ມີເດຍລາວແຂວງໄຊສົມບູນ ຂ່າວ: ແກ່ນຈັນ ທຳມະນີ ໃນຕອນເຊົ້າຂອງວັນທີ 14 ກັນຍາ 2021 ນີ້ ຮາກຖານກຳມະບານພະແນກຖະແຫຼງຂ່າວ, ວັດທະນະທະ ແລະ ທ່ອງທ່ຽວ ແຂວງໄຊສົມບູນ ໄດ້ຈັດກອງປະຊຸມ ປະເມີນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2021 ຂຶ້ນ ທີ່ຫ້ອງປະຊຸມຂອງພະແນກ ໂດຍການເຂົ້າຮ່ວມເປັນປະທານ ຂອງສະຫາຍ ໄມພອນ ເສນາມົນນີ, ຄະນະໜ່ວຍພັກ-ຜູ້ຊີ້ນຳວຽກງານອົງການຈັດຕັ້ງມະຫາຊົນ ພ້ອມດ້ວຍສະມາຊິກກຳມະບານ ພາຍໃນຮາກຖານຂອງພະແນກ ເຂົ້າຮ່ວມ.

ໃນວາລະດຳເນີນກອງປະຊຸມ ສະຫາຍ ສຸກສັນ ອ້ວນລິທິກຸນ ປະທານຮາກຖານກຳມະບານຂອງພະແນກ ໄດ້ຂື້ນຜ່ານເນື້ອໃນ ແລະ ມາດຖານ ຂໍ້ແຂ່ງຂັນ 5 ເປັນເຈົ້າ ຕາມບົດແນະນຳສະບັບເລກທີ 04/ ສກລ ຂອງສູນກາງສະຫະພັນກຳມະບານລາວ. ຈາກນັ້ນ ກໍ່ໄດ້ດຳເນີນການປະເມີນຜົນການຈັດຕັ້ງເນື້ອໃນຂໍ້ແຂ່ງຂັນ 5 ເປັນເຈົ້າ ເພື່ອສຳຫຼວດ, ຕີລາຄາໃຫ້ຄະແນນແກ່ຕົນເອງ ແລະ ຄະນະການຕີລາຄາ ທັງນີ້ກໍ່ເພື່ອຮັບປະກັນທາງດ້ານຄຸນນະພາບ ໂດຍຖືກຕ້ອງສອດຄ່ອງກັບມາດຖານ 5 ເປັນເຈົ້າໃຫ້ມີປະສິດທິພາບໃນການປະເມີນ ເຊິ່ງການຈັດຕັ້ງປະຕິບັດບັ້ນດຳເນີນການປະເມີນຄັ້ງນີ້ ສາມາດບັນລຸຜົນສຳເລັດຕາມເປົ້າໝາຍທຸກປະການ ແລະ ບັນດາສະມາຊິກກຳມະບານພາຍໃນຮາກຖານມີຄະແນນສະເລ່ຍນັບແຕ່ 89% ຂື້ນໄປ.

ຄະນະດຽວກັນກອງປະຊຸມຄັ້ງນີ້ ກໍ່ເພື່ອເສີມຂະຫຍາຍກຳລັງແຮງສັງລວມ ຂອງສະມາຊິກກຳມະບານ, ພາຍໃນພະແນກຖະແຫຼງຂ່າວດ ວັດທະນະທຳ ແລະ ທ່ອງທ່ຽວ ໃຫ້ມີສະຕິຕື່ນຕົວ, ເປັນເຈົ້າການໃນການພັດທະນາຕົນເອງ ຢ່າງຮອບດ້ານ ແລະ ຕັ້ງໜ້າເຂົ້າຮ່ວມຈັດຕັ້ງປະຕິບັດແນວທາງຂອງພັກ, ປະຕິບັດແຜນພັດທະນາເສດຖະກິດ-ສັງຄົມຂອງລັດ ຕິດພັນກັບຂະບວນການຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານລາວ ທີ່ວາງອອກໃນແຕ່ລະໄລຍະ ໃຫ້ປາກົດຜົນເປັນຈິງ.

ໂອກາດດັ່ງກ່າວ ສະຫາຍ ໄມພອນ ເສນາມົນນີ, ຄະນະພັກ-ຜູ້ຊີ້ນຳອົງການຈັດຕັ້ງມະຫາຊົນຂອງພະແນກ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງສະຫາຍໄດ້ເນັ້ນໃຫ້ສະມາຊິກກຳມະບານ ພາຍໃນພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະໜັກງານຜູ້ທີ່ມີຄວາມຮູ້ຄວາມສາມາດໃນທຸກດ້ານ, ສືບຕໍ່ຄົ້ນຄ້ວາຮ່ຳຮຽນແນວທາງຂອງພັກ, ລະບຽບກົດໝາຍຂອງລັດ ໃຫ້ສາມາດກຳໄດ້ຢ່າງເລິກເຊິ່ງ ເພື່ອພັດທະນາຕົນເອງໃຫ້ກາຍເປັນສະມາຊິກກຳມະບານດີເດັ່ນ ແລະ ມີຄວາມເຂັ້ມແຂງໃນທຸກດ້ານ, ສິ່ງສຳຄັນແມ່ນປະຕິບັດຕາມມະຕິຄຳສັ່ງຂອງຂັ້ນເທິງ, ກົດລະບຽບຂອງກຳມະບານລາວທີ່ວາງອອກຢ່າງເຂັ້ມງວດ ພ້ວມກັນປະກອບສ່ວນທີ່ສຳຄັນ ເຂົ້າໃນການພັດທະນາວຽກງານຂົງເຂດ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ມີບາດກ້າວພົ້ນເດັ່ນດີຂຶ້ນເລື້ອຍໆ ແລະ ພ້ອມກັນຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໃນຕໍ່ໜ້າ ໃຫ້ປະກົດຜົນເປັນຈິງ.