ກອງປະຊຸມຄົບຄະນະບໍລິຫານງານພັກແຂວງເປີດກວ້າງຄັ້ງທີ 3 ສະໃຫມທີ XI ໄດ້ຈັດຂຶ້ນໃນລະຫວ່າງວັນທີ 15 -17 ມີຖຸນາ 2021ນີ້ ທີ່ຫໍປະຊຸມໃຫຍ່ຂອງແຂວງ ແລະ ໄດ້ສຳເລັດລົງຢ່າງເປັນທາງການ ໂດຍພາຍໃຕ້ການເປັນປະທານຂອງສະຫາຍ ເລັດ ໄຊຍະພອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງອັດຕະປື ມີບັນດາສະຫາຍໃນຄະນະບໍລິຫານງານພັກແຂວງ, ຄະນະບໍລິຫານງານພັກເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.


ກອງປະຊຸມໄດ້ຕີລາຄາສູງຕໍ່ການນໍາພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ງົບປະມານໃນໄລຍະ 6 ເດືອນຕົ້ນປີ 2021 ທີ່ໄດ້ຮັບຮອງໃນມະຕິກອງປະຊຸມຂອງຄະນະບໍລິຫານງານພັກແຂວງ ຄັ້ງທີ 2 ສະໄຫມທີ XI ແລະ ວຽກງານແກ້ໄຂບັນຫາຈໍາເປັນຮີບດ່ວນ ແລະ ວຽກງານຈຸດສຸມອື່ນໆ ຈໍານວນຫນຶ່ງ ໂດຍລວມເຫັນວ່າມີຫລາຍດ້ານທີ່ໄດ້ຮັບຜົນສໍາເລັດເປັນຕົ້ນ: ແມ່ນຄວາມມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບສຸກ, ເສດຖະກິດ-ສັງຄົມໄດ້ຮັບການພັດທະນາຕໍ່ເນື່ອງ, ການຈັດຕັ້ງພັກ-ລັດແຕ່ລະຂັ້ນໄດ້ຮັບການປັບປຸງຢ່າງເປັນລະບົບ ແລະ ເປັນແຂວງຫນຶ່ງທີ່ປອດໄພຈາກການລະບາດຂອງພະຍາດໂຄວິດ-19.

ພ້ອມກັນນີ້ກອງປະຊຸມໄດ້ພ້ອມກັນສຸມໃສ່ການປະກອບຄໍາເຫັນ ແລະ ປຶກສາຫາລືຢ່າງກົງໄປກົງມາ, ລະອຽດຈະແຈ້ງເຖິິງທິດທາງ ແລະ ມາດຕະການຕົວຈິງໃນການແກ້ໄຂບັນຫາຈຸດອ່ອນ ແລະ ຂໍ້ຄົງຄ້າງ, ບັນຫາຈໍາເປັນເລັ່ງດ່ວນ ເຊິ່ງກອງປະຊຸມມີຄວາມເປັນເອກະພາບກັນໂດຍສືບຕໍ່ນໍາພາ-ຊີ້ນໍາວຽກງານຈຸດສຸມໃນຕໍ່ຫນ້າບົນຈິດໃຈສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານໃນແຕ່ລະບັນຫາ ເພື່ອຮັບປະກັນໃຫ້ແກ່ການນໍາພາ-ຊີ້ນໍາວຽກງານຮອບດ້ານໃນຕໍ່ຫນ້າໃຫ້ໄດ້ຮັບຜົນດີ.

ຂ່າວ:ມະນີວອນ