ວັນທີ 2 ມີນາ 2021 ນີ້ ຢູ່ໂຮງຮຽນມັດທະຍົມສົມບູນນ້ຳຖວ້ມ, ເມືອງນ້ຳບາກ, ແຂວງຫຼວງພະບາງ ໄດ້ເປີດງານແຂ່ງຂັນກິລາມັດທະຍົມສົມບູນທົ່ວເມືອງນ້ຳບາກ ຄັ້ງທີ່ 2 ຂື້ນຢ່າງເປັນທາງການ. ເຂົ້າຮວ່ມເປັນປະທານຂອງທ່ານ ບຸນທັນ ຈັນທະສັກ ຮອງເຈົ້າເມືອງນ້ຳບາກ, ທ່ານ ບຸນຄົງ ລັດຕະນະຈິດ ຫົວໜ້າຫ້ອງການສຶກສາທິການ ແລະ ກິລາເມືອງນ້ຳບາກ, ທ່ານ ສຸລິດອນ ພານິພິດ ຫົວໜ້າຂະແໜງພະລະ-ສີລະປະສຶກສາ ພະແນກສຶກສາທິການ ແລະ ກິລາແຂວງ, ມີແຂກຖືກເຊີນຈາກຂະແໜງການອອ້ອມຂ້າງ, ອົງການປົກຄອງບ້ານ, ຄະນະກຳມະການ, ຄູຝຶກ ແລະ ນ້ອງນັກກິລາ 4 ໂຮງຮຽນເຂົ້າຮວ່ມ.

 ເພື່ອເປັນການຊຸກຍູ້ສົ່ງເສີມການຮຽນ-ການສອນ, ວິຊາພະລະ-ສີລະປະສຶກສາ ແລະ ກິລາໃນໂຮງຮຽນ ທັງສ້າງໃຫ້ນັກຮຽນສາມັນສຶກສາ ໄດ້ມີໂອກາດແລກປຽ່ນບົດຮຽນ ດ້ານກິລາການຍະກຳເຊີ່ງກັນ ແລະ ກັນ, ສ້າງຄວາມສາມັກຄີ ຮັກແພງເປັນຈິດໜື່ງໃຈດຽວ ເກີດມີແນວຄິດສະຫງວນມັກ ຫຼີ້ນກິລາກາຍຍະກຳໃຫ້ເປັນຂະບວນຟົດຟື້ນ ແລະ ກວ້າງຂວາງ, ຮູ້ຮັກການອອກກຳລັງກາຍ ໂດຍຕິດພັນກັບຊີວິດ, ສ້າງໃຫ້ນັກຮຽນຫັນມາຫຼີ້ນກິລາເພື່ອຫ່າງໄກຈາກສິງເສບຕິດ ແລະ ອະບາຍຍະມຸກຕ່າງຯ ໃຫ້ບັນລຸໄປຕາມ 5 ຫຼັກມູນຂອງກະຊວງສຶກສາ, ເປັນການສ້າງນັກກິລາດີເດັ່ນ ແລະ ເປັນຕົວແທນຂອງເມືອງ ໄປຮວ່ມແຂ່ງຂັນກິລາຢູ່ຂັ້ນຕ່າງຯ ພິທີອຳນວຍການໂຮງຮຽນມັດທະຍົມສົມບູນນ້ຳຖວ້ມ ໄດ້ກ່າວຕ້ອນຮັບແຂກ ພ້ອມທັງລາຍງານການກະກຽມງານແຂ່ງຂັນກິລາ ຈາກນັ້ນປະທານພິທີໄດ້ກ່າວເປີດງານ ພ້ອມທັງໃຫ້ກຽດຕັດແຖບຜ້າ ແລະ  ຕີຄ່ອງ 9 ບາດ ເພື່ອເປີດງານຢ່າງເປັນທາງການ.

ງານແຂ່ງຂັນກິລາ ນັກຮຽນມັດທະຍົມ ທົ່ວເມືອງນ້ຳບາກ ມີ 4 ໂຮງຮຽນເຂົ້າຮວ່ມ ຄື: ໂຮງຮຽນມັດທະຍົມສົມບູນນ້ຳບາກ, ໂຮງຮຽນມັດທະຍົມສົມບູນນ້ຳງາ, ໂຮງຮຽນສາມັນກິນນອນຊົນເຜົ່ານ້ຳບາກ ແລະ ໂຮງຮຽນມັດທະຍົມສົມບູນນ້ຳຖວ້ມ, ມີການແຂ່ງຂັນ 6 ປະເພດກິລາ, ມີ 11 ລາຍການແຂ່ງຂັນ ເປັນຕົ້ນແມ່ນກິລາບານເຕະ ຍິງ-ຊາຍ, ກິລາບານສົ່ງ ຍິງ-ຊາຍ, ກິລາກະຕໍ້ຫວາຍ ຍີງ-ຊາຍ, ກິລາແລ່ນ 3.000 ແມັດ ຍີງ-ຊາຍ, ກິລາຍິງໜ້າເກັກ ຍິງ-ຊາຍ ແລະ ກິລາໝາກຂ່າງທີມຊາຍ ມີຂັນຄອງປະຈຳ 3 ປີ 1 ໜວ່ຍ ພ້ອມດວ້ຍຂັນຊະນະເລີດ ຂອງແຕ່ລະປະເພດກິລາ 6 ໜວ່ຍ. ຕອນທ້າຍຍັງຮັບຊົມການສະແດງຮ້ອງເພງ ອານຸສອນກ່ອນຈາກ, ບົດຟ້ອນລຳສາລະວັນ, ແອບການຍະບໍລິຫານ ແລະ ບົດຟ້ອນຜ້າຝ້າຍຍ້ອມຄາມ ເພື່ອເປັນການສະແດງເປີດງານ ເຊີ່ງງານແຂ່ງຂັນກິລາແມ່ນເລີ່ມແຕ່ ວັນທີ 2 ຫາ ວັນທີ 5 ມີນາ 2021 ນີ້ ຈີ່ງຈະສຳເລັດ.

ພາບ-ຂ່າວ: ພອນສັກ ສິງດາລັກ ( ນັກຂ່າວເມືອງນ້ຳບາກ )