ວັນທີ 23 ມີນາ 2021 ນີ້ ທ່ານ ຄໍາຂັນ ຈັນທະວີສຸກ ກໍາມະການສູນກາງພັກ ເລຂາພັກແຂວງ ເຈົ້າແຂວງຫຼວງພະບາງ ແລະ ສະຫາຍ ພັນເອກ ແປ້ນຄໍາ ບຸດຈັນແພງ ກໍາມະການພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ ພ້ອມຄະນະ ໄດ້ລົງຊຸກຍູ້ຕິດຕາມກວດກາໂຄງການກໍ່ສ້າງກອງພັນນ້ອຍ 414 ທະຫານແຂວງຫຼວງພະບາງ ຢ່າງເປັນທາງການ. ໂດຍມີຄະນະພັກ – ຄະນະບັນຊາກົມກອງດັ່ງກ່າວເຂົ້າຮ່ວມ.


ໃນໂອກາດດັ່ງກ່າວ ທ່ານ ອາຊາງ ທັນສະຫວັດ ປະທານບໍລິສັດ ທັນສະຫັວດ ກໍ່ສ້າງຄົບວົງຈອນ ຈໍາກັດ ເປັນຜູ້ຮັບເໝົາໂຄງການກໍ່ສ້າງກອງພັນນ້ອຍ 414 ກໍໄດ້ນໍາພາຄະນະຕິດ ຕາມກວດກາການກໍ່ສ້າງກອງພັນ 414 ທະຫານແຂວງຫຼວງພະບາງ ທີ່ໄດ້ຖືກຍົກຍ້າຍຈາກບ່ອນເກົ່າເຊິ່ງຕັ້ງຢູ່ເຂດບ້ານນາເມືອງ ເມືອງນານ ມາຕັ້ງຢູ່ບ່ອນໃໝ່ເຂດທົ່ງຜາເຈຍ ເມືອງນານແຂວງຫຼວງພະບາງ.

ເຊິ່ງທ່ານ ຫົວໜ້າບໍລິສັດ ໄດ້ໃຫ້ຮູ້ວ່າ: ໂຄງການກໍ່ສ້າງປະກອບມີວຽກຂອງຫ້ອງການອາຄານ 2 ຊັ້ນ 1 ຫຼັງ, ສະໂມສອນກອງພັນ 1 ຫຼັງ, ເຮືອນນອນຄະນະກອງ 1 ຫຼັງ, ເຮືອນນອນອ້າຍນ້ອງໂສດ 8 ຫຼັງ, ເຮືອນນອນປ້ອງກັນ 1 ຫຼັງ, ເຮືອນນອນສໍານັກກອງພັນ 1 ຫຼັງ, ເຮືອນຄົວກິນ ແລະ ກິນເຂົ້າ 1 ຫຼັງ, ຫ້ອງການກອງຮ້ອຍ 3 ຫຼັງ, ຫ້ອງນໍ້າ 5 ຫຼັງ, ສາງອຸປະໂພກ 1 ຫຼັງ, ກະລ່າລົດ 1 ຫຼັງ, ສາງຍຸດໂທ 1 ຫຼັງ, ທາງເຂົ້າຄ້າຍບຸກເບີກປັບດິນ ແລະ ຖົມດິນ, ອ່າງເກັບນໍ້າ ແລະ ຕາຂ່າຍນໍ້າ, ຕາຕ່າຍໄຟຟ້າ, ປະຕູໂຂງກໍາແພງ, ຮົ້ວໜາມໝາກຈັບ. ເຊິ່ງໄດ້ເລີ່ມຕົ້ນລົງມືກໍ່ສ້າງມາແຕ່ວັນທີ 23 ຕຸລາ 2018 ແລະ ຄາດວ່າຈະໃຫ້ສໍາເລັດໂຄງການກໍ່ສ້າງ ໃນວັນທີ 29 ມິຖຸນາ 2022 ດ້ວຍມູນຄ່າການກໍ່ສ້າງທັງໝົດ 35.184.000.000 ກີບ ໂດຍແມ່ນກະຊວງປ້ອງກັນປະເທດ ກົມໃຫ່ຍພະລາທິການກອງທັບເປັນຜູ້ໃຫ້ທືນຊ່ວຍເຫຼືອໂຄງການກໍ່ສ້າງກອງພັນດັ່ງກ່າວ ປັດຈຸບັນແມ່ນສໍາເລັດແລ້ວ 80 ກວ່າເປີເຊັນ.
ພາບ-ຂ່າວ: ໄຊຍະສອນ ລັດຕະນະວົງ