ມີເດຍລາວແຂວງຫຼວງພະບາງ ໃນວັນທີ 13 ກັນຍາ 2021 ນີ້ ທ່ານ ຄໍາຂັນ ຈັນທະວີສຸກ ເຈົ້າແຂວງຫລວງພະບາງ ພ້ອມດ້ວຍຄະນະສະເພາະກິດເພື່ອປ້ອງກັນ, ຄວບຄຸມ, ແກ້ໄຂການລະບາດ ພະຍາດໂຄວິດ-19 ຂັ້ນແຂວງ ໄດ້ລົງຢ້ຽມຢາມກວດກາການກະກຽມສູນກັກກັນ ນາສ້າງເຫວີຍ ເປັນສູນທີ 4 ຂອງແຂວງ ຢູ່ນະຄອນຫຼວງພະບາງ ສາມາດຮອງຮັບແຮງງານໄດ້ຫຼາຍກວ່າ 100 ຄົນ, ເຊິ່ງປະກອບມີ 3 ຕຶກ ຄື: ຕຶກກິລາເດີ່ນໃນຮົ່ມ, ຕຶກບານບ້ວງ ແລະຕຶກບານສົ່ງເພື່ອສ້າງເປັນສູນກັກກັນເພື່ອຮັບເອົາແຮງງານລາວ ທີ່ມາຈາກຕ່າງປະເທດ ແລະຕ່າງແຂວງເຂົ້າມາກັກຕົວ ແລະເກັບຕົວຢ່າງຄົ້ນຫາເຊື້ອພະຍາດ ໂຄວິດ-19.

ສຳລັບຕຶກເດີ່ນໃນຮົ່ມສ້າງເປັນຕຶກກັກຕົວ 14 ວັນ ແລະໄດ້ແຍກເປັນ 2 ຫ້ອງຄື: ເພດຍິງ ແລະຊາຍ, ຫລັງຈາກກັກຕົວຄົບ 14 ວັນ ຢູ່ເດີ່ນໃນຮົ່ມແລ້ວ ຈະໄດ້ແຍກໄປກັກຕົວອີກ 7 ວັນ ຄື: ຢູ່ຕຶກເດີ່ນບານບ້ວງ ແມ່ນຕຶກກັກຕົວ 7 ວັນ ຂອງເພດຍິງ ແລະຕຶກເດີ່ນບານສົ່ງແມ່ນຕຶກກັກຕົວ 7 ວັນຂອງເພດຊາຍ ເມື່ອກັກຕົວຄົບຕາມທີ່ຄະນະສະເພາະກິດປ້ອງກັນ, ຄວບຄຸມ, ສະກັດກັ້ນການລະບາດ ໂຄວິດ-19 ວ່າງອອກແລ້ວ ໃຫ້ແພດໝໍມາສັກວັກຊິນ ແລ້ວກັບບ້ານໃຫ້ກັກຕົວອີກ 14 ວັນ, ຖ້າມີອາການຜິດປົກກະຕິໃຫ້ຕິດຕໍ່ພົວພັນຫາສະເພາະກິດຂັ້ນບ້ານ, ຂັ້ນເມືອງເພື່ອກວດຫາເຊື້ອ.

ໃນປັດຈຸບັນທົ່ວແຂວງຫລວງພະບາງ ມີສູນກັກກັນແຮງງານ ທັງຫມົດ 16 ສູນ, ແລະ​ 5ໂຮງແຮມ ໃນນີ້ຢູ່ບັນດາເມືອງ ມີ 11 ສູນ, ນະຄອນ ຫຼວງພະບາງ ມີ 1 ສູນ ຄື: ສູນຫ້ວຍມາວ, ສູນຂອງແຂວງ ປະກອບ ມີ 4 ສູນ ຄື: ສູນກັກກັນຫໍຄອຍສະຫນາມບິນເກົ່າ ໄດ້ຍົກເປັນສູນປິ່ນປົວແຮງງານທີ່ຕິດເຊື້ອທີ່ບໍ່ມີອາການ ຫລືມີອາການເບົາບາງ, ສູນວິທະຍາໄລວິທະຍາສາດສຸຂະພາບ ບ້ານທາດຫຼວງ, ສູນໂຮງຮຽນການເມືອງການປົກຄອງ ແລະສູນນາສ້າງເຫວີຍ.