ມີເດຍລາວແຂວງຈຳປາສັກ ຂ່າວ-ພາບ: ພຸດທະສິນ ວົງວິໄລທອງ
ລະຫວ່າງວັນທີ 6-7 ພຶດສະພາ 2021 ນີ້ທ່ານນາງ ຄຳພູ ລິດທິສັກ ເລຂາພັກເມືອງ ເຈົ້າເມືອງໆໂຂງ ພ້ອມຄະນະສະເພາະກິດຂັ້ນເມືອງ ແລະ ພາກສ່ວນທີ່ກ່ຽວຂ້ອງໄດ້ລົງເຄື່ອນໄຫວເຮັດວຽກຢ່າງເຄັ່ງຮ້ອນຢູ່ກຸ່ມ ລົບປາກດີ, ກຸ່ມຄອນ ເພື່ອມອບເຄື່ອງຮັບໃຊ້ເຂົ້າໃນວຽກງານຕ້ານ ແລະ ສະກັດກັ້ນການລະບາດຂອງເຊື້ອພະຍາດໂຄວິດ-19 ພ້ອມທັງເນັ້ນໜັກໃຫ້ອຳນາດການປົກຄອງທຸກຂັ້ນໃນກຸ່ມບ້ານດັ່ງກ່າວຕ້ອງໄດ້ເອົາໃຈໃສ່ຕິດຕາມ, ກວດກາ ແລະ ລາດຕະເວນຕາມຈຸດຕ່າງໆ , ກວດກາບຸກຄົນເຂົ້າ-ອອກຢ່າງເຂັ້ມງວດ.
ໂອກາດນີ້ ພາກສ່ວນທີ່ກ່ຽວຂ້ອງກໍ່ໄດ້ຍົກໃຫ້ເຫັນສະພາບການແຜ່ລະບາດຂອງພະຍາດໂຄວິດ -19 ຢູ່ໃນທົ່ວໂລກ ກໍ່ຄືພາກພື້ນ ແລະ ສາກົນ ທີ່ພວມລະບາດຢ່າງຮ້າຍແຮງ.

ສະເພາະຢູ່ພາຍໃນແຂວງຈຳປາສັກກໍ່ມີຜູ້ຕິດເຊື້ອເພີ່ມຂຶ້ນເລື້ອຍໆ . ສະນັ້ນເຮັດແນວໃດເພື່ອບໍ່ໃຫ້ເມືອງໂຂງຂອງພວກເຮົາມີກໍລະນີຕິດເຊື້ອດັ່ງກ່າວ ທຸກໆຄົນໃນສັງຄົມ ຕ້ອງໄດ້ມີສ່ວນຮ່ວມເປັນເຈົ້າການເພີ່ມທະວີຢ່າງເຂັ້ມງວດເປັນຕົ້ນ: ເຄັ່ງຄັດກວດກາບຸກຄົນເຄື່ອນໄຫວເຂົ້າ-ອອກໃນບ້ານ ແລະ ກຸ່ມບ້ານ , ບຸກຄົນໃດຖ້າບໍ່ຈຳເປັນປະຕິບັດວຽກຢູ່ພາຍນອກ ແມ່ນໃຫ້ຢຸດເຊົາການໄປມາຫາສູ່ກັນ , ເປັນເຈົ້າການສອດແນມບຸກຄົນຕ່າງຖິ່ນທີ່ເຂົ້າມາພັກພາອາໄສໃນບ້ານຂອງຕົນ ທັງນີ້ກໍເພື່ອຫລີກເວັ້ນ ແລະ ຕັດວົງຈອນການນຳເຊື້ອຂອງພະຍາດໂຄວິດ -19.

ຄຽງຄູ່ກັບການປ້ອງກັນ ແລະ ສະກັດກັ້ນການລະບາດຂອງເຊື້ອພະຍາດໂຄວິດ -19 ນັ້ນ .ຄະນະພັກອຳນາດການປົກຄອງບ້ານຕ້ອງສືບຕໍ່ເຝົ້າລະວັງການແຜ່ລະບາດຂອງພະຍາດທີ່ມາກັບລະດູການເປັນຕົ້ນ: ພະຍາດໄຂ້ຍຸງລາຍ, ພະຍາດຖອກທ້ອງ ແລະ ອື່ນໆ ຕ້ອງໂຄສະນາສຸຂາສຶກສາໃຫ້ພໍ່ແມ່ປະຊາຊົນທຸກຊັ້ນຄົນໝັ່ນທຳຄວາມສະອາດພາຍໃນສະຖານທີ່ພັກ-ເຊົາ ປະຕິດບັດ 5 ປໍເປັນປະຈຳຢ່າງເຄັ່ງຄັດ.