ມີເດຍລາວແຂວງຈຳປາສັກ ຂ່າວ-ພາບ: ຖວທ ປະທຸມພອນ
ໃນວັນທີ 10 ພຶດສະພາ 2021 ນີ້, ທ່ານ ວຽງສະໄໝ ສີລິພອນພັນ ເຈົ້າເມືອງໆປະທຸມພອນພ້ອມຄະນະສະເພາະກິດຂັ້ນເມືອງ ແລະ ພາກສ່ວນທີ່ກ່ຽວຂ້ອງໄດ້ລົງເຄື່ອນໄຫວເຮັດວຽກຢູ່ກຸ່ມ ສະໂນດ, ກຸ່ມສະໜິງ, ກຸ່ມພະໂພ, ເພື່ອມອບເຄື່ອງຮັບໃຊ້ເຂົ້າໃນວຽກງານຕ້ານ ແລະ ສະກັດກັ້ນການລະບາດຂອງເຊື້ອພະຍາດໂຄວິດ-19 ເປັນຕົ້ນແມ່ນ ຜ້າອັດປາກ-ດັງຈໍານວນ 17.000 ກັບເພື່ອນໍາໄປແຈກຢາຍໃຫ້ຊຸມຊົນແອອັດຫຼືກຸ່ມສ່ຽງ ພ້ອມທັງເນັ້ນໜັກໃຫ້ອຳນາດການປົກຄອງທຸກຂັ້ນໃນກຸ່ມບ້ານດັ່ງກ່າວຕ້ອງໄດ້ເອົາໃຈໃສ່ຕິດຕາມ, ກວດກາ ແລະ ລາດຕະເວນຕາມຈຸດຕ່າງໆ , ກວດກາບຸກຄົນເຂົ້າ-ອອກຢ່າງເປັນປະຈໍາ.

ໂອກາດນີ້ ພາກສ່ວນທີ່ກ່ຽວຂ້ອງກໍ່ໄດ້ຍົກໃຫ້ເຫັນສະພາບການແຜ່ລະບາດຂອງພະຍາດໂຄວິດ -19 ຢູ່ໃນທົ່ວໂລກ ກໍ່ຄືພາກພື້ນ ແລະ ສາກົນ ທີ່ພວມລະບາດຢ່າງຮ້າຍແຮງ ສະເພາະຢູ່ພາຍໃນແຂວງຈຳປາສັກກໍ່ມີຜູ້ຕິດເຊື້ອຈໍານວນບໍ່ໜ້ອຍ . ສະນັ້ນເຮັດແນວໃດເພື່ອບໍ່ໃຫ້ເມືອງຂອງພວກເຮົາມີກໍລະນີຕິດເຊື້ອດັ່ງກ່າວ ທຸກໆຄົນໃນສັງຄົມ ຕ້ອງໄດ້ມີສ່ວນຮ່ວມເປັນເຈົ້າການເພີ່ມທະວີຢ່າງເຂັ້ມງວດເປັນຕົ້ນ: ເຄັ່ງຄັດກວດກາບຸກຄົນເຄື່ອນໄຫວເຂົ້າ-ອອກໃນບ້ານ ແລະ ກຸ່ມບ້ານ , ບຸກຄົນໃດຖ້າບໍ່ຈຳເປັນປະຕິບັດວຽກຢູ່ພາຍນອກ ແມ່ນໃຫ້ຢຸດເຊົາການໄປມາຫາສູ່ກັນ , ຄະນະພັກອຳນາດການປົກຄອງບ້ານຕ້ອງສືບຕໍ່ເຝົ້າລະວັງການແຜ່ລະບາດຂອງພະຍາດໂຄວິດ-19 ແລະ ພະຍາດທີ່ມາກັບລະດູການເປັນຕົ້ນ: ພະຍາດໄຂ້ຍຸງລາຍ ອື່ນໆ.