ມີເດຍລາວແຂວງອັດຕະປື ອີງຕາມການໃຫ້ສໍາພາດຂອງທ່ານ ດຣ ບຸນທະວີ ຈະເລີນຜົນ ຜູ້ອໍານວຍການໂຮງຫມໍແຂວງ ອັດຕະປື ໃນຄັ້ງວັນທີ 28 ເມສາ 2021 ນີ້ວ່າ: ຜ່ານການຈັດຕັ້ງປະຕິບັດຄໍາສັ່ງແນະນໍາຂອງລັດຖະບານກໍຄືຄະນະສະເພາະກິດຂັ້ນສູນກາງ ແລະ ຂັ້ນແຂວງ ທາງດ້ານສາທາລະນະສຸກພວກເຮົາໄດ້ເອົາໃຈຢ່າງຈົດຈໍ່ຕໍ່ການປະຕິບັດມາດຕະການປ້ອງກັນ,ຄວາມຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ໂດຍສະເພາະ ກໍໄດ້ສຸມໃສ່ການສັກຢາວັກຊິນໄລຍະທີ1 ແລະ ໄລຍະທີ 2 ໃຫ້ບັນລຸຕາມຄາດຫມາຍທີ່ວາງໄວ້ ໄລຍະທີ 1 ແລະ ທີ 2 ໃຫ້ໄດ້ 50% ຂຶ້ນໄປເປັນຕົ້ນ: ໃນໄລຍະທີ 1 ໄດ້ຮັບວັກຊິນຈາກສູນກາງ 8000 ໂດຣ, ເທົ່າກັບ 4000ຄົນ, ສະເລ່ຍ 2 ເຂັມຕໍ່ຄົນ, ໄລຍະສັກຫ່າງກັນ 28 ວັນຫາ 1 ເດືອນ. ມາຮອດປັດຈຸບັນການຈັດຕັ້ງປະຕິບັດໄດ້ພຽງ 1.937 ຄົນ ທີ່ໄດ້ສັກເຂັມທີ 1 ເທົ່າກັບ 48%, ເຂັມທີ 2 ປະຕິບັດໄດ້ 717 ຄົນ, ເທົ່າກັບ 17%. ຍັງບໍບັນລຸຄາດຫມາຍ. ພ້ອມກັນນີ້ທາງສູນກາງໄດ້ຄາດຄະເນເພີ່ມຕື່ມອີກ 16.000 ໂດຣ, ລວມທັງມົດ 24.000 ໂດຣ, ໃນນີ້ເປົ້າຫມາຍຕົ້ນຕໍແມ່ນເລັ່ງໃສ່ຜູ້ທີ່ມີຄວາມສຽງເຊັ່ນ: ພະນັກງານແພດຫມໍ, ພະນັກງານປະຈໍາຊາຍແດນ, ຜູ້ປະຈໍາການສະຖານທີ່ກັກກັນ, ບັນດາບ້ານພັກ, ໂຮງແຮມ ແລະປະຊາຊົນໃນທົ່ວແຂວງ ໃຫ້ມີສະຕິຕື່ນຕົວເຂົ້າຮ່ວມການສັກຢາວັກຊິນ ເພື່ອປ້ອງກັນຕົນເອງ, ຄອບຄົວ ແລະ ສັງຄົມອີກດ້ວຍ.