ມີເດຍລາວແຂວງຈຳປາສັກ
ໃນວັນທີ 14 ກັນຍາ 2021 ນີ້, ທ່ານ ສົມສີ ມະນີນິນ ກຳມະການພັກແຂວງ ຮອງປະທານສະພາປະຊາຊົນແຂວງ ພ້ອມຄະນະ ໄດ້ລົງເຄື່ອນໄຫວຕິດຕາມຊຸກຍູ້ວຽກງານຢູ່ສະໂມສອນເມືອງປາກຊ່ອງ ແຂວງຈຳປາສັກ , ໂດຍການຕ້ອນຮັບຂອງທ່ານ ພິມພອນ ພັນດານຸວົງ ກຳມະການພັກແຂວງ ເລຂາພັກເມືອງ ເຈົ້້າເມືອງໆປາກຊ່ອງ ພ້ອມຄະນະ, ມີບັນດາທ່ານໃນສະມາຊິກສະພາປະຊາຊົນແຂວງຈຳປາສັກ ປະຈຳເຂດເລືອກຕັ້ງເມືອງປາກຊ່ອງ, ບັນດາທ່ານປະທານ, ຮອງປະທານກວດກາພັກ-ລັດເມືອງ, ບັນດາທ່ານຫົວໜ້າຫ້ອງການ ຕະຫຼອດຮອດພະນັກງານວິຊາການສະມາຊິກສະພາປະຊາຊົນຂອງແຂວງ ແລະ ເມືອງເຂົ້າຮ່ວມ.

ທ່ານ ສົມສີ ມະນີນິນ ກໍາມະການພັກແຂວງ ຮອງປະທານສະພາປະຊາຊົນແຂວງຈໍາປາສັກ ກ່າວວ່າ: ການລົງເຄື່ອນໄຫວຂອງສະພາປະຊາຊົນແຂວງຈຳປາສັກ ໃນເທື່ອນີ້ ຈຸດປະສົງຫຼັກ ກໍ່ເພື່ອເປັນການຕິດຕາມກວດກາ ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳລຸ່ມກົດໝາຍ ໃນຂົງເຂດຍຸດຕິທຳ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ຂົງເຂດວັດທະນະທໍາສັງຄົມ ແລະ ບັນດາເຜົ່າຂອງເມືອງປາກຊ່ອງ ທັງເປັນການທົບທວນຄືນການຈັດຕັ້ງປະຕິບັດວຽກງານໂດຍລວມ ຍົກໃຫ້ເຫັນບັນດາຜົນສຳເລັດ, ບັນຫາຂໍ້ຄົງຄ້າງ ແລະ ບັນດາມາດຕະການໃນການແກ້ໄຂໃນຕໍ່ໜ້າຂອງແຕ່ລະຂະແໜງການ ເພື່ອຈະສັງລວມນຳໄປຄົ້ນຄວ້າພິຈາລະນາ ໃນສະພາ.

ຈາກນັ້ນທ່ານ ບຸນລິດ ເທບບຸນສູງ ຮອງເຈົ້າເມືອງໆປາກຊ່ອງ ສະມາຊິກສະພາປະຊາຊົນແຂວງຈຳປາສັກ ປະຈຳເຂດເລືອກຕັ້ງເມືອງປາຊ່ອງ ກໍ່ໄດ້ລວມງານການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳລຸ່ມກົດໝາຍ ຂອງເມືອງປາກຊ່ອງ ໃນໄລຍະທີ່ຜ່ານມາ ເຊິ່ງເມືອງປາກຊ່ອງ ໄດ້ຖືເອົາວຽກງານການເມືອງ-ແນວຄິດ ເປັນກົກ ແລະ ສອດຫ້ອຍເຂົ້າໃນທຸກໂຂງເຂດວຽກງານ ຄະນະພັກແຕ່ລະຂັ້ນໄດ້ຕັ້ງໜ້າຜັນຂະຫຍາຍ ເປັນເຈົ້າການຢ່າງເລິກເຊິ່ງ ແລະ ທົ່ວເຖິງທຸກເປົ້າໝາຍ ໄລຍະ 6 ເດືອນຜ່ານມາໄດ້ໃຫ້ຄຳປຶກສາທາງດ້ານກົດໝາຍແກ່ປະຊາຊົນ 19 ຄັ້ງ ປັບປຸງ ແລະ ຝຶກອົບຮົມທາງດ້ານວິຊາການໃຫ້ຄະນະແກ້ໄຂຂໍ້ຂັດແຍ່ງຂັ້ນບ້ານໄດ້ຈຳນວນ 1 ບ້ານ, ລົງປະເມີນຄອບຄົວ ແລະ ບ້ານແບບຢ່າງປະຕິບັດກົດໝາຍໄດ້ 1 ບ້ານມີ 171 ຄອບຄົວ, ເປີດຸດຝຶກອົບຮົມກົດໝາຍ 45 ວັນ ມີນັກສຳມານາກອນ ທັງໝົດ 29 ຄົນ, ການຈັດຕັ້ງປະຕິບັດຄຳຕັດສິນຂອງສານ ຄະດີແພ່ງ 14 ຄະດີ, ປະຕິບັດສຳເລັດ 3 ຄະດີ, ສົ່ງພາກສ່ວນອື່ນ 5 ຄະດີ, ຍັງຄ້າງ 6 ຄະດີ, ຄະດີອາຍາ 15 ຄະດີ, ສຳເລັດ 5 ຄະດີ, ກຳລັງດຳເນີນ 10 ຄະດີ, ຄະດີຢາເສບຕິດ 31 ຄະດີ, ປະຕິບັດສຳເລັດ 1 ຄະດີ, ວຽກງານທະບຽນສານ ມີຜູ້ຮັບໃຊ້ບໍລິການຢັ້ງຢືນຄວາມຖືກຕ້ອງຂອງເອກະສານຈຳນວນ 124 ສະບັບ, ສັນຍາກູ້ຢຶມ-ສັນຍາຄ້ຳປະກັນ 106 ສະບັບ, ຊື້ຂາຍກຳມະສິດທີ່ດິນ 14 ສະບັບ, ສັນຍາມອບຊັບ 1 ສັນຍາ, ບົດບັນທຶກກູ້ຍຶມເງິນ 1 ສະບັບ, ໃບມອບວິສະຫະກິດ 1 ສະບັບ ແລະ ໜັງສືມອບສິດອີກ 1 ສະບັບ. ໃນພິທີແຕ່ລະຂະແໜງການທີ່ເຂົ້າຮ່ວມກໍ່ໄດ້ຂື້ນຜັດປ່ຽງນກັນລາຍງານການຈັດຕັ້ງປະຕິບັດວຽກງານຂອງຕົນ.

ໂອກາດດຽວກັນນີ້ ທ່ານ ພິມພອນ ພັນດານຸວົງ ກຳມະການພັກແຂວງ ເລຂາພັກເມືອງ ເຈົ້າເມືອງໆປາກຊ່ອງ ກໍ່ໄດ້ສະແດງຄວາມຂອບໃຈແລະຮູ້ບຸນຄຸນເປັນຢ່າງຍິ່ງທີ່ທາງການນຳຂອງສະພາປະຊາຊົນ ແຂວງຈຳປາສັກ ໄດ້ລົງມາເຄື່ອນໄຫວຊຸກຍູ້ວຽກງານ ໂດຍສະເພາະແມ່ນການປະຕິບັດກົດໝາຍ ໃນຂອບເຂດທົ່ວເມືອງປາກຊ່ອງໃນເທື່ອນີ້ ພ້ອມດຽວກັນທ່ານຍັງໄດ້ເນັ້ນຕື່ມ ບັນຫາການປະຕິດບັດ ລັດຖະທຳມະນູນ ແລະ ກົດໝາຍ ຜ່ານມາເມືອງປາກຊ່ອງ ຍັງບໍ່ທັນເຂັ້ມງວດເທົ່າທີ່ຄວນເປັນຕົ້ນ ການປະຕິບັດກົດໝາຍວ່າດ້ວຍປ່າໄມ້ ເຊິ່ງປະຈຸບັນຍັງມີປະກົດການບຸກລຸກທະລາຍປ່າໄມ້ເຂດປ່າສະຫວງນ ແລະ ການປະຕິບັດກົດໝາຍວ່າດ້ວຍລັດຖະກອນ ທີ່ມີພະນັກງານຈຳນວນບໍ່ໜ້ອຍ ທີ່ຍັງຂາດຄວາມຫ້າວຫັນ ແລະ ຄວາມກະຕືລືລົ້ນໃນການປະຕິບັດໜ້າທີ່ຂອງຕົນ.