ມີເດຍລາວແຂວງຈຳປາສັກ ຂ່າວ: ທັດຊະນະ. ເພື່ອຕິດຕາມ, ກວດກາ ການຈັດຕັ້ງປະຕິບັດມາດຕະການ ປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ເວົ້າລວມ, ເວົ້າສະເພາະ ແມ່ນການສະກັດກັ້ນ ແລະປ້ອງກັນ ຈຸດສູນກາງ ຍຸດທະສາດ ຂອງແຂວງຈຳປາສັກ. ນະຄອນປາກເຊ ທີ່ ເປັນເມືອງເທດສະບານຂອງ ແຂວງຈຳປາສັກ, ເປັນສູນກາງທາງດ້ານເສດຖະກິດ-ສັງຄົມ ແລະ ເປັນໃຈກາງ ທາງຜ່ານ ບັນດາແຂວງພາກໃຕ້ ແລະ ພາກພື້ນ, ເປັນຕົວເມືອງ ທີ່ມີພົນລະເມືອງ ອາໃສຢູ່ຢ່າງ ໜາແໜ້ນ, ສະເລ່ຍ 700 ຄົນ/ກິໂລຕາແມັດ, ໂດຍເຫັນໄດ້ຄວາມອັນຕະລາຍຂອງພະຍາດດັ່ງກ່າວ ໃນວັນທີ 27 ເມສາ 2021, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ນະຄອນປາກເຊ ໂດຍມີ ຄະນະ ສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ໃນການຕ້ານການລະບາດພະຍາດໂຄວິດ-19 ຂັ້ນແຂວງ, ນະຄອນ ແລະພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ບົວລີ ເພັດສົງຄາມ ເຈົ້ານະຄອນປາກເຊ ໄດ້ລາຍງານ ສະພາບການຈັດ ຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ຢູ່ນະຄອນປາກເຊ ໃຫ້ຮູ້ວ່າ: ອົງການປົກຄອງນະຄອນ ໄດ້ເອົາໃຈໃສ່ ຜັນຂະຫຍາຍ ຄຳສັ່ງຂອງນາຍົກລັດຖະມົນຕີ, ຄໍາສັ່ງຂອງເຈົ້າແຂວງໆຈຳປາສັກ ແລະນິຕິກຳຕ່າງໆ ຂອງ ຄະນະສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ຕ້ານການລະບາດພະຍາດໂຄວິດ-19 ແຂວງຈຳປາສັກ ຕິດພັນກັບການນໍາພາ-ຊີ້ນໍາ, ຈັດຕັ້ງ ປະຕິບັດ ແຜນພັດທະນາ ເສດຖະກິດ-ສັງຄົມ.

ໄດ້ສຸມທຸກກໍາລັງແຮງ ຈັດຕັ້ງປະຕິບັດ ຢ່າງຕັ້ງຫນ້າ ແລະ ເຂັ້ມງວດ, ເຊັ່ນ: ໄດ້ຜັນຂະຫຍາຍ ຄໍາສັ່ງ, ແຈ້ງການຂອງແຂວງອອກເປັນ ຄໍາແນະນໍາ ແລະ ແຈ້ງການຂອງ ນະຄອນ 3 ສະບັບ; ສຸມໃສ່ການໂຄສະນາ, ສຶກສາອົບຮົມ ແລະ ເຜີຍແຜ່ນິຕິກໍາ, ຂໍ້ມູນຂ່າວສານ ລົງສູ່ທ້ອງຖີ່ນ ຮາກຖານ, ກຸ່ມບ້ານ ແລະ ບ້ານ, ໂດຍນໍາໃຊ້ຫຼາຍຊ່ອງທາງໃນການໂຄສະນາ ຕິດພັນການສຸຂະສຶກສາປະຊາສໍາພັນ ແນະນໍາວິທີການປ້ອງກັນຕົນເອງ, ຄອບຄົວ, ຫມູ່ເພື່ອນ ບໍ່ໃຫ້ຕິດເຊື້ອ ແລະ ແຜ່ເຊື້ອ ຕາມຄໍາແນະນໍາຂອງວິຊາການກ່ຽວຂ້ອງ, ວຽກນີ້ ໄດ້ຈັດຕັ້ງປະຕິບັດ ຄົບໃນ 42 ບ້ານ, 67 ຄຸ້ມບ້ານ ທົ່ວນະຄອນ. ຈັດຕັ້ງຈຸດກວດກາ ການເຂົ້າ-ອອກເມືອງ, ນະຄອນປາກເຊ ຢູ່ 4 ເສັ້ນທາງ ເຂົ້າ-ອອກ ນະຄອນປາກເຊ, ຈຸດກວດກາກາຂອງບ້ານ, ກວດກາຄົນເຂົ້າ-ອອກ ບ້ານ-ເຮືອນ ໃນແຕ່ລະບ້ານ ຈໍານວນ 50 ຈຸດ, ໄດ້ກວດກາວັດແທກອຸນຫະພູນ, ການນໍາໃຊ້ຜ້າອັດ ປາກ ແລະ ຄັດກອງການເດີນທາງ ເກັບຂໍ້ມູນ ເຂົ້າ-ອອກນະຄອນປາກເຊ ຂອງແຕ່ລະຄົນທີ່ເດີນທາງຜ່ານ; ພ້ອມນັ້ນ, ໄດ້ລົງຕິດຕາມ, ກວດກາ ການຊື້ຂາຍຢູ່ຕະຫຼາດ, ບັນດາຮ້ານຄ້າຕ່າງໆ ເພື່ອປ້ອງກັນການສວຍໂອກາດກັກຕູນ ແລະ ຂື້ນລາຄາສິນຄ້າ ປະຕິບັດ ໄດ້ 57 ຮ້ານ, ພົບຮ້ານລະເມີດຂາຍເຫຼົ້າ-ເບຍ 11 ຮ້ານ ໄດ້ສ້າງບົດບັນທຶກກ່າວເຕືອນ ຕາມລະບຽບ ການ.


ໂອກາດນີ້, ທ່ານເຈົ້າແຂວງຈຳປາສັກ ໄດ້ມີຄຳເຫັນໂອ້ລົມ ແລະໃຫ້ທິດຊີ້ນຳແກ່ ອົງການປົກຄອງນະຄອນປາກເຊ ຈະຕ້ອງໄດ້ເພີ່ມທະວີ ຄໍາສັ່ງຂອງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ແລະ ຄຳສັ່ງແນະນຳ ຂອງຄະນະເລຂາທິການສູນກາງພັກ ເລກທີ 87/ຄລສພ, ລົງວັນທີ 25 ເມສາ 2021 ວ່າດ້ວຍການ ເພີ່ມທະວີ ຄວາມຮັບຜິດ ຊອບຂອງຄະນະພັກ ແຕ່ລະຂັ້ນ ໃນການສືບຕໍ່ສະກັດກັ້ນ, ປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19; ທຸກພາກສ່ວນ ຈະຕ້ອງ ມີແຜນໃນການສະກັດກັ້ນ, ກຳນົດຈຸດກວດກາ ການເຂົ້າ-ອອກເມືອງ, ບ້ານ. ໂດຍສະເພາະ ບ້ານ ທີ່ຕິດເຊື້ອ, ເປົ້າໝາຍທີ່ມີຄວາມສ່ຽງ ພ້ອມກັນນັ້ນ, ກໍ່ຕ້ອງໄດ້ກວດກາ ພະນັກງານ ຢູ່ໃນ ສຳນັກງານ ອົງການ ເພື່ອສະກັດກັ້ນ ບໍ່ໃຫ້ມີການລະບາດພະຍາດ ອອກທົ່ວສັງຄົມ. ເອົາໃຈໃສ່ບັນຫາການໂຄສະນາ, ສຶກສາອົບຮົມ, ສ້າງຄວາມຮັບຮູ້ເຂົ້າໃຈ ແລະ ປະຕິບັດຖືກຕ້ອງ ວິທີການປ້ອງກັນພະຍາດ, ເຮັດເປັນປະຈຳ ແລະ ກາຍເປັນວັດທະນະທຳໃໝ່ ໃນການດຳລົງຊີວິດ ປະຈຳວັນ ໃສ່ຜ້າປິດປາກ-ດັງ ທົ່ວສັງຄົມ ໃຫ້ໄດ້ 100%, ລ້າງມື ແລະ ເວັນໄລຍະຫ່າງ ທາງສັງຄົມ.