ມີເດຍລາວແຂວງເຊກອງ ໃນວັນທີ 26 ພຶດສະພາ ຜ່ານມາ ທ່ານ ດຣ ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸດແຂວງ, ຮອງຫົວໜ້າຄະນະສະເພາກິດຂັ້ນແຂວງໄດ້ຖະແຫຼງຂ່າວກ່ຽວກັບການເຝົ້າລະວັງ, ປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ເຊິ່ງທ່ານໄດ້ກ່າວວ່າ: ມາຮອດປະຈຸບັນເຖິງວ່າແຂວງເຊກອງຍັງບໍ່ມີກໍລະນີຕິດເຊື້ອເພີ່ມກໍຕາມ ແຕ່
ດ້ວຍຄວາມເປັນຫ່ວງເປັນໄຍຕໍ່ສຸຂະ ພາບ ແລະຊີວິດຂອງປະຊາຊົນບັນດາເຜົ່າ, ກໍຄືຊາວຕ່າງປະເທດທີ່ດໍາລົງຊີວິດຢູ່ແຂວງເຊກອງ ພວກເຮົາຕ້ອງພ້ອມກັນເພີ່ມທະວີຄວາມຮັບຜິດຊອບ, ມີສະຕິລະວັງຕົວ ແລະປະຕິບັດມາດຕະການປ້ອງກັນຕ່າງໆໃຫ້ເຂັ້ມງວດກວ່າເກົ່າ.

ພ້ອມນີ້ ຍັງໄດ້ສືບຕໍ່ປິດການເດີນທາງເຂົ້າ-ອອກແຂວງ (ຫ້າມຄົນແຂວງເຊກອງເດີນທາງໄປຕ່າງແຂວງ ແລະຫ້າມຄົນຕ່າງແຂວງເດີນທາງເຂົ້າມາແຂວງເຊກອງ) ນັບແຕ່ວັນທີ 21 ພຶດສະພາ-4 ມິຖຸນາ 2021, ສໍາລັບການເດີທາງລະຫວ່າງເມືອງຕໍ່ເມືອງພາຍໃນແຂວງແມ່ນສາມາດໄປໄດ້ ແຕ່ຕ້ອງມີເອກະສານຢັ້ງຢືນ ແລະປະຕິບັດມາດຕະການທີ່ຄະນະສະເພາະກິດວາງອອກຢ່າງເຂັ້ມງວດ; ຖ້າວ່າຜູ້ທີ່ຄວາມຈໍາເປັນເດີນທາງເຂົ້າມາແຂວງເຊກອງ ກໍຕ້ອງໄດ້ຈໍາກັດບໍລິເວນເປັນຈົນຄົບ 14 ວັນ; ສືບຕໍ່ປິດຮ້ານເສີມສວຍ, ຮ້ານຕັດຜົມ, ສະຖານທີ່ທ່ອງທ່ຽວ, ສວນອາຫານ ແລະຮ້ານເກມທຸກປະເພດ; ຫ້າມຈັດກອງປະຊຸມ, ໂຮມຊຸມນຸມ ຫຼື ຈັດກິດຈະກໍາຕ່າງໆທີ່ມີຜູ້ເຂົ້າຮ່ວມຫຼາຍກວ່າ 10 ຄົນຂຶ້ນໄປ, ຖ້າກໍລະນີຕ້ອງຈັດກິດຈະກໍາໃດໜຶ່ງທີ່ຈໍາເປັນ ຕ້ອງໄດ້ຮັບອະນຸຍາດຈາກຄະນະສະເພາະກິດຂັ້ນສູນກາງ, ຂັ້ນແຂວງ ແລະປະຕິບັດມາດຕະການປ້ອງກັນຢ່າງເຂັ້ມງວດ; ຫ້າມຈັດງານລ້ຽງສ້າງສັນ ຫຼື ຊຸມແຊວທຸກຮູບແບບຕາມສະຖານທີ່ຕ່າງໆ.

ທ່ານ ຄໍາໄຫຼ ສັນຕິພູມ ໄດ້ກ່າວອີກວ່າ: ຕໍ່ໜ້າສະພາບການດັ່ງກ່າວ ຂໍຮຽກຮ້ອງໃຫ້ນິຕິບຸກຄົນ, ບຸກຄົນ ແລະທຸກພາກສ່ວນເພີ່ມທະວີຄວາມເຂັ້ມງວດໃນການປະຕິບັດມາດຕະການປ້ອງກັນການຕິດເຊື້ອ ແລະການແຜ່ເຊື້ອດ້ວຍການເອົາໃຈໃສ່ວັດແທກອຸນຫະພູມ, ຮັກສາໄລຍະຫ່າງຢ່າງໜ້ອຍ 1 ແມັດ, ໃສ່ຜ້າອັດປາກ-ດັງ, ລ້າງມືດ້ວຍນໍ້າສະອາດໃສ່ສະບູ ຫຼື ເຈວລ້າງມືຢ່າງເປັນປົກກະຕິ; ພ້ອມກັນນີ້ ກໍຂໍຮຽກຮ້ອງມາຍັງປະຊາຊົນຜູ້ທີ່ໄດ້ຮັບການສັກວັກຊິນເຂັມທີ 1 ແລ້ວ ໃຫ້ໄປຮັບວັກຊິນເຂັມທີ 2 ເພື່ອເຮັດໃຫ້ການສັກວັກຊິນປ້ອງກັນໂຄວິດ-19 ບັນລຸຕາມເປົ້າໝາຍ; ສໍາລັບຂະແໜງການກ່ຽວຂ້ອງ ກໍຕ້ອງໄດ້ເປັນເຈົ້າການໂຄສະນາເຜີຍແຜ່ຄໍາສັ່ງແນະນໍາ, ແຈ້ງການຕ່າງໆ ແລະການປ້ອງກັນພະຍາດໂຄວິດ-19 ໃຫ້ປະຊາຊົນຮັບຮູ້ຢ່າງທົ່ວເຖິງ ໂດຍສະເພາະສະຖານທີ່ບໍລິການ ແລະບ່ອນທີ່ມີຄົນແອອັດ ເພື່ອພ້ອມກັນຈັດຕັ້ງປະຕິບັດຢ່າງເປັນເຈົ້າການ. ຂ່າວ:ພຸດທະສອນ