ມີເດຍລາວແຂວງບໍ່ແກ້ວ
ວັນທີ 16 ມິຖຸນາ 2021 ນີ້, ທ່ານ ປອ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໆບໍ່ແກ້ວ ພ້ອມດ້ວຍທີມງານຄະນະກຳມະການປ້ອງກັນ ແລະ ຄວມຄຸມໄພພິບັດຂັ້ນແຂວງ,​ ລົງຊຸກຍູ້ຕິດຕາມໄພພິບັດຢູ່ເມືອງປາກທາ, ໃຫ້ການຕ້ອນຮັບໂດຍທ່ານ ສຸໄລ ດວງຜາຄຳ ກຳມະການພັກແຂງ ເລຂາພັກເມືອງ ເຈົ້າເມືອງປາກທາ, ພ້ອມດ້ວຍຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ.

ການລົງຊຸກຍູ້ຕິດຕາມໄພພິບັດໃນຄັ້ງນີ້ກໍ່ໄດ້ຮັບຟັງການລາຍງານຫຍໍ້ໃນການຕິດຕາມໄພພິ ບັດຢູ່ຂັ້ນເມືອງ ຈາກທ່ານ ເຈົ້າເມືອງໆປາກທາ ເຊິ່ງທ່ານ ໃຫ້ຮູ້ວ່າ: ກ່ຽວກັບການຕິດຕາມສະພາບຝົນຕົກໜັກ ແລະ ຜົນເສຍຫາຍຂອງປະຊາຊົນພາຍໃນເມືອງປາກທາໃນວັນທີ 14 ມິຖຸນາຜ່ານມາ ປະຊາຊົນບາງບ້ານໄດ້ຮັບຜົນກະທົບຈາກຝົນຕົກໜັກເປັນຕົ້ນ: ນ້ຳຖ້ວມບ່ອນຕົກເຂົ້າກ້ານາປີມີ 193 ຄອບຄົວ, ແນວພັນເຂົ້າປູກເສຍຫາຍ 2.800 ກິໂລກຼາມ, ສວນສາລີເສຍຫາຍ 16,5 ເຮັກຕາ ມີ 38 ຄອບຄົວ, ສວນໝາກເດືອຍເສຍຫາຍ 10 ເຮັກຕາ ມີ 12 ຄອບຄົວ, ນ້ຳນອງໄຫຼສຸຫີນທັບຖົມໃສ່ນາ ແລະ ດິນເຊາະເຈືອນ 5 ໄລ່ ມີ 10 ຄອບຄົວ, ຖ້ວມໜອງປາ 5 ໜອງທີ່ໄດ້ປ່ອຍປາໄປແລ້ວ 4.000 ໂຕ, ຄອງເໝືອງເຊາະເຈືອນ 3 ຈຸດ, ອາຄານຄອງໝອງມີການເຊາະເຈືອນ ແລະ ຝາຍແບບປະຖົມປະຖານເສຍຫາຍ 100% ມີຈຳນວນ 30 ແຫ່ງ,

ນອກຈາກນີ້ແລ້ວຍັງມີເສັ້ນທາງເລກທີ 2243 ແຕ່ປາກທາ ຫາ ຫ້ວຍແອ່ນ-ກ້ອນຕື່ນ ມີຄວາມຍາວ 34,5 ກິໂລແມັດ ເສັ້ນທາງແມ່ນເປເພຫຼາຍ, ດິນເຊາະເຈືອນຖົມໜ້າທາງ, ເສັ້ນທາງເປັນບວກ, ເປັນຂຸມເລິກຫຼາຍຈຸດ, ທໍ່ລະບາຍນ້ຳຂາດບາງຈຸດ, ຮ່ອງລະບາຍນ້ຳຕັນບາງບ່ອນ ລົດແມ່ນບໍ່ສາມາດສັນຈອນໄປມາໄດ້ ເປັນຕົ້ນແມ່ນ: ຂົວຂ້າມນ້ຳຫ້ວຍລຳແພນ, ຂົວຂ້າມນ້ຳບ້ານຫ້ວຍສາກ, ຫ້ວຍຂະຍູມ, ຫ້ວຍບ້ານເກົ່າເຂດບ້ານຫາດສະ, ຈຸດຫ້ວຍສະ ນ້ຳເຊາະທາງເຈືອນເປັນຕາຝັງ ແລະ ເສັ້ນທາງບ້ານຫ້ວຍໂຄດຂາດ 1 ຈຸດ ແລະ ສຳລັບຜົນເສຍຫາຍທາງຊັບສິນ ແລະ ຊີວິດ ນ້ຳແມ່ນໄດ້ໄຫຼສຸງົວຂອງປະຊາຊົນບ້ານໃຫຍ່ປາກທາ ຕາຍ 1 ໂຕ ແລະ ສູນຫາຍ 1 ໂຕ ນອກນີ້ຍັງມີປະຊາຊົນບ້ານຜາຄອຍເສຍຊີວິດ 1 ຄົນ ອາຍຸ 40 ປີ ເພດຊາຍ ສາເຫດຍ້ອນຜູ້ກ່ຽວໄປນອນຢູ່ແຄມນ້ຳຫ້ວຍເຮັດໃຫ້ນ້ຳປ່າໄຫຼສຸຮຸນແຮງຢ່າງກະທັນຫັນ ໂອກາດທີ່ທ່ານເຈົ້າແຂວງລົງມາຕິດຕາມໃນຄັ້ງນີ້ຍັງໄດ້ສະເໜີ: ຂໍແນວພັນເຂົ້າປູກນາປີ, ແນວພັນໝາກເດືອຍ ແລະ ສາລີແຂງ ໃຫ້ປະຊາຊົນຜູ້ທີ່ໄດ້ຮັບຜົນກະທົບ,​ແກ້ໄຂເສັ້ນທາງທີ່ເປເພແຕ່ປາກທາ ຫາ ຫ້ວຍແອ່ນ ແລະ ກ້ອນຕື່ນ,​ແກ້ໄຂນະໂຍບາຍຕໍ່ຜູ້ທີ່ໄດ້ຮັບຜົນກະທົບ, ຂໍງົບປະມານສ້ອມແປງເໜືອງ-ຝາຍຊົນລະປະທານ ແລະ ງົບປະມານຟື້ນຟຸເນື້ອທີນາ ທີ່ຖືກຫີນແຮ່ທັບຖົມ.

ໂອກາດດັ່ງກ່າວທ່ານ ເຈົ້າແຂວງໄດ້ມີຄຳເຫັນຊີ້ນຳໃຫ້ແໜງການທີ່ກ່ຽວຂ້ອງຮີບຮ້ອນເລັ່ງມືຈັດຕັ້ງປະຕິບັດໃນປະສານງານເພື່ອຊອກຫາວິທີການແກ້ໄຂຊ່ວຍເຫຼືອໃຫ້ມັນທັນກັບສະພາບການ ແລະ ເວລາ, ຕິດພັນກັບການປ້ອງກັນ, ຄວບຄຸມ, ແລະ ແກ້ໄຂການລະບາດຂອງພະຍາດໂຄວິດ19 ບໍ່ໃຫ້ມີການເຜີຕົວ ຫຼື ຖືເບົາເດັດຂາດ ໃນສະພາບທີ່ຍັງມີການລະບາດຂອງພະຍາດໂຄວິດ 19.
ພາບ-ຂ່າວ: ວັນນະເດດ ວິໄລຄຸນ.