ມີເດຍລາວແຂວງເຊກອງ ຂ່າວ: ນ. ກາດແກ້ວ ໄຊສົງຄາມ ພາບ: ທ. ເພັດສົມພອນ ພົມມະສອນ
ຂະບວນການສັກວັກຊີນ ປ້ອງກັນພະຍາດປອດອັກເສບສາຍພັນໃໝ່ ໂຄວິດ 19 ໃຫ້ກຸ່ມເປົ້າໝາຍທີ່ມີຄວາມສ່ຽງ ຢູ່ແຂວງເຊກອງ ໄດ້ຈັດຂື້້ນໃນຕອນເຊົ້າຂອງວັນທີ 11 ມີນາ 2021 ນີ້ ທີ່ໂຮງໝໍແຂວງເຊກອງ, ໃຫ້ກຽດເຂົ້າຮ່ວມໂດຍທ່ານ ດົງເພັດ ພະຍົນ ຮອງເລຂາພັກແຂວງ ຮອງປະທານສະພາປະຊາຊົນແຂວງ, ມີອໍານວຍການໂຮງໝໍແຂວງ, ມີຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ 19 ຂັ້ນແຂວງ ພ້ອມດ້ວຍພາກສ່ວນທີ່ກ່ຽວຂ້ອງຂັ້ນແຂວງ ແລະມີພະນັກງານແພດໝໍພາຍໃນໂຮງໝໍແຂວງເຂົ້າຮ່ວມ.

ທ່ານ ດຣ. ຄຳໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງເຊກອງ ໄດ້ກ່າວວ່າ: ປະຈຸບັນແຂວງເຊກອງໄດ້ຮັບວັກຊິນເພື່ອສ້າງພູມຄຸ້ມກັນພະຍາດອັກເສຍປອດສາຍພັນໃຫມ່ໂຄວິດ 19 ຊຸດທຳອິດຈາກກະຊວງສາທາລະນະສຸກຈຳນວນ 4.000 ໂດສ,ໃນນີ້ແບ່ງໃຫ້ໂຮງໝໍແຂວງ ຈຳນວນ 1,000 ໂດສ, ເມືອງລະມາມ ຈຳນວນ 600 ໂດສ, ເມືອງທ່າແຕງ ຈຳນວນ 900 ໂດສ,ເມືອງກະລຶມຈຳນວນ 600 ໂດສ ແລະເມືອງດາກຈຶງຈຳນວນ 900 ໂດສ, ໂດຍເປົ້າໝາຍສັກວັກຊິນໃນຄັ້ງນີ້ ແມ່ນກຸ່ມຄົນທີ່ມີ ອາຍຸ 18-60 ປີ, ຜູ້ທີ່ມີສຸຂະພາບແຂງແຮງ ( ບໍ່ມີພະຍາດປະຈຳຕົວທີ່ຮ້າຍແຮງ ), ພະນັກງານແພດໝໍທຸກຄົນ, ການນໍາ,ພະນັກງານທີ່ປະຈໍາຢູ່ດ່ານ ແລະກັງລັງ ປກສ, ປກຊ ທີ່ເຮັດວຽກມີຄວາມສ່ຽງ, ໂດຍໄດ້ກຳນົດຈຸດການສັກວັກຊິນເພື່ອສ້າງພູມຄຸ້ມກັນພະຍາດ ໂຄວິດ-19 ຢູ່ແຂວງເຊກອງ ມີ 04 ຈຸດ ຄື: ຈຸດໂຮງໝໍແຂວງເຊກອງ, ໂຮງໝໍເມືອງທ່າແຕງ, ໂຮງໝໍເມືອງກະລຶມ ແລະ ໂຮງໝໍເມືອງດາກຈຶງ, ສຳຫຼັບສະຖານທີ່ ຈຸດໂຮງໝໍແຂວງເຊກອງ ແມ່ນເລີ່ມແຕ່ວັນທີ 11-15 ມີນາ 2021, ເລີ່ມແຕ່ເວລາ 8:00 – 16:00 ຕາມໂມງລັດທະການ, ໂດຍມີພະນັກງານແພດໝໍທີ່ຮັບຜິດຊອບສັກວັກຊິນມີ 03 ທີມຄື: ( ທີມ A, B ແລະ C ) ທິມລະ 6ຄົນ, ທັງໝົດຈຳນວນ 18 ຄົນ,ສຳຫຼັບວິທີການສັກວັກຊິນ ຜູ້ໜຶ່ງຈະໄດ້ຮັບວັກຊິນ 02 ເຂັມ ໂດຍຫ່າງກັນຈາກເຂັມທີ1 ຫາເຂັມທີ2 ເປັນເວລາ 28 ວັນ, ເຊີ່ງການສັກວັກຊິນໃນຊູດທີ1 ນີ້ຈະໃຫ້ສຳເລັດກ່ອນປີໃໝ່ລາວ


ໃນໂອກາດນີ້ ທ່ານ ດຣ ຄຳໄຫຼ ສັນຕິພິມ ຫົວໜ້າພະແນກສາທາລະນະສູກແຂວງເຊກອງ ໄດ້ຮຽກຮ້ອງໃຫ້ຄະນະຮັບຜິດຊອບ, ພະນັກງານແພດໝໍ ແລະ ທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນເອົາໃຈໃສ່ຈັດຕັ້ງປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບສູງ ເປັນຕົ້ນແມ່ນການຄຸ້ມຄອງ ແລະ ນໍາໃຊ້ວັກຊີນປ້ອງກັນພະຍາດ ໂຄວິດ 19 ໃນຄັ້ງນີ້ ໃຫ້ເກີດປະໂຫຍດສູງສຸດ. ພ້ອມນັ້ນ ທ່ານຍັງໄດ້ຮຽກຮ້ອງໃຫ້ຜູ້ທີ່ນອນຢູ່ໃນກຸ່ມເປົ້າໝາຍ ຈົ່ງພ້ອມກັນມາຮັບວັກຊີນ ໃຫ້ສໍາເລັດຕາມເວລາທີ່ໄດ້ກໍານົດໄວ້