ມີເດຍລາວແຂວງເຊກອງ ໃນໂອກາດ ທີ່ທ່ານ ຄໍາສອນ ກອນເຍີ ຮອງເຈົ້າແຂວງໆ ຜູ້ຊີ້ນຳຂົງເຂດວຽກງານວັດທະນະທຳສັງຄົມແຂວງເຊກອງ ໄດ້ເຂົ້າຮ່ວມພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 27 ປີ ໃນວັນທີ 6 ຕຸລາ 2021 ນີ້ ທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ຂະແໜງສຶກສາທິການ ແລະກິລາ ຍາດມາໄດ້ ພ້ອມທັງໄດ້ຮຽກຮ້ອງໃຫ້ຜູ້ບໍລິຫານການສຶກສາ ແລະພະນັກງານຄູ-ອາຈານ ທຸກລະດັບ ເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບສູງ ທັງນີ້ເພື່ອຮັບປະກັນໃຫ້ແກ່ການດໍາເນີນການຮຽນ-ການສອນໃຫ້ມີປະສິດທິຜົນສູງກວ່າເກົ່າ.

ເຊິ່ງບັນຫາທີ1. ຄະນະພັກ-ຄະນະພະແນກ ຕ້ອງໄດ້ເອົາໃຈໃສ່ສຶກສາອົບຮົມການເມືອງ, ນໍາພາແນວຄິດ ໃຫ້ແກ່ຄູ ແລະບຸກຄະລາກອນທັງພາກລັດ ແລະເອກະຊົນ ເພື່ອໃຫ້ກໍາແໜ້ນນະໂຍບາຍ, ບັນດາມະຕິ, ຄໍາສັ່ງ, ກົດໝາຍ ແລະລະບຽບການຕ່າງໆຂອງພັກ-ລັດໃນແຕ່ລະໄລຍະ; 2. ເອົາໃຈໃສ່ສືບຕໍ່ຜັນຂະຫຍາຍ 2 ວາລະແຫ່ງຊາດຂອງລັດຖະບານໃຫ້ເປັນຮູບປະທໍາເຂົ້າໃນຂະແນງການສຶກສາ ແລະກກິລາໃນທົ່ວແຂວງ ໂດຍສະເພາະການແກ້ໄຂບັນຫາຢາເສບຕິດ ເພື່ອສ້າງສະຖາບັນການສຶກສາໃຫ້ປອດຢາເສບຕິດ, ໂດຍຕິດພັນກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນໃນທົ່ວແຂວງ; 3. ຜູ້ບໍລິຫານການສຶກສາ ແລະກິລາທຸກຂັ້ນ ຕ້ອງມີນໍ້າໃຈຮັກຊາດ, ມີຄວາມເຊື່ອຕໍ່ການນໍາພາຂອງພັກ ແລະລັດ, ເຊີດຊູນໍ້າໃຈດຸໝັ່ນ, ຊື່ສັດ, ປະຢັດ, ອົດທົນ ແລະມີຈັນຍາບັນ; 4. ຜູ້ບໍລິຫານໂຮງຮຽນ ສົມທົບກັບຄະນະພັດທະນາການສຶກສາຂັ້ນບ້ານ ແລະທຸກພາກສ່ວນທີ່ກ່ຽວຂ້ອງ ເປີດຂະບວນການຈັດຕັ້ງປະຕິບັດ 3 ຂໍ້ແຂ່ງຂັນຂອງຂະແໜງສຶກສາ ແລະກິລາ ໃຫ້ມີຄຸນນະພາບໃຫ້ແກ່ການຮຽນ-ການສອນ ເພື່ອສ້າງເງື່ອນໄຂໃຫ້ບຸກຄົນ ແລະກົມກອງດີເດັ່ນຫຼາຍຂຶ້ນ; 5. ສືບຕໍ່ສ້າງແຜນຍຸດທະສາດໃນການສ້າງຄູແຕ່ປີ 2021-2025 ໃນແຕ່ລະຊັ້ນຮຽນ ໃນແຕ່ລະປີຢ່າງຈະແຈ້ງ.

ບັນຫາທີ6, ປັບປຸງກົງຈັກການຈັດຕັ້ງ ນັບແຕ່ຂັ້ນແຂວງເຖິງຮາກຖານໂຮງຮຽນ ໃຫ້ໄປຕາມທິດຊີ້ນໍາຂອງການນໍາແຂວງ ຕາມທິດກະທັດຮັດ, ເຂັ້ມແຂງ, ສົມເຫດສົມຜົນ; 7. ສືບຕໍ່ການບັນຈຸ, ສັບຊ້ອນ ແລະຈັດສັນຄູ ໃຫ້ໄດ້ດີ ເພື່ອແກ້ໄຂສະພາບຄູເຫຼືອ, ຄູບໍ່ພໍ ຢູ່ແຕ່ລະຊັ້ນຮຽນ, ສາຍ ແລະລາຍວິຊາ; 8. ເອົາໃຈໃສ່ຝຶກອົບຮົມ ແລະຍົກລະດັບການກໍ່ສ້າງຄູແຕ່ລະຊັ້ນ, ສາຍ ທີ່ຍັງບໍ່ທັນມີຄຸນນະພາບ; 9. ຄູ ຕ້ອງຝຶກຝົນຫຼໍ່ຫຼອມຕົນເອງໃຫ່ມີທັດສະນະຫຼັກໝັ້ນ ແລະຄຸນສົມບັດສິນທໍາປະຕິວັດ, ຮັບປະກັນໃຫ້ໄດ້ຕາມ 3 ລັກສະນະ, 5 ຫຼັກມູນຂອງການສຶກສາ ແລະບັນຫາທີ10. ໃນໄລຍະການແຜ່ລະບາດຂອງພະຍາດໂຄວິດ-19 ຍ່ອມມີຄວາມຫຍຸ້ງຍາກໃນການຈັດຕັ້ງການຮຽນ-ການສອນ ເຊິ່ງຄູ ຈຶ່ງຈໍາເປັນຕ້ອງໄດ້ລິເລີ່ມນໍາໃຊ້ເຕັກໂນໂລຊີ ຫຼືອິນເຕີເນັດ ເຂົ້າໃນການຮຽນ-ການສອນໃຫ້ເປັນ ເພື່ອສອນນັກຮຽນ ໂດຍຜ່ານອິນເຕີເນັດ (ລະບົບອອນລາຍ). ຂ່າວ:ພຸດທະສອນ