ກອງປະຊຸມໃຫຍ່ ຄັ້ງທີ VII ຂອງຜູ້ແທນແນວລາວສ້າງຊາດ ແຂວງຫຼວງພະບາງ ໄດ້ໄຂຂຶ້ນຢ່າງເປັນທາງການ ໃນວັນທີ 16 ມີນາ 2021 ໂດຍການເປັນປະທານຂອງທ່ານ ເອິງ ລໍສະຫວັນ ປະທານແນວລາວສ້າງຊາດແຂວງ ໃຫ້ກຽດເຂົ້າຮ່ວມ ຂອງທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີທ່ານ ຄໍາຂັນ ຈັນທະວີສຸກ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຫຼວງພະບາງ, ຕາງໜ້າພະແນກການ, ອົງການທຽບເທົ່າ, ຕົວແທນຊົນເຜົ່າ-ຊັ້ນຄົນ, ສາສະໜາໃນຂອບເຂດທົ່ວແຂວງ ເຂົ້າຮ່ວມ.


ກອງປະຊຸມໃຫຍ່ຄັ້ງນີ້ ມີຜູ້ແທນເຂົ້າຮ່ວມທັງໝົດ 167 ທ່ານ, ພະສົງ 3 ອົງ, ເພດຍິງ 21 ທ່ານ ໃນນີ້, ມີຜູ້ແທນສົມບູນທັງໝົດ 107 ທ່ານ, ພະສົງ 3 ອົງ ແລະ ເພດຍິງ 14 ທ່ານ, ຜູ້ແທນຖືກເຊີນ 60 ທ່ານ, ຍິງ 7 ທ່ານ ທີ່ເປັນຕົວແທນໃຫ້ແກ່ການຈັດຕັ້ງການເມືອງ-ສັງຄົມ ແລະ ບຸກຄົນຊົນເຜົ່າ, ຊັ້ນຄົນ, ສາສະໜາ, ເພດ, ໄວໃນທົ່ວແຂວງ. ກອງປະຊຸມກໍໄດ້ຮັບຮອງເອົາບົດລາຍງານການເມືອງທັງສອງພາກ, ບົດສໍາຫຼວດການນໍາພາລວມ ຂອງຄະນະກໍາມະການແນວລາວສ້າງຊາດແຂວງ ສະໄໝທີ VI ແລະ ຮັບຮອງເອົາການສະເໜີແຕ່ງຕັ້ງຄະນະກໍາມະການແນວລາວສ້າງຊາດແຂວງ ແລະ ຄະນະປະຈໍາແນວລາວສ້າງຊາດແຂວງຊຸດທີ VII ຈໍານວນ 70 ທ່ານ, ເພດຍິງ 7 ທ່ານ ໃນນີ້ມີ ພະສົງລະ 3 ອົງ ແລະ ກອງປະຊຸມຄັ້ງປະຖົມມະລຶກເປັນເອກະສັນຮັບຮອງເອົາຄະນະປະຈໍາແນວລາວສ້າງຊາດແຂວງ 5 ທ່ານ, ຍິງ 1 ທ່ານ ປະກອບມີ: ທ່ານ ສຸກັນ ບຸນຍົງ ເປັນປະທານ ທ່ານ ອ່ອນສີ ຈ່າເພຍວ່າ, ທ່ານ ນາງ ດວງມະນີ ອິນດາລັກ, ທ່ານ ທອງວັນ ຈັນນິລາ ເປັນຮອງປະທານ ແລະ ທ່ານ ອານຸໄຊ ສະຫວັດ ເປັນຄະນະ. ໃນນີ້ຍັງໄດ້ຮັບຮອງເອົາ ທ່ານ ທອງວັນ ຈັນນິລາ ເປັນປະທານຄະນະຕິດຕາມ ກວດກາ ຄະນະກໍາມະການແນວລາວສ້າງຊາດແຂວງ, ທ່ານ ດາວຈອນ ສຸກສິດທິ ເປັນຮອງ ແລະ ທ່ານ ນາງ ປານຄໍາ ເຮືອງວິເສດ ເປັນຄະນະ.


ໃນວາລະກອງປະຊຸມ ກໍໄດ້ຈັດໃຫ້ມີພິທີປະດັບຫຼຽນຊັ້ນຕ່າງໆ ໃຫ້ບຸກຄົນທີ່ໄດ້ປະກອບສ່ວນຜົນງານວຽກງານແນວລາວສ້າງຊາດຂອງແຂວງ ຈໍານວນ 5 ທ່ານ ໂດຍແມ່ນທ່ານ ປອ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ແລະ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ໃຫ້ກຽດປະດັບຢ່າງສົມກຽດ.


ໂອກາດດັ່ງກ່າວທ່ານ ປອ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ກໍໄດ້ມີຄໍາເຫັນຊີ້ນໍາ ເຊິ່ງທ່ານໄດ້ເນັ້ນໃຫ້ຄະນະຊຸດໃໝ່ເອົາການສຶກສາອົບຮົມການເມືອງ-ແນວຄິດເປັນຕົ້ນຕໍ, ຕິດພັນກັບການຈັດຕັ້ງເຜີຍແຜ່ເຊື່ອມຊຶມແນວທາງ, ແຜນນະໂຍບາຍ, ມະຕິ, ຄຳສັ່ງຂອງພັກ, ກົດໝາຍ, ແຜນພັດທະນາເສດຖະກິດ-ສັງຄົມ ຂອງລັດມາຈັດຕັ້ງ, ເຊື່ອມຊຶມໃຫ້ຖັນແຖວສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ, ປະຊາຊົນບັນດາເຜົ່າ, ຊັ້ນຄົນ, ສາສະໜາ ແລະ ເພດ-ໄວ ພາຍໃນແຂວງ ໄດ້ຮັບຮູ້ເຂົ້າໃຈຢ່າງກວ້າງຂວາງ; ເປັນຄັນທຸງເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວພາຍໃນແຂວງ ມີຄວາມສາມັກຄີເປັນປຶກແຜ່ນ ປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ເປັນເຈົ້າການຊຸກຍູ້ຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃນທົ່ວແຂວງ ເປັນຂະບວນກວ້າງຂວາງ, ສຸມໃສ່ວຽກງານສ້າງບ້ານ ແລະ ຄອບຄົວສາມັກຄີສາມັກຄີປອງດອງໃຫ້ໄດ້ຕາມຄາດໝາຍທີ່ວາງໄວ້, ຕ້ອງເປັນເຈົ້າການປຸກລະດົມໃນການປົກປັກຮັກສາ ແລະ ເສີມຂະຫຍາຍຮີດຄອງປະເພນີອັນດີງາມຂອງແຕ່ລະເຜົ່າຕາມຮີດ 12 ຄອງ 14 ທີ່ປະຊາຊົນບັນດາເຜົ່າ ເຄີຍປະຕິບັດກັນມາໃຫ້ຢູ່ຄູ່ບ້ານເມືອງຕະຫຼອດ.
ຂ່າວ: ເພັດສາຄອນ ສິມມະວົງ