ມີເດຍລາວແຂວງສາລະວັນ ໂດຍ: ກິນດາວັນ ອ້ວນນາຄູ ເພື່ອປະກອບສ່ວນຊ່ວຍເຫລືອເຂົ້າໃນວຽກງານ ການເຄື່ອນໄຫວ ຂອງທີມງານແພດ-ໝໍ ຕ້ານ, ສະກັດກັ້ນ, ປ້ອງກັນການແຜ່ລະບາດພະຍາດໂຄວິດ-19 ທີ່ກຳລັງແຜ່ລະບາດໃນທົ່ວໂລກ, ທົ່ວປະເທດລາວ ເວົ້າສະເພາະກໍ່ຄືແຂວງສາລະວັນ ທີ່ກຳລັງພົບກັບບັນຫາພະຍາດໂຄວິດ-19. ຍ້ອນເຫັນໄດ້ຄວາມສຳຄັນຄືແນວນັ້ນ ທາງ ອົງການ ແພລນສາກົນ ປະຈໍາແຂວງສາລະວັນ ຈິ່ງໄດ້ນໍາເອົາຜ້າອັດປາກ-ອັດດັງ 810 ກັບ, ເຈວລ້າງມື 500ml 405 ກວດ ແລະ ສູບູແຫຼວສໍາລັບລ້າງມື 500ml 210 ກວດ, ອັງໂກນ 90% 500ml ຈໍານວນ 600 ກວດ, ຊຸດ PPE 107ຊຸດ ລວມມູນຄ່າທັງໝົດ 83,660,000 ກີບ ມອບໃຫ້ກັບພະແນກສາທາລະນະສຸກແຂວງສາລະວັນ ເພື່ອມອບຕໍ່ໃຫ້ແກ່ 2 ຕົວເມືອງຄື: ຫ້ອງການ ສາທາລະນະສຸກເມືອງສາລະວັນ ແລະ ຫ້ອງການ ສາທາລະນະສຸກ ເມືອງຕະໂອ້ຍ ໂດຍການມອບຂອງ ທ່ານ ສຸລິຍັນ ພົມມະຈັກ ຕາງໜ້າຜູ້ບໍລິຫານອົງການແພຣນສາກົນ ປະຈໍາແຂວງສາລະວັນ, ໃຫ້ກຽດຮັບໂດຍ ທ່ານ ດຣ ຄໍາຄ້າຍ ຄໍາສິງສະຫວັດ ຮອງຫົວໜ້າພະແນກສາທາລະນະສຸກ ແຂວງສາລະວັນ ພ້ອມດ້ວຍພະນັກງານທັງສອງພາກສ່ວນເຂົ້າຮ່ວມເປັນສັກຂີພິຍານ,.

ໃນໂອກາດດຽວກັນນີ້ ທ່ານ ດຣ ຄໍາຄ້າຍ ຄໍາສິງສະຫວັດ ກໍ່ໄດ້ສະແດງຄວາມຂອບໃຈ ທາງ ອົງການ ແພລນສາກົນ ປະຈໍາແຂວງສາລະວັນ ( ອົງການ ແພລນສາກົນ ປະຈໍາ ສປປ ລາວ ) ທີ່ໃຫ້ການຊ່ວຍເຫຼືອທາງດ້ານວັດຖຸ, ອຸປະກອນ ໃຫ້ກັບ 2 ຕົວເມືອງຂອງແຂວງສາລະວັນ, ເຄື່ອງຈຳນວນດັ່ງກ່າວ ແມ່ນຈະນຳໄປມອບໃຫ້ກັບໜ່ວຍງານແພດໝໍ ທີ່ປະຕິບັດໜ້າທີ່ຕົວຈິງໃຫ້ເກີດຜົນປະໂຫຍດສູງສຸດ. ພິທີດັ່ງກ່າວຈັດຂຶ້ນໃນວັນທີ 17 ພຶດສະພາ 2021 ຢູ່ທີ່ຫ້ອງ ອົງການ ແພລນສາກົນ ປະຈໍາແຂວງສາລະວັນ.