ມີເດຍລາວແຂວງໄຊສົມບູນ ໃນຕອນເຊົ້າຂອງວັນທີ 24 ກັນຍາ 2021 ນີ້ ທ່ານ ພອຍຄໍາ ຮຸງບຸນຍວງ, ຮອງເລຂາພັກແຂວງ ຜູ້ຊີ້ນໍາວຽກງານພັກ-ພະນັກງານ ພ້ອມດ້ວຍຄະນະ ໄດ້ລົງເຄື່ອນໄຫວວຽກງານ ຊຸກຍູ້, ຕິດຕາມ ພະນັກງານລົງກໍ່ສ້າງຮາກຖານການເມືອງ ຢູ່ບ້ານນໍ້າຍອນ ເມືອງອະນຸວົງ ແຂວງໄຊສົມບູນ, ມີທ່ານ ດົວຊົ່ງ ເລ່ຍໂກ້, ຮອງເລຂາພັກເມືອງອະນຸວົງ, ຄະນະໜ່ວຍຮາກຖານ, ອຳນາດການປົກຄອງບ້ານ ພ້ອມດ້ວຍສາມອົງການຈັດຕັ້ງມະຫາຊົນພາຍໃນບ້ານ ເຂົ້າຮ່ວມ.

ໂອກາດນີ້ ຫົວໜ້າໜ່ວຍງານກໍ່ສ້າງຮາກຖານການເມືອງປະຈໍາບ້ານນໍ້າຍອນ ແລະ ເລຂາພັກບ້ານນໍ້າຍອນ ໄດ້ຜັດ ປ່ຽນກັນຂຶ້ນລາຍງານໃນການເຄື່ອນໄຫວວຽກງານກໍ່ສ້າງຮາກຖານການເມືອງຂອງຈຸດສຸມບ້ານ ເຊິ່ງຕະຫຼອດໄລຍະຜ່ານມາ ໜ່ວຍກໍ່ສ້າງຮາກຖານການເມືອງ ໄດ້ສົມທົບກັບເລຂາພັກບ້ານ ໃນການປະຕິບັດໜ້າທີ່ວຽກງານຕ່າງໆ ຂອງຂັ້ນເທິງມອບໝາຍ ໃຫ້ ເປັນຕົ້ນແມ່ນໄດ້ເອົາໃຈໃສ່ລົງຊີ້ນຳ-ນຳພາ ອຳນາດການປົກຄອງ ໃນການສຶກສາອົບຮົມການເມືອງ-ແນວຄິດ ໃຫ້ປະຊາຊົນ ເປັນກົກ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືພັດທະນາຄອບຄົວຂອງຕົນໄດ້ເປັນຢ່າງດີ ໂດຍການ ນໍາເອົາ ເອກະສານຕ່າງໆ ລົງໄປຜັນຂະຫຍາຍ, ເຊື່ອມຊຶມໃຫ້ປະຊາຊົນໄດ້ຮູ້ກ່ຽວກັບລະບຽບ-ກົດໝາຍ, ນະໂຍບາຍ ຂອງພັກ-ຂອງລັດວາງອອກ ຢ່າງເຂັ້ມງວດ ທັງນີ້ກໍເພື່ອເຮັດໃຫ້ປະຊາຊົນພາຍໃນບ້ານ ມີແນວຄິດຫລັກໝັ້ນ, ອຸ່ນອຽນທຸ່ນທ່ຽງ ເຊື່ອໝັ້ນ ຕໍ່ການນຳພາຂອງພັກ-ລັດ, ມີນຳ້ໃຈຮັກຊາດ ຮັກບ້ານເກີດເມືອງນອນ ແລະ ໃຫ້ການຮ່ວມມືກັບການຈັດຕັ້ງເຮັດ ໃຫ້ບັນດາ ວຽກງານຕ່າງໆພາຍໃນບ້ານມີຜົນສຳເລັດໄປເທື່ອລະກ້າວ ພ້ອມດຽວກັນນີ້ ຍັງໄດ້ປຸກລະດົມພໍ່ແມ່ປະຊາຊົນໃຫ້ ມີຄວາມສາມັກຄີຮັກແພງ ຊ່ວຍເຫລືອຊຶ່ງກັນ ແລະ ກັນ ແລະ ທຸກພາກສ່ວນທີ່ກ່ຽວຂ້ອງຂອງບ້ານ ໂດຍສະເພາະ ແມ່ນກຳລັງປ້ອງກັນຊາດ-ປ້ອງກັນຄວາມສະຫງົບ ໄດ້ຕິດຕາມກວດກາ ໃນຂອບເຂດຕາມຄວາມຮັບຜິດຊອບຂອງຕົນ ໃນການເກັບກຳຄົນເຂົ້າ-ອອກເປັນປົກກະຕິ ໂດຍສະເພາະ ໃນຊ່ວງໄລຍະທີ່ມີການລະບາດຂອງພະຍາດໂຄວິດ 19 ເພື່ອເຮັດ ໃຫ້ບ້ານມີຄວາມສະຫງົບໂດຍພື້ນຖານ ຂະນະດຽວກັນ ຍັງໄດ້ຊຸກຍູ້ອຳນາດການປົກຄອງບ້ານ ແລະ ປະຊາຊົນ ທຳການຜະລິດ ໂດຍການປູກຝັງ-ລ້ຽງສັດ ເພື່ອຜະລິດເປັນສິນຄ້າ ສົ່ງເຂົ້າໃຫ້ບໍລິສັດພູເບ້ຍ ທັງນີ້ ກໍເພື່ອເຮັດໃຫ້ປະຊາຊົນພາຍໃນບ້ານນໍ້າຍອນ ໄດ້ຫຼຸດພົ້ນຈາກຄວາມທຸກຍາກໄປເທື່ອລະກ້າວ.

ໃນໂອກາດທີ່ມີຄວາມໝາຍ-ຄວາມສໍາຄັນນີ້ ທ່ານ ຮອງເລຂາພັກ ແຂວງ ໄດ້ມີຄຳເຫັນໂອ້ລົມ ເຊິ່ງທ່ານໄດ້ສະແດງ ຄວາມຍ້ອງຍໍຊົມເຊີຍ ຕໍ່ກັບໜ່ວຍຮາກຖານການເມືອງ ແລະ ອໍານາດການປົກຄອງບ້ານ ທີ່ໄດ້ຮ່ວມກັນຈັດຕັ້ງວຽກງານຕ່າງໆ ໄດ້ມີຜົນສໍາເລັດຫຼາຍດ້ານ ພ້ອມນັັ້ນ ທ່ານໄດ້ເນັ້ນໜັກໃຫ້ ໜ່ວຍງານກໍ່ສ້າງຮາກຖານ ຕະຫລອດຮອດອຳນາດ ການປົກຄອງບ້ານ ຈົ່ງສືບຕໍ່ສຶກສາອົບຮົມການເມືອງ-ແນວຄິດ ໃຫ້ແກ່ພໍ່-ແມ່ປະຊາຊົນບັນດາເຜົ່າ ໂດຍສະເພາະແມ່ນ ໃຫ້ເຂົາເຈົ້າ ໄດ້ຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກລັດ ໃນການຈັດຕັ້ງປະຕິບັດວຽກງານໃຫ້ບັນລຸຕາມ 4 ເນື້ອໃນ 4 ຄາດໝາຍ ຂອງຂັ້ນເທິງວາງອອກຢ່າງເຂັ້ມງວດ ພ້ອມດຽວກັນນີ້ ທ່ານຍັງຮຽກຮ້ອງໃຫ້ພະນັກງານຮາກຖານ ສົມທົບ ກັບອຳນາດການປົກຄອງບ້ານ ໃນການກໍ່ສ້າງພະນັກງານສືບທອດ ຢ່າງຈະແຈ້ງ ໂດຍການເຕົ້າໂຮມໃຫ້ປະຊາຊົນບັນດາເຜົ່າມີ ຄວາມສາມັກຄີໃຫ້ເປັນປຶກແຜ່ນ ໃນການເອົາໃຈໃສ່ແກ້ໄຂປະກົການຫຍໍ້ທໍ້ຕ່າງໆ ໃຫ້ໝົດໄປ ແລະ ສິ່ງສຳຄັນ ໃນປັດຈຸບັນນີ້ ແມ່ນໃຫ້ເອົາໃຈໃສ່ຕ້ານ ແລະ ຄວບຄຸມການແຜ່ລະບາດຂອງພະຍາດໂຄວິດ 19 ໃຫ້ເຂັ້ມງວດກວ່າເກົ່າ ເພື່ອຮັບປະກັນໃຫ້ແກ່ບ້ານຂອງຕົນປອດໄພຈາກພະຍາດໂຄວິດ 19 ໄດ້ 100% ແລະ ເຮັດໃຫ້ບ້ານນໍ້າຍອນກາຍເປັນ ບ້ານພັດທະນາໃນອານາຄົດ.
ຂ່າວ ນາງ ຕູດ ຄຳພໍໃຈ