ມີເດຍລາວແຂວງສາລະວັນ
ວັນທີ 13 ກັນຍານີ້, ອົງການຈັດຕັ້ງພັກ-ລັດ ຈາກພະແນກການ, ກົມກອງຕ່າງໆອ້ອມຂ້າງແຂວງ ແລະເມືອງ ມອບເຄື່ອງຊ່ວຍເຫຼືອເປັນວັດຖຸ, ປັດໄຈ ແລະ ເຄື່ອງອຸປະໂພກ-ບໍລິໂພກ ໃຫ້ພໍ່ແມ່ປະຊາຊົນ ທີ່ໄດ້ຮັບຜົນກະທົບຈາກພາຍຸໂກນເຊິນ ຢູ່ເມືອງສາລະວັນ ປະກອບມີ: ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວແຂວງ ມອບເງິນສົດ 1 ລ້ານກີບ, ພະແນກສາທາລະນະສຸກແຂວງ ມອບມຸ້ງ 100 ດາງ, ມູນຄ່າ 3 ລ້ານກວ່າກີບ, ອົງການປົກຄອງເມືອງວາປີ ມອບເຂົ້າສານໜຽວ ຈຳນວນ 550 ກິໂລກຣາມ, ນໍ້າດື່ມ 20 ແພັກ ແລະ ເງີນສົດ 1 ລ້ານກວ່າກີບ, ອົງການແນວລາວສ້າງຊາດແຂວງ ມອບເງິນສົດ 5 ແສນກີບ, ສະຫະພັນນັັກຮົບເກົ່າ ມອບເງິນສົດ 5 ແສນກີບ, ຄະນະບໍລິຫານງານຊາວໜຸ່ມແຂວງ ມອບນໍ້າດື່ມ 20 ແພັກ, ເຄື່ອງນຸ່ມຫົ່ມ, ເຂົ້າສານຈ້າວ, ຜ້າອັດປາກ-ດັງ ແລະອື່ນໆ ລວມມູນຄ່າ 4 ລ້ານກວ່າກີບ ແລະ ສະຫະພັນກຳມະບານແຂວງ ມອບເຫຼັກຕະປູ 12 ແກັດ ມູນຄ່າ 1 ລ້ານກວ່າກີບ. ມອບໂດຍຫົວໜ້າພະແນກການ, ກົມກອງ ແລະ ຜູ້ຕາງໜ້າອົງການຈັດຕັ້ງພັກ-ລັດ, ຮັບໂດຍ: ທ່ານ ຈັນສີລອນ ສີສົມບູນ ເຈົ້າເມືອງໆສາລະວັນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ອົງການປົກຄອງແຂວງ ແລະ ເມືອງສາລະວັນ ໄດ້ເລັ່ງຊ່ວຍເຫຼືອພໍ່ແມ່ປະຊາຊົນ ທີ່ໄດ້ຮັບຜົນກະທົບ ຢ່າງຮີບຮ້ອນ ແລະ ເກັບກຳຂໍ້ມູນຢ່າງລະອຽດ ໃນບ້ານຕ່າງໆ ທີ່ໄດ້ຮັບຜົນເສຍຫາຍ ເປັນຕົ້ນ: ບ້ານທາດຫ້ວຍ, ບ້ານແບ່ງອຸດົມ, ບ້ານກ້ວຍ ແລະ ເສຍຫາຍຫຼາຍທີ່ສຸດແມ່ນ ບ້ານໂພນໄຜ່. ເຊີ່ງໃນເບື້ອງຕົນ ກໍ່ໄດ້ສຸມໃສ່ຈັດສັນທີ່ຢູ່ອາໄສຊົ່ວຄາວ ແລະ ຊ່ວຍເຫຼືອເຄື່ອງອຸປະໂພກ-ບໍລິໂພກທີ່ຈຳເປັນ ຢ່າງຮີບດ່ວນ.
ພາບ-ຂ່າວ: ທິດລານີ ໂຄດໂຍທາ.