ມີເດຍລາວແຂວງບໍ່ແກ້ວ ພາບ-ຂ່າວ ຄຳພັນ ແກ້ວມະນີ ວັນທີ 16 ມິຖຸນາ 2021ນີ້ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດວ່າ ການການຫົວໜ້າກົມໃຫຍ່ເສນາທິການກອງທັບ, ຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງພ້ອມຄະນະ. ລົງຕິດ ຕາມກວດກາສະພາບການໄພພິບັດທາງທຳມະຊາດຢູ່ແຂວງບໍ່ແກ້ວ ເພື່ອເກັບກຳຂໍ້ມູນຜົນການເສຍຫາຍຂອງໄພນໍ້າຖ້ວມຢູ່ພາກເໜືອ ໂດຍສະເພາະແຂວງບໍ່ແກ້ວ.

ທ່ານ ຄຳຜະຫຍາ ພົມປັນຍາ ຮອງເຈົ້າແຂວງ ຜູ້ຊີ້ນຳຂົງເຂດວັດທະນະທຳ-ສັງຄົມກ່າວວ່າ: ໃນລະຫ່ວາງວັນທີ 13-14 ມິຖຸນາ 2021 ໄດ້ເກີດມີນໍ້າຖ້ວມ, ນໍ້າໄຫຼ່ສຸ, ນໍ້າປ່າໄຫຼຫລາກ ເຮັດໃຫ້ປະຊາຊົນໄດ້ຮັບຜົນກະທົບ ເຊີ່ງລວມທັງ ໄຮ່ນາຮົ້ວສວນ ແລະ ສັດລ້ຽງ ໃນແຕ່ລະເມືອງ ຄື: ເມືອງຫ້ວຍຊາຍ: (ກຸ່ມບ້ານທ່າຟ້າ) ໄດ້ຮັບຜົນກະທົບ 01 ບ້ານຄື: ບ້ານ ທ່າຟ້າ: ມີຄອບຄົວໄດ້ຮັບຜົນກະທົບຈໍານວນ 29 ຄອບຄົວ, ລວມມີ 123 ຄົນ, ຍິງ 65 ຄົນ, ລວມມີເປັດ+ໄກ່ເສຍຫາຍຈໍານວນ 455 ໂຕ, ໝູ 1 ໂຕປະເມີນມູນຄ່າເສຍຫາຍ 23,950,000 ກີບ ແລະ ຍັງມີໂຮງຮຽນໄດ້ຮັບຜົນກະທົບ 2 ຫຼັງຄື: ໂຮງຮຽນປະຖົມສົມບູນບ້ານທ່າຟ້າ ແລະ ໂຮງຮຽນມັດທະຍົມສົມບູນບ້ານທ່າຟ້າ ກໍາແພງຮົ້ວໂຮງຮຽນລົ້ມປະມານ 47 ແມັດ, ຝາຫ້ອງຮຽນເປ່ເພ 01 ຫ້ອງ, ນໍ້າໄຫລສຸເຂົ້າຫ້ອງຮຽນ ແລະ ຫ້ອງການເຮັດໃຫ້ອຸປະກອນການຮຽນການສອນໄດ້ຮັບຜົນເສຍຫາຍຈໍານວນໜຶ່ງ ໂດຍສະເພາະແມ່ນປຶ້ມຕໍາລາຮຽນ ແລະ ຄູ່ມືຄູປະເມີນມູນຄ່າເສຍຫາຍ 37,000,000 ກີບ. ລວມມູນຄ່າເສຍຫາຍທັງໝົດ: 60,950,000 ກີບ.

ເມືອງຜາອຸດົມ: ໄດ້ຮັບຜົນກະທົບຢູ່ 12 ບ້ານ ໃນນັ້ນ ມີພື້້ນຖານໂຄງລ່າງຂອງລັດເຊັ່ນ: ເສັ້ນທາງ 5 ເສັ້ນ ແລະ ຂົວເຊາະເຈື່ອນ 08 ຈຸດປະເມີນມູນຄ່າເສຍຫາຍ 227,000,000 ກີບ,ໄມ້ຫັກທັບຕາຂ່າຍໄຟຟ້າ 01 ຈຸດ ແລະ ຫໍພັກນັກຮຽນ, ຄູອາຈານຈໍານວນ 05 ຫຼັງ. ນໍ້າປ່າໄຫຼສຸຖ້ວມເຮື່ອນຢູ່ອາໄສຂອງປະຊາຊົນ ຈໍານວນ 06 ບ້ານຄື: ບ້ານນາໂຮມ, ບ້ານສົມສະຫວ່າງ, ບ້ານປຸ່ງລາດ, ບ້ານໂຮມສຸກ, ບ້ານວຽງພັດທະນາ ແລະ ບ້ານໃຫຍ່ນໍ້າຍາວ. ຜ່ານການລົງສົມທົບເກັບກໍາຂໍ້ມູນຕົວຈິງຂອງຄະນະກໍາມະການຂັ້ນແຂວງ, ຂັ້ນເມືອງ ແລະ ພາກສ່ວນທີ່ກ່ຽວຂ້ອງໄດ້ຂໍ້ມູນເບື້ອງຕົ້ນຢູ່ 03 ບ້ານຄື: ບ້ານວຽງພັດທະນາ, ບ້ານມົກໂຊ ແລະ ບ້ານໂຮມສຸກ ຈໍານວນ 13 ຄອບຄົວ, ປະເມີນມູນຄ່າເສຍຫາຍເບື້ອງຕົ້ນ 205,000,000 ກ່ວາລ້ານກີບ, ໃນນັ້ນ ເຮືອນປະຊາຊົນຖືກນໍ້າພັດໄຫຼນໍ້າ ຈໍານວນ 06 ຫຼັງຄາເຮືອນ, ລົດຈັກ 06 ຄັນ, ເຄື່ອງໃຊ້ໄຟຟ້າ 03 ເຄື່ອງ, ນອກນັ້ນ ຍັງມີຕູບຕະຫລາດນັດຢູ່ບ້ານວຽງພັດທະນາ ຖືກນໍ້າໄຫຼສຸເປ່ເພ ເສຍຫາຍ 12 ຫຼັງ, ງົວ 02 ໂຕ, ໝູ 06 ໂຕ ແລະ ສັດປີກ, ໜອງປາ ແລະ ເຄື່ອງປູກຂອງປະຊາຊົນ ຈໍານວນໜຶ່ງ ລວມມູນຄ່າເສຍຫາຍທັງໝົດ: 432,000,000 ກີບ.

ເມືອງປາກທາ: ໄດ້ຮັບຜົນກະທົບຈໍານວນ 11 ບ້ານກັບ 1 ກຸ່ມລະອຽດລຸ່ມນີ້ຄື: ຂົງເຂດກະສິກຳ ເນື້ອທີ່ທຳການຜະລິດໄດ້ຮັບຜົນກະທົບເນື້ອທີນາເສຍຫາຍ (ດີນເຊາະເຈື່ອນແຮ່ຖົ່ມ) ເສຍຫາຍ 10,84 ເຮັກຕາ ( ຂະແໜງກະສິກຳຈະນຳໃຊ້ກົນຈັກຟື້ນຟູ ແລະ ສຶບຕໍ່ທຳການຜະລິດໄດ້), ສວນສາລີແຂວງເສຍຫາຍ 10 ເຮັກຕາ ( ສາມາດຟື້ນຟູໄດ້), ສວນໝາກເດື່ອຍເສຍ 10 ເຮັກຕາ ( ສາມາດຟື້ນຟູໄດ້), ນໍ້າໄຫຼ່ນອງຖ້ວມຕາກ້າແນວພັນປູກເສຍຫາຍ 2,100 ກິໂລ ( ຂະແໜງກະສິກຳຈະສະໜອງແນວພັນຄືນ), ໜອງປາ 5 ໜອງປານ້ອຍເສຍຫາຍ ຈໍານວນ 4000 ໂຕ, ລວມມີຄອບຄົວໄດ້ຮັບຜົນກະທົບທັງໝົດ183 ຄອບຄົວ. ຂົງເຂດໂຍທາ: ເສັ້ນທາງບໍ່ສາມາດທ່ຽວໄດ້ມີ 2 ເສັ້ນຄື: ເສັ້ນທາງ 2243 ( ປາກທາ- ຫ້ວຍແອ່ນ) ແລະ ເສັ້ນທາງ 2205 ( ທ່າບັກປາກທາ – ກ້ອນຕື້ນ ) ເມີນມູນຄ່າເສຍຫາຍ: 365,669,750 ກີບ ລວມມູນຄ່າເສຍຫາຍທັງໝົດ 3 ເມືອງ: 858,619,750 ກີບ.

ຕໍ່ກັບເຫດການດັ່ງກ່າວຂໍສະແດງຄວາມເສຍໃຈຕໍ່ເຫດການທີບໍ່ຄາດຄິດ ແລະ ຂໍຊົມເຊີຍຄະນະຮັບຜິດຊອບໄພພິ ບັດຂັ້ນແຂວງທີລົງຕິດຕາມຊ່ວຍເຫຼືອປະຊາຊົນ ໄດ້ທັນເຫດການແລະຈະນຳເອົາຂໍ້ມູນດັ່ງກ່າວໄປສະເໜີຕໍ່ກະຊວງທີກ່ຽວຂອງ ແລະ ຫາທາງຊ່ວຍເຫຼືອຕາມເງືອນໄຂ. ຂໍຮຽກຮ້ອງໃຫ້ຄະນະຮັບຜິດຊອບໄພພິບັດຂັ້ນແຂວງ ສືບຕໍ່ຊ່ວຍເຫຼືອປະຊາ ຊົນຜູ້ທີຮັບຜົນກະທົບ, ພ້ອມກັນປຸກລະລົມພໍ່ແມ່ປະຊາຊົນຈົ່ງມີສະຕິ ແລະ ຕິດຕາມຂ່າວພະຍາກອນອາກາດຢ່າງເນື່ອງ.ໂອກາດທີ່ລົງເຄືອນໄຫວຄັ້ງນີ້ທ່ານຍັງໄດ້ນຳເງິນສົດ 50 ລ້ານກີບ ເພື່ອຊ່ວຍເຫຼືອໃນເບື່ອງຕົນໃຫ້ແຂວງບໍ່ແກ້ວ.