ມີເດຍລາວແຂວງເຊກອງ ຂ່າວ ພຸດທະສອນ ວັນທີ 12 ພຶດສະພາ 2021 ນີ້ ທີ່ສະໂມສອນແຂວງເຊກອງ ໄດ້ປະກາດຍົກຍ້າຍ, ແຕ່ງຕັ້ງ ແລະຊັບຊ້ອນພະນັກງານການນໍາ ແລະພະນັກງານບາງພະແນກການຂັ້ນແຂວງ ໂດຍການເປັນປະທານຂອງທ່ານ ເຫຼັກໄຫຼ ສີວິໄລ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າ-ຮອງພະແນກການ, ອົງການທຽບເທົ່າ ແລະພະນັກງານວິຊາການກ່ຽວຂ້ອງເຂົ້າຮ່ວມ.

ໃນພິທີທ່ານ ບຸນຫຼາຍ ບຸດທິ ຫົວໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍຍົກຍ້າຍ ແລະແຕ່ງຕັ້ງພະນັກງານຄື: ຍົກຍ້າຍທ່ານ ປອ ແພງສີ ສີລາວີ ຄະນະປະຈໍາພັກແຂວງ, ຫົວໜ້າພະແນກອຸດສາຫະກໍາ ແລະການຄ້າແຂວງ, ໄປຮັບໜ້າທີ່ໃໝ່ຢູ່ສະພາປະຊາຊົນແຂວງ; ແຕ່ງຕັ້ງທ່ານ ດາວວີ ສວຍທະລັງສີ ກໍາມະການພັກແຂວງ ເປັນຫົວໜ້າພະແນກອຸດສາຫະກໍາ ແລະການຄ້າແຂວງ; ແຕ່ງຕັ້ງທ່ານ ສຸດສະນະ ສີຫາວົງ ກໍາມະການພັກແຂວງ ເປັນຫົວໜ້າພະແນກເຕັກໂນໂລຊີ ແລະການສື່ສານແຂວງ; ແຕ່ງຕັ້ງທ່ານ ສຸລະພົນ ໝື່ນວິເສດ ເປັນຜູ້ຊ່ວຍວຽກທ່ານເລຂາພັກແຂວງ-ເຈົ້າແຂວງລົງເລິກສັງລວມວຽກງານຂົງເຂດເສດຖະກິດ, ກໍ່ສ້າງຮາກຖານການເມືອງ ແລະພັດທະນາຊົນ ນະບົດ; ແຕ່ງຕັ້ງທ່ານ ສຸພັນ ສາຍເຊກອງ ເປັນຜູ້ຊ່ວຍວຽກທ່ານເຈົ້າແຂວງ ລົງເລິກສັງລວມວຽກງານຂົງເຂດເສດຖະກິດ, ວັດທະນະທໍາ-ສັງຄົມ, ການປົກຄອງ, ກໍ່ສ້າງຮາກຖານການເມືອງ ແລະພັດທະນາຊົນນະບົດ; ແຕ່ງຕັ້ງທ່ານ ວຽງໄຊ ວໍລະສິງ ເປັນຮອງຫົວໜ້າພະແນກເຕັກໂນໂລຊີ ແລະການສື່ສານແຂວງ; ແຕ່ງຕັ້ງທ່ານ ລໍາພັນ ແກ້ວມະຫາໄຊ ເປັນຮອງຫົວໜ້າພະແນກພະລັງງານ ແລະບໍ່ແຮ່ແຂວງ; ແລະແຕ່ງຕັ້ງທ່ານ ຄໍາຈັນ ບຸບຜາທິລັດ ເປັນຮອງປະທານສະຫະພັນກໍາມະບານແຂວງ.

ພ້ອມນີ້ ທ່ານ ນາງ ເພັດດາວອນ ວາດສະຫງ່າ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງກົມການເມືອງສູນກາງພັກ ວ່າດ້ວຍການຍຸບເລີກກະຊວງວິທະຍາສາດ ແລະເຕັກໂນໂລຊີ ແລະຂໍ້ຕົກລົງຂອງທ່ານເຈົ້າແຂວງ ວ່າດ້ວຍຊັບຊ້ອນພະນັກງານ-ລັດຖະກອນ ທີ່ຮັບຜິດຊອບວຽກງານວິທະຍາສາດ ແລະເຕັກໂນໂລຊີ ໄປຂຶ້ນກັບ ວຽກງານເຕັກໂນໂລຊີ ແລະການສື່ສານ, ວຽກງານອຸດສາຫະກໍາ ແລະການຄ້າ, ວຽກງານພະລັງງານ ແລະບໍ່ແຮ່, ວຽກງານສຶກສາ ແລະກິລາ ແລະວຍກງານກະສິກໍາ ແລະປ່າໄມ້ທັງໝົດ 18 ທ່ານ, ຍິງ 7 ທ່ານ.

ໃນໂອກາດນີ້, ທ່ານ ເຫຼັກໄຫຼ ສີວິໄລ ກໍໄດ້ສະແດງຄວາມຍ້ອງຍໍຊົມເຊີຍ ແລະຜູ້ທີ່ໄດ້ຮັບການຍົກຍ້າຍ ແລະແຕ່ງຕັ້ງໃໝ່ຈົ່ງອຸ່ນອ່ຽງທຸ່ນທ່ຽງໃນການປະຕິບັດໜ້າທີ່ວຽກງານ, ກໍາແໜ້ນທີ່ຕັ້ງ, ພາລະບົດບາດ, ໜ້າທີ່ໃໝ່ຂອງຂະແໜງການທີ່ຕົນຮັບຜິດຊອບ, ເອົາໃຈໃສ່ວຽກງານສຶກສາອົບຮົມການເມືອງແນວຄິດໃຫ້ຖັນແຖວພະນັກງານຢ່າງຕັ້ງໜ້າ, ປັບປຸງແບບແຜນວິທີນໍາພາ-ວິທີເຮັດວຽກ, ຍົກລະດັບຄວາມຮູ້ທາງດ້ານວິຊາສະເພາະ ໃຫ້ພະນັກງານມີຄວາມຄວາມຮູ້, ຄວາມສາມາດ, ມີວິໄນ, ຈັນຍາບັນ, ຈັນຍາທໍາຕໍ່ໜ້າທີ່ວຽກງານຂອງຕົນ, ພ້ອມທັງເອົາໃຈໃສ່ຕິດຕາມກວດກາວຽກງານ ກໍຄືການປະຕິບັດໜ້າທີ່ຂອງພະນັກງານໃຫ້ເປັນປະຈໍາ ແລະປົກກະຕິ ເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານມີປະສິດທິພາບ, ມີປະສິດທິຜົນ ແລະດີຂຶ້ນເປັນກ້າວໆ.