ມີເດຍລາວແຂວງເຊກອງ (ຂ່າວ-ພາບ: ແກ້ວໄຊຍະວົງ) ໃນໄລຍະການປະຕິບັດມາດຕະການປິດແຂວງ, ຫ້າມຄົນແຂວງເຊກອງເດີນທາງໄປຕ່າງແຂວງ, ຫ້າມຄົນຕ່າງແຂວງເດີນທາງເຂົ້າມາແຂວງເຊກອງ, ຍົກເວັ້ນກໍລະນີຈໍາເປັນ ແລະໄດ້ຮັບອະນຸຍາດຈາກຄະນະສະເພາະກິດ ເພື່ອເປັນການເຝົ້າລະວັງ ແລະຕ້ານການແຜ່ລະບາດຂອງພະຍາດໂຄວິດ-19 ນັບແຕ່ວັນທີ 23 ເມສາ-27 ພຶດສະພາ 2021 ມີຜູ້ທີ່ໄດ້ຮັບອະນຸຍາດໃຫ້ເດີນເຂົ້າ-ອອກແຂວງເຊກອງທັງໝົດ 19.694 ເທື່ອຄົນ, ໃນນັ້ນເປັນຄົນຕ່າງປະເທດ 943 ເທື່ອຄົນ ແລະມີຜູ້ຖືກຈໍາກັດບໍລິເວນທັງໝົດ 600 ກວ່າຄົນ.

ໃນວັນທີ 27 ພຶດສະພາຜ່ານມາ, ທີ່ພະແນກສາທາລະນະສຸກແຂວງ ທ່ານ ຄໍາໄຫຼ ສັນຕິພູມ ຮອງຫົວໜ້າຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19, ຫົວໜ້າພະແນກສາທາລະນະສຸກແຂວງເຊກອງໄດ້ຖະແຫຼງຂ່າວໃຫ້ຮູ້ວ່າ: ພາຍຫຼັງທີ່ໄດ້ຮັບຄໍາສັ່ງ 15/ນຍ ລົງວັນທີ 21 ເມສາ 2021 ແລະຄໍາສັ່ງເພີ່ມເຕີມຂອງທ່ານເຈົ້າແຂວງເຊກອງ ວ່າດ້ວຍການເພີ່ມທະວີປ້ອງກັນ, ຄວບຄຸມ ແລະຕ້ານການແຜ່ລະບາດຂອງພະຍາດໂຄວິດ-19 ຄະນະສະເພາະກິດ ແລະຂະແໜງການກ່ຽວຂ້ອງຂອງແຂວງ ກໍໄດ້ຮີບຮ້ອນຈັດຕັ້ງປະຕິບັດແຈ້ງປິດຮ້ານກິນດື່ມ-ບັນເທິງ, ຮ້ານຄາຣາໂອເກະ, ຮ້ານເກມ, ສະຖານທີ່ທ່ອງທ່ຽວ, ຫ້າມຈັດງານລ້ຽງ-ງານສ້າງສັນ, ຜັດປ່ຽນກັນປະຈໍາການ ເພື່ອຫຼຸດຜ່ອນຄວາມແອອັດສໍາລັບພະນັກງານ-ລັດຖະກອນ, ຢຸດຕິການຂົນສົ່ງໂດຍສານພາຍໃນແຂວງ, ລະຫວ່າງແຂວງ ແລະຕ່າງປະເທດ, ອະນຸຍາດພຽງແຕ່ການຂົນສົ່ງສິນຄ້າ ແລະຜູ້ທີ່ມີວຽກຈໍາເປັນ, ແຕ່ໃຫ້ປະຕິບັດມາດຕະການຕ່າງໆໃນການປ້ອງກັນພະຍາດໂຄວິດ-19 ຢ່າງເຂັ້ມງວດ ແລະມີໃບອະນຸຍາດຈາກຄະນະສະເພາະກິດ, ຕັ້ງຈຸດກວດຄັດກອງ ເພື່ອຫາກໍລະນີສົງໃສ ແລະກໍລະນີສໍາພັດຢູ່ຈຸດເຊື່ອມຕໍ່ລະຫວ່າງແຂວງຕໍ່ແຂວງຢ່າງເຂັ້ມງວດ.

ທ່ານ ຄໍາໄຫຼ ສັນຕິພູມ ໃຫ້ຮູ້ຕື່ມອີກວ່າ: ສໍາລັບບຸກຄົນທີ່ໄດ້ຮັບອະນຸຍາດໃຫ້ເດີນທາງເຂົ້າ-ອອກແຂວງເຊກອງສ່ວນໃຫຍ່ແມ່ນຄົນຂັບລົດຂົນສົ່ງສິນຄ້າອຸປະໂພກ-ບໍລິໂພກ, ນັກສຶກສາ ແລະແຮງງານທີ່ເດີນທາງມາແຕ່ຕ່າງແຂວງ ແລະຕ່າງປະເທດ, ແຕ່ມີໃບອະນຸຍາດທີ່ຖືກຕ້ອງເປັນຕົ້ນແມ່ນມີບັດຢັ້ງຢືນສັກວັກຊິນ, ໃບຢັ້ງຢືນການກວດສຸຂະພາບ ຫຼື ໃບຢັ້ງຢືນການກວດເຊື້ອພະຍາດ COVID-19 (ຜົນກວດເປັນລົບ) ແລະເອກະສານອື່ນໆທີ່ກ່ຽວຂ້ອງ.