ມີເດາວແຂວງເຊກອງ (ຂ່າວ-ພາບ: ສັນຍາ) ພິທີປະກາດພະນັກງານການນໍາແຂວງເຊກອງພັກການ-ຮັບອຸດໜູນບໍານານ ແລະ ມອບ-ຮັບໜ້າທີ່ປະທານສະພາປະຊາຊົນແຂວງເຊກອງ (ສພຂ) ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 13 ກັນຍາ 2021 ນີ້ ໂດຍການເຂົ້າຮ່ວມຂອງທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ມີຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ຄະນະປະຈໍາສະພາປະຊາຊົນແຂວງ, ຫົວໜ້າ-ຮອງພະແນກ, ຫ້ອງການ, ອົງການທຽບເທົ່າ, ສສຊ-ສສຂ ແລະພະນັກງານວິຊາການເຂົ້າຮ່ວມ.

ໃນພິທີ ທ່ານ ບຸນຫຼາຍ ບຸດທິ ຄະນະປະຈໍາພັກແຂວງ, ຫົວໜ້າຄະນະຈັດຕັ້ງແຂວງ ແລະ ທ່ານ ນາງ ຄໍາໄພ ວິໄລສານ ຄະນະປະຈໍາ, ເລຂາທິການສະພາປະຊາຊົນແຂວງ ໄດ້ຜັດປ່ຽນກັນຂຶ້ນຜ່ານມະຕິຕົກລົງຂອງຄະນະເລຂາທິ ການສູນກາງພັກ, ຂໍ້ຕົກລົງຂອງທ່ານເຈົ້າແຂວງເຊກອງ ແລະ ມະຕິຕົກລົງຂອງຄະນະປະຈໍາສະພາປະຊາຊົນແຂວງ ໃນນີ້: ຄະນະເລຂາທິການສູນກາງພັກ ຕົກລົງໃຫ້ສະຫາຍ ພອນເພັດ ຄິວລະວົງ ອະດີດຮອງເລຂາພັກແຂວງ, ປະທານສະພາປະຊາຊົນແຂວງ, ສະຫາຍ ນີສອນ ວືອິນຢາວ ອະດີດກໍາມະການພັກແຂວງ, ຮອງປະທານສະພາປະຊາຊົນແຂວງ ອອກພັກການຮັບອຸດໜູນ-ບໍານານ ແລະຄະນະປະຈໍາສະພາປະຊາຊົນແຂວງ ຕົກລົງໃຫ້ທ່ານ ສົມແປງ ແດນເມືອງນອນ ຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ, ທ່ານ ຄໍາຈັງ ແຈ້ງຈະເລີນ ຮອງປະທານຄະນະກໍາມະການຍຸຕິທໍາ ແລະ ປກຊ-ປກສ ສະພາປະຊາຊົນແຂວງ ອອກພັກການ-ຮັບອຸດໜູນບໍານານ ເລີ່ມແຕ່ງວດ III (ເດືອນ 7,8,9) ປີ 2021 ເປັນຕົ້ນໄປ.

ຫຼັງຈາກນັ້ນ ກໍໄດ້ຜ່ານບົດບັນທຶກ ແລະເຊັນມອບ-ຮັບໜ້າທີ່ລະຫວ່າງ ທ່ານ ພອນເພັດ ຄິວລະວົງ ອະດີດຮອງເລຂາພັກແຂວງ, ປະທານສະພາປະຊາຊົນແຂວງເຊກອງຊຸດທີ I ກັບ ທ່ານ ດົງເພັດ ພະຍົນ ຮອງເລຂາພັກແຂວງ, ປະ ທານສະພາປະຊາຊົນແຂວງ ຊຸດທີ II.

ໃນໂອກາດນີ້, ທ່ານ ເຫຼັກໄຫຼ ສີວິໄລ ກໍໄດ້ມີຄໍາເຫັນສະແດງຄວາມຂອບອົກຂອບໃຈ ແລະຍ້ອງຍໍຊົມເຊີຍມາຍັງທ່ານອະດີດຮອງເລຂາພັກແຂວງ ແລະ ພະນັກງານການນໍາຂອງແຂວງທີ່ໄດ້ອຸທິດເຫື່ອແຮງ, ສະຕິປັນຍາ, ຄວາມຮູ້ຄວາມສາມາດນໍາພາ-ຊີ້ນໍາເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດ ກໍຄືແຂວງເຊກອງຕະຫຼອດໄລຍະຜ່ານມາ. ພ້ອມນີ້ ທ່ານເຈົ້າແຂວງຍັງໄດ້ຊີ້ນໍາໃຫ້ປະທານສະພາປະຊາຊົນແຂວງຜູ້ໃໝ່ ແລະຄະນະ ສືບຕໍ່ເຮັດໜ້າທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນຢ່າງແທ້ຈິງໃນການຕິດຕາມກວດກາການປະຕິບັດລັດຖະທໍາມະນູນ, ກົດໝາຍ ແລະການປະຕິບັດແຜນພັດທະນາເສດຖະກິດ-ສັງຄົມຂອງບັນດາຂະແໜງການຕ່າງໆ, ສືບຕໍ່ເສີມຂະຫຍາຍຜົນງານດ້ານດີ, ແກ້ໄຂຈຸດອ່ອນ ແລະຂໍ້ຄົງຄ້າງ, ເພີ່ມທະວີການນໍາພາ-ຊີ້ນໍາສຶກສາອົບຮົມການເມືອງນໍາພາແນວຄິດ ເພື່ອແນໃສ່ສ້າງການຫັນປ່ຽນຢ່າງແຂງແຮງດ້ານແນວຄິດຈິນຕະນາການ, ພ້ອມກັນປະຕິບັດໜ້າທີ່ວຽກງານທີ່ພັກ-ລັດ ແລະປະຊາຊົນມອບໝາຍໃຫ້ມີຜົນສໍາເລັດທີ່ດີຂຶ້ນກວ່າເກົ່າ.