ວັນທີ 31 ມີນາ 2021, ທີ່ຫ້ອງວ່າການແຂວງຈຳປາສັກ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະໄດ້ຕ້ອນຮັບ ທ່ານ ມະໄລທອງ ກົມມະສິດ ປະທານອົງການກວດສອບແຫ່ງລັດ ພ້ອມຄະນະ ໃນໂອກາດມາເຄື່ອນໄຫວວຽກງານ ຢູ່ແຂວງຈຳປາສັກ.
ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງການຕ້ອນຮັບທ່ານປະທານອົງການກວດສອບແຫ່ງລັດ ແລະ ຄະນະ ໃນການເຄື່ອນໄຫວວຽກງານ ຢູ່ແຂວງຈຳປາສັກ ເທື່ອນີ້, ພ້ອມກັນນັ້ນກໍ່ໄດ້ສະແດງຄວາມຊົມເຊີຍຕໍ່ທ່ານ ມະໄລທອງ ກົມມະສິດ ທີ່ໄດ້ຮັບຄວາມໄວ້ເນື້ອ ເຊື່ອໃຈ ຈາກການນຳພັກ-ລັດ ຮັບການແຕ່ງຕັ້ງເປັນປະທານອົງການກວດສອບແຫ່ງລັດ ແລະ ຂໍໃຫ້ທ່ານ ປະທານ ພ້ອມດ້ວຍຄະນະນໍາຂອງອົງການກວດສອບແຫ່ງລັດ ແລະ ອົງການກວດສອບປະຈໍາພາກແຕ່ລະຂັ້ນປະຕິບັດສິດ, ພາລະບົດບາດ ແລະ ໜ້າທີ່ຂອງຕົນ ດ້ວຍຄວາມຮັບຜິດຊອບສູງ.


ໂອກາດນີ້ ທ່ານ ມະໄລທອງ ກົມມະສິດ ປະທານອົງການກວດສອບແຫ່ງລັດ ໄດ້ສະແດງຄວາມຂອບໃຈ ແລະ ຊົມເຊີຍຕໍ່ຜົນສຳເລັດ ຂອງກອງປະຊຸມໃຫຍ່ ຄັ້ງທີ XI ຂອງພັກ ແລະກອງປະຊຸມໃຫຍ່ ຄັ້ງທີ VIII ຜູ້ແທນອົງຄະນະພັກແຂວງຈຳປາສັກ, ຊົມເຊີຍຕໍ່ການຊີ້ນຳ-ນໍາພາຂອງການນຳແຂວງຈຳປາສັກ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງຜ່ານມາເຫັນໄດ້ເຖິງການປ່ຽນແປງໃນທາງທີ່ດີຂື້ນ. ພ້ອມກັນນັ້ນ ກໍໄດ້ແຈ້ງຈຸດປະສົງຕົ້ນຕໍໃນການມາເຄື່ອນໄຫວວຽກງານ ຢູ່ແຂວງຈຳປາສັກ ເທື່ອນີ້ແມ່ນເພື່ອ ກ່າວລາໜ້າທີ່ການນຳແຂວງຈຳປາສັກ ຕໍ່ທ່ານເຈົ້າແຂວງ ແລະ ຈະໄດ້ ພົບປະໂອ້ລົມຄະນະນຳ, ພະນັກງານພາຍໃນອົງການກວດສອບປະຈໍາພາກໃຕ້ ຢູ່ແຂວງຈຳປາສັກ ນຳອີກ.

ຂ່າວ: ທັດຊະນະ