ມີເດຍລາວແຂວງສາລະວັນ ໂດຍທິດລານີ ໂຄດໂຍທາ. ເພື່ອປະກອບສ່ວນຊ່ວຍເຫລືອເຂົ້າໃນວຽກງານຕ້ານ, ສະກັດກັ້ນ, ປ້ອງກັນ ການແຜ່ລະບາດພະຍາດໂຄວິດ-19 ທີ່ກຳລັງແຜ່ລະບາດໃນທົ່ວໂລກ, ທົ່ວປະເທດລາວ ເວົ້າສະເພາະກໍ່ຄືແຂວງສາລະວັນ ທີ່ກຳລັງພົບກັບບັນຫາພະຍາດໂຄວິດ-19. ຍ້ອນເຫັນໄດ້ຄວາມສຳຄັນຄືແນວນັ້ນ ທາງເຈົ້າອະທິການວັດບ້ານສະນຶມນອກ ເມືອງເລົ່າງາມ ແຂວງສາລະວັນ ໄດ້ນຳເອົາເຄື່ອງອຸປະໂພກ-ບໍລິໂພກ ມາມອບໃຫ້ແຂວງສາລະວັນ ປະກອບມີ: ຜ້າອັດປາກ-ອັດດັງ 1 ແກັດ ຈຳນວນ 50 ກັບ,​ ເຈວລ້າງມື 20 ອັນ, ນໍ້າດື່ມ 20 ແກັດ, ກາເຟ 1 ແກັດ ແລະຊາ 5 ຖົງ ລວມມູນຄ່າທັງໝົດເກືອບ 3 ລ້ານກີບ. ໂດຍການມອບຂອງ ພຣະອາຈານ ພອນສະຫວັນ ທອງມະນີນິນ ເຈົ້າອະທິການວັດໂພສີສຸວັນນະຣາມ ບ້ານສະນຶມນອກ ເມືອງເລົ່າງາມ ພ້ອມຄະນະສົງ ຮັບໂດຍ ທ່ານ ສົມໃຈ ອຸ່ນຈິດ ຮອງເຈົ້າແຂວງ ຫົວໜ້າຄະນະສະເພາະກິດໂຄວິດ-19.

ໃນໂອກາດດຽວກັນນີ້ ທ່ານ ກໍ່ໄດ້ສະແດງຄວາມຂອບໃຈ ມາຍັງເຈົ້າອະທິການວັດ ທີ່ໃຫ້ການຊ່ວຍເຫລືອທັງເຄື່ອງອຸປະໂພກ-ບໍລິໂພກ ໃຫ້ແຂວງສາລະວັນ. ເຄື່ອງຈຳນວນດັ່ງກ່າວ ແມ່ນຈະນຳໄປມອບໃຫ້ກັບໜ່ວຍງານແພດໝໍ, ທະຫານ, ຕຳຫວດ ແລະໜ່ວຍງານອື່ນໆ ທີ່ປະຕິບັດໜ້າທີ່ຕົວຈິງໃຫ້ເກີດຜົນປະໂຫຍດສູງສຸດ. ພິທີດັ່ງກ່າວແມ່ນຈັດຂຶ້ນໃນວັນທີ 1 ພຶດສະພາ 2021 ທີ່ຫ້ອງວ່າການແຂວງສາລະວັນ.