(ພາບປະກອບ)

ກົມອຸຕຸນິຍົມ ແລະ ອຸທົກກະສາດ ໄດ້ອອກແຈ້ງເຕືອນປະຊາຊົນບັນດາເຜົ່າ ໃນທົ່ວປະເທດໃຫ້ຍົກສູງສະຕິລະວັງຕົວ ທັງໃນດ້ານການຮັກສາສຸຂະພາບ ແລະ ອາຄານທີ່ຢູ່ອາ​ໄສ ​​ເພາະໄລຍະນີ້ສະພາບອາກາດ ມີການປ່ຽນແປງໄວວາແບບຜິດປົກກະຕິ, ຂະນະທີ່ ການຄາດຄະເນ ສະພາບອາກາດຢູ່ທົ່ວປະເທດ ໃນອາທິດນີ້ແມ່ນ ຈະມີຝົນ, ໝາກເຫັບຕົກ ແລະ ຟ້າຜ່າ ເນື່ອງຈາກຄວາມກົດດັນອາກາດຕໍ່າ ຂອງອາກາດຮ້ອນທີ່ມີກໍາລັງອ່ອນ ຍັງພັດປົກຄຸມທົ່ວທຸກພາກຂອງປະເທດເຮົາ ສົມທົບກັບກະແສ ລົມຕາເວັນຕົກພັດ ປົກຄຸມເປັນສ່ວນໃຫຍ່, ​ເຊິ່ງຈະເຮັດໃຫ້ອາກາດຮ້ອນ, ມີຝົນຕົກ ແລະ ລົມພັດແຮງຢູ່ຫລາຍທ້ອງຖິ່ນໃນແຕ່ລະພາກ.

ຕໍ່ສະພາບດັ່ງກ່າວ, ປະຊາຊົນບັນດາເຜົ່າ ຕ້ອງເອົາໃຈໃສ່ຮັກສາສຸຂະພາບໃຫ້ດີ ໂດຍສະເພາະແມ່ນເດັກນ້ອຍ ແລະ ຜູ້ສູງອາຍຸ ຕ້ອງໄດ້ເບິ່ງແຍງເປັນພິເສດ ເພື່ອບໍ່ໃຫ້ເຈັບປ່ວຍໄດ້ງ່າຍ, ພ້ອມນີ້ ຕ້ອງໝັ່ນກວດກາ ຄວາມແໜ້ນໜາຂອງອາຄານ, ເຮືອນຊານ ຫລື ສະຖານທີ່ຢູ່ອາໄສຂອງຕົນ ໃຫ້ແໜ້ນໜາຢູ່ສະ ເໝີ ເພື່ອໃຫ້ສາມາດ ຕ້ານທານ ກັບລົມພັດແຮງທີ່ຈະຕາມມາ. ດັ່ງກໍລະນີມີຝົນຕົກໜັກ, ລົມພັດແຮງ ​ແລະ ໝາກເຫັບຕົກເປັນບໍລິເວນກວ້າງ ຢູ່ນະຄອນຫລວງວຽງຈັນ ​​ເມື່ອ​ມໍ່ໆມານີ້ ​ເຊິ່ງໄດ້ສ້າງຄວາມ ເສຍຫາຍໃຫ້ແກ່ອາຄານ, ເຮືອນຊານບ້ານຊ່ອງ ຂອງປະຊາຊົນຢູ່ຫລາຍພື້ນທີ່, ບາງບ່ອນໄດ້ມີຕົ້ນໄມ້ໃຫຍ່ລົ້ມທັບເຮືອນ, ລົດໃຫຍ່, ລົດຈັກ ແລະ ຊັບສິນອື່ນໆ ຂອງປະຊາຊົນເປ່ເພ ເສຍຫາຍຈໍານວນຫລາຍ. ສະນັ້ນເພື່ອຫລີກລ່ຽງຄວາມອັນຕະລາຍດັ່ງກ່າວ ແມ່ນໃຫ້ຢູ່ຫ່າງໄກຈາກຕົ້ນໄມ້ໃຫຍ່ ຫລື ສິ່ງປຸກສ້າງຕ່າງໆ ທີ່ບໍ່ທັນສໍາເລັດ ເພື່ອຮັບປະກັນຄວາມປອດໄພ ແລະ ໃຫ້ເອົາໃຈໃສ່ຕິດຕາມສະພາບ ອາກາດຈາກອຸຕຸນິຍົມ ແລະ ອຸທົກກະສາດເປັນປະຈໍາ.

ສໍາລັບສະພາບອາກາດ ໃນແຕ່ລະພາກມີດັ່ງນີ້: ພາກເໜືອດ້ານຕາເວັນອອກແຂວງຜົ້ງສາລີ, ຫົວພັນ ແລະ ​ແຂວງຊຽງຂວາງອາກາດຈະຮ້ອນ, ພ້ອມມີລົມແຮງ ຢູ່ບາງທ້ອງຖິ່ນ, ອຸນຫະພູມແຕ່ 15-30 ອົງສາ; ພາກຕາເວັນຕົກ ແຂວງອຸດົມໄຊ, ບໍ່ແກ້ວ, ຫລວງພະບາງ ແລະ ​ແຂວງໄຊຍະບູລີ ອາກາດຈະຮ້ອນ ອຸນຫະພູມແຕ່ 18-35 ອົງສາ; ພາກກາງແຂວງວຽງຈັນ, ນະຄອນຫລວງວຽງຈັນ, ບໍລິຄໍາໄຊ, ຄໍາມ່ວນ ແລະ ​ແຂວງສະຫວັນນະເຂດ ອາກາດຈະຮ້ອນໃນຕອນກາງເວັນ ແລະ ຈະມີຝົນຕົກພ້ອມ ລົມແຮງອຸນຫະພູມແຕ່ 20-36 ອົງສາ ແລະ ພາກໃຕ້ ແຂວງຈໍາປາສັກ, ສາລະວັນ, ເຊກອງ ແລະ ​ແຂວງອັດຕະປື ອາກາດຈະຮ້ອນ ແລະ ມີຝົນຕົກ ອຸນຫະພູມແຕ່ 20-36 ອົງສາ.

Medialaos MMD