ມີເດຍລາວແຂວງຄຳມ່ວນ ໃນວັນທີ 15 ພຶດສະພາ 2021 ຜ່ານມານີ້ທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ, ທ່ານ ແກ້ວລັນດອນ ຈັນທະປານີ ເຈົ້າເມືອງໆທ່າແຂກ, ມີບັນດາພະແນກການ ແລະ ພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມໄດ້ພ້ອມກັນລົງເຄື່ອນໄຫວຊຸກຍູ້ ,ຕິດຕາມ,ການປ້ອງກັນ ແລະ ຄວບຄຸມການລະບາດຂອງພະຍາດໂຄວິດ-19 ຢູ່ບໍລິສັດ ຊີໂນ-ອາກຣີ ໂປຕາສ ຈຳກັດ ບ້ານດົງໃຕ້ເມືອງທ່າແຂກ ແຂວງຄຳມ່ວນ ໂດຍການຕ້ອນຮັບຂອງ ທ່ານ ຖົງ ຢົງ ເຫີງ ປະທານ ບໍລິສັດ ຊີໂນ-ອາກຣີ ໂປຕາສ ຈຳກັດພ້ອມດ້ວຍພະນັກງານວິຊາການ ພາຍໃນບໍລິສັດດັ່ງກ່າວເຂົ້າຮ່ວມ.

ໃນການລົງເຄື່ອນໄຫວຄັ້ງນີ້ທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນພ້ອມດ້ວຍຄະນະ ກໍ່ໄດ້ຮັບຟັງການລາຍງານກ່ຽວກັບການປ້ອງກັນການລະບາດຂອງພະຍາດໂຄວິດ – 19 ພາຍໃນບໍລິສັດເປັນຕົ້ນແມ່ນການຕັ້ງດ່ານກວດກາຄົນເຂົ້າ-ອອກຂອງໂຮງງານ ພ້ອມທັງເຮັດຮົ້ວອ້ອມເຂດໂຮງງານ ເພື່ອຄວບຄຸມການເຂົ້າ-ອອກ ແລະ ວັດແທກອຸນຫະພູມ, ໃຊ້ຜ້າປິດປາກ-ດັງ , ມີປ້າຍຂອງບໍລິສັດ ຈຶ່ງສາມາດເຂົ້າ-ອອກໄດ້ , ທາງບໍລິສັດໄດ້ທຳການຂ້າເຊື້ອພາຍໃນຫໍພັກຄົນງານ, ຫ້ອງອາຫານ ແລະ ສະຖານທີ່ຕ່າງໆ ຢ່າງເປັນເປັນກະຕິ.

ນອກຈາກນີ້ແລ້ວຍັງໄດ້ເຊີນທາງຄະນະສະເພາະຂັ້ນແຂວງ ລົງມາເຜີຍແຜ່ໃຫ້ຄວາມຮູ້ ແລະ ຂໍ້ມູນຕ່າງໆ ເພື່ອໃຫ້ພະນັກງານ ແລະ ກຳມະກອນພາຍໃນໂຮງງານໄດ້ຮັບຮູ້ ແລະ ສາມາດປ້ອງກັນການລະບາດຂອງພະຍາດດັ່ງກ່າວ ແລະ ສັກຢາວັກຊິນໄປພ້ອມໆກັນ . ດ້ານສະພາບລວມຂອງບໍລິສັດ ແມ່ນບໍລິສັດ ຊີໂນ-ອາກຣີ ໂປຕາສ ຈຳກັດ ບ້ານດົງໃຕ້ ເມືອງທ່າແຂກ ແຂວງຄຳມ່ວນໄດ້ຈົດທະບຽນສ້າງຕັ້ງໃນເດືອນພຶດສະພາ 2009 ມາຮອດປະຈຸບັນໄດ້ບັນລຸການຜະລິດເກືອໂປຕາສ 250.000 ໂຕນ / ປີ.

ໃນປີ 2021 ຈະສຳເສັດໂຄງການກໍ່ສ້າງ 1 ລ້ານໂຕນທຳອິດ ແລະ ຈະເປັນໂຄງການຜະລິດເກືອໂປຕາສລະດັບ 1 ລ້ານໂຕນທຳອິດໃນຂົງເຂດໃໝ່ຂອງການຜະລິດເກືອໂປຕາສຢູ່ໃນໂລກ ເພາະວ່າໃນອາຊີ ຖືວ່າເປັນເຂດໃໝ່ໃນການຜະລິດເກືອໂປຕາສ ໃນຕໍ່ໜ້າບໍລິສັດກໍ່ຈະສ້າງໂຄງການເກືອໂປຕາສ 3 ລ້ານໂຕນ / ປີ ເພື່ອປະກອບສ່ວນຢ່າງຕັ້ງໜ້າ ໃນການຜະລິດກະສິກຳ ເພື່ອສ້າງຄວາມຜາສຸກໃຫ້ແກ່ປະຊາຊົນທັງສອງຊາດ.

ໃນໂອກາດດຽວກັນທ່ານ ວັນໄຊ ພອງສະຫວັນ ເຈົ້າແຂວງໆຄຳມ່ວນ ກໍ່ໄດ້ກ່າວມີຄຳເຫັນໂອລົມ ເຊິ່ງທ່ານໄດ້ເນັ້ນໜັກໃຫ້ ເອົາໃຈໃສຍົກລະດັບຄວາມຮູ້ – ຄວາມສາມາດໃຫ້ແກ່ພະນັກງານກຳມະກອນ ກໍ່ຄືທາງດ້ານພາສາ,ໃນຕໍ່ໜ້າບໍລິສັດຈະຂະຫຍາຍໂຄງການແມ່ນໃຫ້ປະສານສົມທົບກັບທາງພະແນກແຮງງານ ແລະ ສະຫວັດດີການ-ສັງຄົມແຂວງ ເພື່ອນຳເອົາແຮງງານລາວເຂົ້າມາທຳງານໃນໂຄງການທີ່ກຳລັງຂະຫຍາຍ . ໄປພ້ອມໆກັບການປະຕິບັດທາງດ້ານສະຫວັດດີການສັງຄົມຂອງພະນັກງານກຳມະກອນ.

ແມ່ນໃຫ້ທາງບໍລິສັດສຶກສາອົບຮົມໃຫ້ພະນັກງານກຳມະກອນໄດ້ຮັບຮູ້, ເຂົ້າໃຈ ແລະ ມີຄວາມຮັບຜິດຊອບຕໍ່ໜ້າທີ່ໃນການຈັດຕັ້ງປະຕິບັດຕາມການມອບໝາຍ ເພື່ອແນໃສ່ໃຫ້ໄດ້ບັນລຸຕາມແຜນການ ຫຼື ໄດ້ລື່ນແຜນການ, ພົວພັນປະສານສົມທົບກັບປະຊາຊົນບັນດາເຜົ່າທີ່ຢູ່ອ້ອມຂ້າງໄດ້ມີສ່ວນຮ່ວມໃນການຈັດຕັ້ງປະຕິບັດວຽກງານ. ສຳລັບບໍ່ໃດ ທີ່ໄດ້ຂຸດຄົ້ນແລ້ວ ທາງບໍລິສັດຕ້ອງໄດ້ປິດບໍ່ ຕາມຂໍ້ຕົກລົງທີ່ໄດ້ກຳນົດໄວ້. ຈາກນັ້ນ ທ່ານ ເຈົ້າແຂວງໆ ຄຳມ່ວນ ພ້ອມດ້ວຍຄະນະ ກໍ່ໄດ້ຢ້ຽມຊົມພາຍໃນໂຄງການ ແລະ ຮັບຟັງການອະທິບາຍຂັ້ນຕອນຕ່າງໆ ໃນການຜະລິດຂອງໂຮງງານ ແລະ ຕິດຕາມເບິ່ງພາກຂະຫຍາຍຂອງໂຄງການ ໂດຍໄດ້ຮັບຊົມແຜນຝັງ ແລະ ການກໍ່ສ້າງພາຍໃນໂຄງການດັ່ງກ່າວ.