ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ໂອກາດທີ່ທ່ານ ນາງ ປານີ ຢາທໍ່ຕູ້ ຮອງປະທານປະເທດແຫ່ງ ສາທາລະນະລັດປະຊາທິປະໄຕ ປະຊາຊົນລາວ ໄດ້ໃຫ້ກຽດເຂົ້າຮ່ວມກອງປະຊຸມເຊື່ອມຊຶມ,ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ແລະ ການເຊື່ອມຊຶມຜັນຂະຫຍາຍ ແຜນພັດທະນາເສດຖະກິດ-ສັງຄົມ 5 ປີ( 2021-2025 )ຂອງແຂວງຫຼວງພະບາງໃນວັນທີ 21 ເມສາ 2021 ໂດຍມີທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຄະນະ ແລະ ພະນັກງານການນໍາ-ພະນັກງານຫຼັກແຫຼ່ງຂອງແຂວງເຂົ້າຮ່ວມ.

ຕອນທ້າຍກອງປະຊຸມທ່ານ ນາງ ປານີ ຢາທໍ່ຕູ້ ກໍໄດ້ມີຄວາມເຫັນໂອ້ລົມ ເຊິ່ງກ່ອນອື່ນທ່ານ ໄດ້ຕີລາຄາຜົນການຈັດຕັ້ງປະຕິບັດວຽກງານໄລຍະປີຜ່ານມາ ຂອງແຂວງຫຼວງພະບາງ ພ້ອມທັງໄດ້ຊີ້ນໍາບາງບັນຫາ ເພື່ອເປັນທິດທາງໃນການຈັດຕັ້ງວຽກງານຂອງຄະນະພັກ ຢູ່ແຕ່ລະຂັ້ນ,ແຕ່ລະຂົງເຂດ ທັງເປັນບ່ອນອິງ ພ້ອມນໍາໄປຈັດຕັ້ງປະຕິບັດໃຫ້ບັນລຸຕາມແຜນການທີ່ວາງໄວ້.ດັ່ງບາງຕອນທ່ານກ່າວວ່າ: ຂ້າພະເຈົ້າຂໍສະເໜີໃຫ້ບັນດາຄະນະພັກ ແຕ່ລະຂັ້ນ ກວດກາ ແລະ ມີການສົມທຽບຕື່ມ ກ່ຽວກັບການຜັນມະຕິ VIII ຂອງແຂວງ ຕິດພັນກັບການຜັນຂະຫຍາຍ ມະຕິ XI ຂອງພັກ ວ່າຍັງມີຈຸດໃດທີ່ຍັງບໍ່ທັນເຊື່ອມສານກັນ ດ້ານໃດຍັງບໍ່ທັນຈະແຈ້ງ ເປັນຕົ້ນແມ່ນການເຮັດໃຫ້ອັດຕາເຕີບໂຕຂອງເສດຖະກິດໄລຍະ 5 ປີ,ເຊິ່ງປັດໃຈສໍາຄັນຂອງອັດຕາເຕີບໂຕຂອງຕົວເລກດັ່ງກ່າວ ແມ່ນເນັ້ນໃສ່ທ່າແຮງພື້ນຖານຂອງປະຊາຊົນ ແຕ່ຍັງບໍ່ທັນໄດ້ກໍານົດແຈ້ງວ່າ ການປັບປຸງກົນໄກການບໍລິຫານລັດ ເພື່ອດຶງດູດການລົງທຶນ ພາຍໃນ ແລະຕ່າງປະເທດເຂົ້າມາຊ່ວຍໜູນ ກໍາລັງແຮງຂອງປະຊາຊົນ ໄດ້ເທົ່າທີ່ຄວນ, ສະນັ້ນເພື່ອໃຫ້ການດຶງດູດການລົງທຶນ ຕ້ອງໄດ້ແກ້ໄຂຈັກບັນຫາ ທີ່ເປັນສິ່ງກີດຂວາງ ເພື່ອເຮັດໃຫ້ຜູ້ປະກອບການ ເຂົ້າມາສູ່ການພັດທະນາທ້ອງຖິ່ນໄດ້ຢ່າງເຕັມສ່ວນ ແລະຫຼາຍຂື້ນ,

ເພາະວ່າປັດໃຈຢາກໃຫ້ເສດຖະກິດໄດ້ຮັບການພັດທະນາໄດ້ນັ້ນ ນອກຈາກຄວາມເປັນເຈົ້າການ ເສີມຂະຫຍາຍບົດຮຽນທີ່ຜ່ານມາ ແລະມີມູນເຊື້ອຄວາມເປັນເຈົ້າທ່າແຮງ ຕ້ອງມີການດຶງດູດການລົງທຶນເຂົ້າມາກະທົບຊ່ວຍຕື່ມແລ້ວ,ການຈະດຶງດູດການລົງທຶນ ແມ່ນຕ້ອງພົວພັນຫຼາຍຂົງເຂດວຽກງານ ສະນັ້ນບັນດາຂະແໜງການຈະຕ້ອງໄດ້ມີການສົມທົບກັນ,ແກ້ໄຂຂອດວຽກງານ,ສ້າງຄວາມເປັນເອກະພາບສູງ ແລະ ຮ່ວມກັນຕັດສິນໃຈຢ່າງເດັດຂາດ,ເພື່ອສົ່ງເສີມວຽກງານຕ່າງໆໃຫ້ປະສົບຜົນສໍາເລັດ ເປັນຕົ້ນແມ່ນການທ່ອງທ່ຽວ ຍ້ອນວ່າແຂວງຫຼວງພະບາງມີທ່າແຮງທາງດ້ານການທ່ອງທ່ຽວ ຕ້ອງໄດ້ປັບປຸງລະບົບໂຮງແຮມ,ຍົກລະດັບການບໍລິການທີ່ດີ ປະສົມປະສານກັບເຕັກໂນໂລຊີທັນສະໄໝເຂົ້າຊ່ວຍ.ຜັນຂະຫຍາຍເອົາບັນຫາຢາເສບຕິດທີ່ສະພາແຫ່ງຊາດໄດ້ຮັບຮອງເປັນວາລະແຫ່ງຊາດ ມາຈັດຕັ້ງປະຕິບັດແກ້ໄຂຢູ່ແຂວງ ຖືເປັນສໍາຄັນຕົ້ນຕໍ່ ພ້ອມທັງຜັນຂະຫຍາຍລົງທ້ອງຖິ່ນຢ່າງຕັ້ງໜ້າ ແລະ ກວ້າງຂວາງ ເພາະບັນຫາດັ່ງກ່າວ ພົວພັນຫຼາຍວຽກງານທີ່ຕິດກັບການພັດທະນາເສດຖະກິດ-ສັງຄົມ ເປັນໂຕທ່ວງການພັດທະນາເສດຖະກິດ-ສັງຄົມຂອງປະເທດ.ພາຍຫຼັງໄດ້ມີການເຊື່ອມຊຶມເອກະສານມະຕິ XI ແລ້ວ,ຄວນປັບປຸງບັນດາເອກະສານຕ່າງໆຂອງແຂວງ ໂດຍສະເພາະແມ່ນປຶ້ມຄູ່ມືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຜູ້ແທນອົງຄະນະພັກແຂວງ ຄັ້ງທີ VIII ເຂົ້າສູ່ລວງເລິກ,ບ່ອນໃດທີຍັງຄົງຄ້າງ ແລະ ບໍ່ຈະແຈ້ງ ແລະສະເໜີໃຫ້ພະແນກການຂອງແຂວງ ແລະ ບັນດາເມືອງ-ນະຄອນຈົ່ງນໍາເອົາບັນດາເນື້ອໃນຈິດໃຈຂອງມະຕິດັ່ງກ່າວຂອງແຂວງໄປ ຈັດຕັ້ງກັນເຊື່ອມຊຶມຜັນຂະຫຍາຍ ເປັນແຜນອັນລະອຽດ ຢູ່ໃນຂະແໜງການທ້ອງຖິ່ນຕົນເອງ.