັດບົວທິບລາວ, ບໍລິສັດ LGE ທີ່ປຶກສາ ແລະ ບໍລິສັດນຳ້ເພັດ ຈະເລີນເຊີນຊັບ ເປັນຜູ້ສະໜອງທຶນໃຫ້ ເພື່ອອຳນວຍຄວາມສະດວກໃນການຈັດຕັ້ງປະຕິບັດງານ ໃຫ້ມີຄວາມວ່ອງໄວ ດີຂຶ້ນເລື້ອຍໆ.


ຈາກນັ້ນ ທ່ານແດງ ປະທຸມທອງ ໄດ້ລາຍງານຫຍໍ້ກ່ຽວກັບສະພາບການທີ່ພົນເດັ່ນ ໃນການນຳພາພັດທະນາວຽກງານຮອບດ້ານ ຢູ່ແຂວງໄຊສົມບູນ ໃນໄລຍະ 1 ປີ ຜ່ານມາ ແລະ ທິດທາງແຜນການຈຸດສຸມ ປີ 2021 ພ້ອມທັງກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງ ຕໍ່ທ່ານ ບົວສອນ ບຸບຜາວັນ ແລະ ທ່ານ ວຽງສະຫວັດ ສີພັນດອນ ພ້ອມດ້ວຍຄະນະ ທີ່ໄດ້ລົງມາຢ້ຽມຢາມ ພ້ອມທັງນຳເອົາເຄື່ອງມາມອບໃຫ້ແກ່ແຂວງໄຊສົມບູນໃນຄັ້ງນີ້ ເພື່ອເປັນການກະຕຸກຊຸກຍູ້ ໃຫ້ແຂວງໄດ້ຮັບການພັດທະນາຢ່າງບໍ່ຢຸດຢັ້ງ.